Bu ilin ilk yarısında sığorta şirkətləri, ümumilikdə, 361.3 milyon manat məbləğində sığorta haqları toplayıb, bu da 2018-ci ilin müqayisə edilən dövründən 8,9 faiz azdır. Maliyyə Bazarlarına Nəzarət Palatasının məlumatına görə, bu zaman sığorta ödəmələrinin həcmi (119,1 milyon manat), demək olar, dəyişməyib.
Könüllü sığorta bazarı üzrə haqlar 241.8 milyon manat, ödənişlər isə 83.3 milyon manat təşkil edib. Ölkədə könüllü sığorta növlərinin hesabına 176, 202 milyon manat sığorta haqqı toplanıb. Bu, ötən ilin eyni dövrü ilə müqayisədə 13,15 faiz azdır.
Son 1 ildə icbari sığorta növləri hesabına daxilolmaların məbləği isə 10,6 faiz artaraq 89,094 milyon manat olub. Hesabat dövründə könüllü sığorta növləri üzrə ödənişlərin məbləği 43,346 milyon manat təşkil edib ki, bu da illik müqayisədə 23,9 faiz azdır. İl ərzində icbari sığorta növləri üzrə ödənişlərin məbləği isə 8,1 faiz artaraq 23,305 milyon manata çatıb.
Beləliklə, könüllü sığorta bazarından toplanmış hər 100 manat sığorta haqqının 24,6 manatı qədər ödəniş edilib. Bu rəqəm 2018-ci ildə 25,8 manat olub. Son 1 ildə icbari sığorta bazarında hər 100 manat sığorta haqqına düşən ödənişin məbləği isə 26,8 manatdan 26,2 manata düşüb.
Onu da qeyd edək ki, bu ilin birinci rübündə sığorta yığımları azalanda sığota ilə məşğul olan qurumlar bunu onunla əlaqələndirdilər ki, adətən, birinci rübdə yığımların həcmi aşağı olur. İlin yarısından isə yığımlarda artım özünü göstərir və bu proses ilin sonunda bir qədər də müsbətə doğru dəyişir. Yəni ilin sonuna yaxın sığorta yığımları artır. Ancaq son statistik rəqəmlərdən bəlli olur ki, sığorta yığımlarında artm meylləri olmayıb. Nəticədə sığorta yığımları ötən ilin eyni dövrü ilə müqayisədə 8,9 faiz azalıb.
Maraqlıdır, sığorta yığımları niyə azalır?
Xəyal Məmmədxanlı: “Məlum ticarət mərkəzlərində baş verən yanğınlardan sonra gözlənilirdi ki...”
Məsələyə aydınlıq gətirən sığorta sektoru üzrə ekspert Xəyal Məmmədxanlı azalmanın səbəbini bir sıra amillərlə əlaqələndirdi: “Ümumilikdə, sığorta yığımlarının azalması proqnozlaşdırılırdı. Bu əsasən həyat sığortaları ilə bağlıdır. Əvvəllər vətəndaşların həyat sığortası ilə bağlı ayrılan vəsaitlər gəlir vergisindən, o cümlədən, DSMF-nin ayırdığı ödənişlərdən asılı idi. Ancaq ötən il bununla bağlı qanuna dəyişiklik edildi. Dəyişikliyə görə, həyat sığortasından azad edilən təbəqə əməkhaqqının müəyyən hissəsini həyat sığortasına yönəltməlidir. Ona görə də yaşam sığortasında çox ciddi azalma baş verdi. Çünki əvvəllər 1000 manat yaşam sığortasına ayrılırdısa, artıq 500 manat da ayıra bilmirlər. Bunun hesabına, təbii ki, sığorta bazarında yığımlarda azalma baş verdi. Ümumi sığorta növlərini müqayisə etdikdə əsasən iki sığorta növündə azalma nəzərə çarpır. Ən böyük azalma həyatın yaşam sığortasındadır. Digər tərəfdən, qəribə də olsa, əmlak sığortasında azalma müşahidə edilir. Xüsusən də bu ilin 2-3 ayında bu sahədə daha çox azalma var idi. Məlum ticarət mərkəzlərində baş verən yanğınlardan sonra gözlənilirdi ki, əmlak sığortalarına maraq daha da artacaq, amma bu baş vermədi. Çünki rəqəmlər bunu göstərmədi. Görürük ki, əmlak sığortalarında azalma müşahidə edilir. Nəyə görə bu sahəyə marağın olmaması bəlli deyil. Digər sığorta növlərində isə nə ciddi artım, nə də ciddi azalma müşahidə edilmir”.
Vidadi ORDAHALLI
