10/12/2019 20:43
728 x 90

Gürcüstanın Azərbaycan dizelindən imtinası təsdiqlənir - “Avro-5” səbəb, yoxsa bəhanədir...

“Gürcüstanın tətbiq etməyə hazırlaşdığı qadağada heç bir siyasi səbəb görmürəm”

img

Gürcüstan dizel yanacağı Rusiyadan alacaq. Gürcü mediasının yazdığına görə, qərar bir neçə gün əvvəl gürcü Neft İdxalçıları Birliyi tərəfindən təşkil olunmuş seminarda elan olunub.

Səbəb kimi 2020-ci il yanvarın 1-dən Gürcüstanda "Avro-4" standartlı dizel yanacağına qadağa qoyulması göstərilir. Həmin tarixdən ölkədə yalnız "Avro-5" standartına cavab verən dizel yanacağından istifadə ediləcək.

SOCAR-ın mətbuat xidmətinin rəhbəri İbrahim Əhmədov 2020-ci ildən Gürcüstanın Azərbaycandan dizel yanacağının idxalını dayandırması barədə xəbəri təsdiqləyib. Onun sözlərinə görə, Azərbaycandan dizel yanacağının idxalı Gürcüstan hökumətinin qərarı əsasında dayandırılacaq: "Qeyd edim ki, Azərbaycan tərəfi özü də hələ əvvəlki illərdə dizelin ixracını əhəmiyyətli dərəcədə azaldıb. Bu isə daxili bazarımızda son illər müşahidə olunan ciddi tələbat artımı ilə bağlıdır".

Əhmədov vurğulayıb ki, hazırda SOCAR Gürcüstanla yanaşı, digər ölkələrə də, əsasən Aralıq dənizinin hövzəsinə neft məhsulları və dizel yanacağını ixrac edir: "Mövcud satış şəbəkəmizdən istifadə edərək, biz gələcəkdə sərbəst qalan dizel həcmlərini həmin bazarlara yönləndirməyi və oradakı iştirakımızı artırmağı planlaşdırırıq".

Sonda SOCAR-ın sözçüsü qeyd edib ki, ötən illərin təcrübəsi artıq göstərib ki, həmin bazarlara dizel məhsulunun daha böyük həcmdə çıxarılması üçün yetərli potensial mövcuddur.

Xatırladaq ki, hazırda Gürcüstan dizel yanacağını ən böyük həcmdə Azərbaycandan idxal edir. Azərbaycandan idxal edilən neft məhsulları rus məhsullarından 15 tetri ucuzdur.

Gürcüstanın bu addımı həqiqətən “Avro-5”ə keçidlə bağlıdır, yoxsa bəhanədir?

  • İlham Şaban: “Biz niyə dünya standartları ilə ayaqlaşmayıb, bazarı itirməliyik?”

Enerji məsələləri üzrə ekspert İlham Şaban “Bakı-Xəbər”ə açıqlamasında bildirdi ki, burada başqa səbəb axtarmağa dəyməz: “Bu məsələləri bazar qanunları tənzimləyir. Siz istəyərsinizmi baha qiymətə keyfiyyətsiz paltar alasınız? Təbii ki, yox. Bu da elədir. Gürcüstanda dizelə tələbat çoxdur. Fikir versəniz görərsiniz ki, onlarda dizellə benzinin qiymətinin arsında kəskin fərq yoxdur. Qiymət fərqi cüzidir. Onların daxili bazarında yanacağın satışında ciddi rəqabət də var. Yəni bu şəbəkəyə bir şirkət nəzarət etmir ki, nə gəldi satsan. Belə rəqabət olan yerdə, təbii ki, keyfiyyət önə çıxır. Bu səbəbdən də indidən başlarına çarə qılırlar. Biz başa düşürük ki, SOCAR həmin yanacağı başqa ölkələrə sata biləcək. Buna tələbatı olanlar az deyil. Amma biz niyə dünya standartları ilə ayaqlaşmayıb, bazarı itirməliyik? Cənab Prezident hələ 2008-ci ildən fərman verib ki, dizelin keyfiyyəti dünya standartlarına uyğunlaşdırılsın. Bizdə hələ də o zavod tikilməyib. Yalnız mövcud olanlarda təkmilləşdirmə aparırlar. O da dünyada tələb olunan standartlara cavab verən məhsul buraxmaq gücündə deyil. İndi söz veriblər ki, 2023-cü ildə tikib bitirəcəklər. Gözləyək, baxaq. Artıq ölkənin daxilində də dizelə tələbat artır. Həm daxili, həm də xarici tələbat üçün biz istehsal etdiyimiz yanacağı dünyada tələb edilən standarta tam çatdırmalıyıq. Bu həm də ekologiyamız üçün faydalıdır. Gürcüstanın tətbiq etməyə hazırlaşdığı qadağada heç bir siyasi səbəb görmürəm. Bunu real bazar qanunları diqtə edir”.

Məhəmmədəli QƏRİBLİ 

Son xəbərlər