Prezidentin özəl sektorda iş yerlərini artırmaq kursu üzrə proses yeni formalar alır…
Azərbaycanda sahibkarlığın inkişafı, yeni müəssisələrin yaradılması və iş yerlərinin açılması siyasəti birbaşa insanların rifah halının yüksəlməsinə, yaşayış səviyyəsinin daha da yaxşılaşmasına səbəb olur. Müasir Azərbaycanın sürətli iqtisadi inkişafında, əhalinin rifah halının və yaşayış səviyyəsinin yüksəlməsində mühüm rol oynayan faktorlardan biri də sahibkarlığın inkişafıdır. Bu sahənin inkişaf etməsi üçün dövlət tərəfindən sahibkarlara hər cür şərait yaradılır.
Xatırladaq ki, Prezident İlham Əliyev iyulun 31-də sosial-iqtisadi sahə ilə bağlı müşavirədə çıxışı zamanı özəl sektorda daha çox iş yerinin yaradılmasının vacibliyi barədə fikir bildirmişdi. Prezident qeyd etmişdi ki, sosial sahədə əldə edilən uğurlar nəticəsində sahibkarlıq inkişaf edir: “Yeni iş yerləri açılır ki, vətəndaşlar işlə təmin olunsunlar. Ancaq hamımız yaxşı bilməliyik ki, özəl sektor iş yerlərinin yaradılmasına öz töhfəsini daha böyük həcmdə verməlidir. Özəl sektorun nümayəndələri ilə aparılan işlər nəticəsində biz bu sahədə də artım görürük. İqtisadi canlanma, əlbəttə ki, iş yerlərinin yaradılmasına da gətirib çıxarır. Çünki bu, daimi proses olmalıdır”.
Bununla bağlı bu günlərdə İqtisadiyyat Nazirliyində geniş kollegial iclas keçirilib. Özəl sektorda daha çox iş yerlərinin yaradılması məsələsi müzakirə olunub.
- Pərviz Heydərov: “Mütəmadi olaraq ölkədə açılan iş yerlərinin sayı artırsa, o zaman həmin yerdə iqtisadi artım qeydə alınır, bununla yanaşı, özəl sektorun inkişafı baş verir və iqtisadiyyatda dinamika yaranır”
İqtisadçı-ekspert Pərviz Heydərov “Bakı-Xəbər”ə açıqlamasında qeyd etdi ki, inkişaf etmiş ölkələrdə çalışan işçilərin əsas hissəsi özəl sektorun payına düşür: “Dövlət özəl sektora şərait yaratmalıdır ki, bu sahədə yeni iş yerlərinin sayı rübdən-rübə, ildən-ilə artsın. Amerikanın əsas makroiqtisadi göstəricilərindən biri il ərzində açılan iş yerlərinin sayının artmasıdır. Mütəmadi olaraq ölkədə açılan iş yerlərinin sayı artırsa, o zaman həmin yerdə iqtisadi artım qeydə alınır, bununla yanaşı, özəl sektorun inkişafı baş verir və iqtisadiyyatda dinamika yaranır. Əksi baş verərsə, bu, iqtisadiyyatda dolğunluqdan xəbər verir”.
Həmsöhbətimizin sözlərinə görə, dövlət başçısı İlham Əliyevin həyata keçirdiyi əsas vəzifələrdən biri hər il ölkədə yeni iş yerlərinin yaradılmasına üstünlük verilməsidir: “Təxmini hesablamalara görə, əmək bazarına il ərzində 100 min nəfər işçi daxil olmalıdır. İl ərzində 100 min işçinin əmək bazarına daxil olması üçün özəl sektorda yaradılan iş yerlərinin sayı artmalıdır. Əgər il ərzində azı 70-80 min işçi əmək bazarına daxil ola bilməzsə, bu hal ölkədə kəskin işsizliyin yaranmasına və iqtisadiyyatda durğunluq yaranmasına səbəb ola bilər. Bu səbəbdən işçilərin işlə təmin olunması əsas olaraq özəl sektorun üzərinə düşür. Bu sahədə sahibkarlara şərait yaradılır və yaradılmalıdır. Dövlətin əsas vəzifələri yeni istehsal sahələrinin yaradılmasına nail olmaq və bu sahəni stimullaşdırmaqdır”.
Günel CƏLİLOVA
