Azərbaycanın Mərkəzi Bankı dünya təcrübəsində tətbiqinə başlanan kağız pullardan hidrit materialla hazırlanan pula keçid məsələsini araşdırır. Bu barədə Mərkəzi Bankın yaydığı məlumatda qeyd olunur. Bildirilir ki, beynəlxalq təcrübədə pul əskinaslarının daha uzunömürlü olması və onların saxtalaşdırılmasının qarşısını almaq üçün polimer hidrit materialından istifadə olunmağa başlayıb: “Bu əskinasların tərkibində polimer daha çox olur. Polimer qarışıqlı pullar artıq bir sıra ölkələrdə istifadə olunmaqdadır. Xüsusən də isti iqlimli ölkələrdə. Həmin ölkələr özlərinin pul əskinaslarında qeyd olunan təcrübəni tətbiq edirlər”.
Qeyd edək ki, Mərkəzi Bank həmin materialdan olan pul əskinaslarına keçid imkanlarını nəzərdən keçirir. Məlumat üçün bildirək ki, dövriyyədə olan pul əskinasları yüz faiz pambıqdan hazırlanıb, metal pullar isə polad, mis, latun və nikeldən hazırlanır. Kağız pulların istismar müddəti 3-5 il, dəmir pullar isə 20 il nəzərdə tutulur.
Maraqlıdır, Azərbaycan kağız puldan hidrit-polimerdən hazırlanan əskinasa keçərsə, bunun dövlətə nə kimi faydası olar?
Vüqar Bayramov: “Kağız pullar tez dövriyyədən çıxdığı üçün, bunun iqtisadiyyata xeyri olmur”
İqtisadçı-ekspert Vüqar Bayramov “Bakı-Xəbər”ə açıqlamasında qeyd etdi ki, kağız pul tez dövriyyədən çıxaraq istifadəyə yararsız olur. Hidrit materialından hazırlanan əskinaslara keçidin məqsədi əskinasların dövriyyədə daha uzun müddət qalmasıdır: “Bir sıra ölkələrdə bu təcrübə tətbiq olunmaqdadır. Tez zədələnən kağız pulların hidrit-polimerdən hazırlanan əskinasla əvəz olunması daha məqsədəuyğundur”.
Həmsöhbətimiz ou da vurğuladı ki, inkişaf etmiş ölkələrdə də polimer-hidrit materialından hazırlanan əskinaslara keçid üçün hazırlıq gedir. Qeyd olunan keçid zaman tələb edir. Yaxın zamanlarda adıçəkilən maddələrdən hazırlanan əskinaslar ölkəmizdə tətbiq oluna bilməz. Uzunmüddətli əskinaslara keçid üçün vaxt lazımdır.
Ekspertin fikrincə, kağız pullar tez dövriyyədən çıxdığı üçün, bunun iqtisadiyyata xeyri olmur. Polimer- hidrit materialından hazırlanan əskinas dövriyyəyə buraxılarsa, Mərkəzi Bank öz vəsaitlərinə qənaət etmiş olar.
Günel CƏLİLOVA
