18/09/2019 12:01
728 x 90

Azərbaycan haqda beynəlxalq təşkilatın qəribə rəyi - müsəlman ölkəsində zəif islam bankçılığı...

“Hesab edirəm ki, bu sahədə narahatçılığa elə bir əsas yoxdur”

img

"Moody's" beynəlxalq reytinq agentliyi Azərbaycanda islam bankçılığının inkişaf potensialının aşağı olduğunu qeyd edir. Bu barədə yayılan məlumata görə, "Moody's" mütəxəssisləri MDB ölkələrində İslam bankçılığının inkişaf perspektivləri barədə hesabatda bildirirlər ki, müsəlman əhalisinin çoxluğuna baxmayaraq, Azərbaycanda islam bankçılığının inkişaf perspektivləri zəifdir.

Agentliyin analitiklərinin fikrincə, Azərbaycan hökuməti hazırda islam bankçılığının inkişafını planlaşdırmır. Bunu onunla əsaslandırırlar ki, hökumətin diqqəti dünyəvi dövlətin və iqtisadiyyatın yaradılmasına köklənib: “Azərbaycan Beynəlxalq Bankı "islam pəncərəsini" bağlayıb və ölkədə ixtisaslaşdırılmış islam bankı artıq yoxdur. 2018-ci ildə ölkə islam maliyyələşdirməsi üzrə qanunvericiliyin hazırlanmasında texniki köməyə dair İslam İnkişaf Bankı ilə razılaşma imzalanıb, lakin sektorun inkişafına qətiyyətli dövlət müdaxiləsi olmadan onun artması məhdud olacaq”.

Onu da qeyd edək ki, İslam İnkişaf Bankı 1991-2018-ci illərdə Azərbaycana 1,387 milyard dollarlıq kredit ayırıb. İslam bankçılığının inkişaf etdirilməsi ilə bağlı bir sıra təşəbbüslər göstərilsə də, nədənsə bu yöndə arzuolunan nəticə əldə olunmayıb.

Maraqlıdır, ölkədə islam bankçılığının inkişaf potensialı niyə zəifdir? Bu yöndə "Moody's"in hesabatını ekspertlər necə dəyərləndirir?

  • Aydın Hüseynov: “Ona görə ki, yaxın bir müddətdə artıq Azərbaycanda da islam bankçılığının təməlləri qoyulacaq”

Məsələyə münasibət bildirən millət vəkili Aydın Hüseynovun sözlərinə görə, o Azərbaycanda islam bankçılığının inkişaf perspektivinə nikbin yanaşır: “Məsələ ondadır ki, Azərbaycanda İslam İnkişaf Bankı ilə birgə layihənin həyata keçirilməsi nəzərdə tutulub. Hesab edirəm ki, bu sahədə narahatçılığa elə bir əsas yoxdur. Ona görə ki, yaxın bir müddətdə artıq Azərbaycanda da islam bankçılığının təməlləri qoyulacaq. Hesab edirəm ki, biz müəyyən maliyyə qurumlarının potensialından istifadə etməliyik. O cümlədən, bu sahədə İslam İnkişaf Bankı ilə əməkdaşlıq genişləndirilməlidir. Bu günlərdə KOB-la müəyyən müzakirələr aparılıb. Bu baxımdan düşünürəm ki, islam bankçılığının inkişafına üstünlük verməliyik. Məsələ ondadır ki, kiçik və orta sahibkarlıq sahəsində fəaliyyət göstərən iş adamlarının islam bankçılığının imkanlarından istifadə etməsi, ölkədə biznesin inkişafına öz töhfəsini verəcək. Bunun sayəsində sahibkarlar daha sərfəli şərtlərlə kredit əldə edəcək və bunu iqtisadi inkişafa yönəldəcək”.

Vidadi ORDAHALLI

Son xəbərlər