Hələ ötən ilin ikinci yarısında Prezident İlham Əliyev bəyan etmişdi ki, növbəti dövr Azərbaycanda sosial sahədə ciddi islahatlarla yadda qalacaq. Bunu o, həyata keçirilən iqtisadi siyasət və islahatlar çərçivəsində iqtisadiyyat, infrastruktur sahələrində nəzərdə tutulan böyük layihələrin başa çatması nəticəsində artan gəlirlərin əhalinin sosial rifahını yüksəltmək istiqamətinə yönəldilməsinə imkan verməsi ilə əsaslandırıb.
Qeyd edək ki, cari il ərzində dövlət başçısının imzaladığı fərman və sərəncamların mühüm bir hissəsi məhz əhalinin sosial müdafiəsinin əhəmiyyətli şəkildə gücləndirilməsi, sosial sahə üzrə müasir, şəffaf, çevik, optimal idarəçilik və xidmət mexanizmlərinin formalaşması məramına istiqamətlənib. Bu mühüm məqam isə Prezident İlham Əliyevin siyasi fəaliyyətində məhz insan, vətəndaş amilinin, ölkədə sosial rifah və sabitliyin təminatının əsas yer tutduğunu bir daha təsdiq edir.
Məlumat üçün bildirək ki, 2019-cu il 28 yanvar tarixli Fərmanla birdəfəlik ödəmə verilməsi nəzərdə tutulan şəhid vərəsələrinin əhatə dairəsi genişləndi. Elə həmin gün Prezident İlham Əliyev şəhid ailələri ilə görüş keçirdi və onlara yeni mənzillərin təqdim olunmasında iştirak etdi. Mənzillərin təqdim olunması tədbirindən bir gün sonra dövlət başçısı Qarabağ müharibəsi əlilləri və şəhid ailələri üçün əlavə olaraq 20 milyon manat vəsait ayrılmasına dair sərəncam imzaladı.
Şəhid ailələri ilə görüşdə onlara diqqət və qayğı göstərilməsinin dövlətin fəaliyyətində daim prioritet təşkil etdiyini vurğulayan Prezident İlham Əliyev bundan iki gün sonra imzaladığı 30 yanvar 2019-cu il tarixli Fərmanla şəhid ailəsi üçün Prezidentin aylıq təqaüdünün 242 manatdan 300 manata, eləcə də Əfqanıstanda şəhid olanların ailələri üçün Prezident təqaüdünün 220 manatdan 300 manata çatdırılması ilə bu prosesi davam etdirdi.
Prezident İlham Əliyevin sosial islahatlar paketinin daha bir uğurlu nəticəsi 8 fevral 2019-cu il tarixli Sərəncamla ölkədə minimum əməkhaqqının 2019-cu il martın 1-dən orta hesabla 40 faiz artırılaraq 180 manata çatdırılması oldu. 600 min (o cümlədən, dövlət sektoru üzrə 450 min, özəl sektor üzrə 150 min) işçinin rifahına ciddi dəstək olan bu artım üçün illik 400 milyon manat əlavə vəsait ayrılacaq. Minimum əməkhaqqının yaşayış minimumuna çatdırılmasına imkan verən bu artım, eyni zamanda, qeyri-rəsmi əmək münasibətlərinin də leqallaşdırılmasına öz müsbət təsirini göstərir.
Məlumdur ki, ölkə başçısı təhsilin inkişafına xüsusi diqqət yetirir. Prezident İ.Əliyevin fevralın 14-də imzaladığı "Azərbaycan Respublikasının ali məktəb tələbələri üçün Prezident təqaüdünün təsis edilməsi haqqında”, "Ali təhsil müəssisələrində təqaüd sisteminin təkmilləşdirilməsi ilə bağlı əlavə tədbirlər barədə” və "Doktorantlara, ali təhsil, orta ixtisas və peşə təhsili müəssisələrində, həmçinin, Azərbaycan Milli Elmlər Akademiyasının magistratura səviyyəsində təhsil alan tələbələrə təqaüdlərin verilməsi haqqında” bir fərman və iki sərəncam sayəsində təqribən 100 minə yaxın tələbənin təqaüdü artırıldı. Bu sənədlər xeyli gəncin təqaüdünün artırılması və yaxud ailə vəziyyətinin yaxşılaşdırılmasına səbəb oldu.
2019-cu il 26 fevral tarixli Sərəncamla məcburi köçkünlər və onlara bərabər tutulan şəxslər üçün aylıq müavinət 50 faiz artırılaraq 60 manata çatdırılmaqla, bu müavinəti alan 500 mindən çox məcburi köçkünün rifahına mühüm dəstək verildi.
Danılmaz faktdır ki, son zamanlar əhalini narahat edən əsas məsələlərdən biri də problemli kreditlər idi. Məlumdur ki, 2015-ci ildə manatın məzənnəsinin xarici valyutaya nisbətən dəyişməsindən banklardan xarici valyuta ilə kredit götürənlər həmin məbləği geri qaytarmaqda çətinlik çəkdilər. Nəticədə çoxlu sayda vətəndaş bankdan götürdüyü krediti geri qaytarmaqda sıxıntı çəkdiyi üçün, problemli kreditlərin həcmi günü-gündən artdı. Bu problemin birdəfəlik həlli məqsədilə Prezident İlham Əliyevin 28 fevral 2019-cu il tarixdə imzaladığı Fərman sayəsində devalvasiyanın təsirləri aradan qalxdı. Həmin fərmana əsasən, ölkənin sosial həyatı üçün olduqca mühüm olan, 800 mindən artıq insanın problemli kredit narahatlığı aradan qaldırıldı.
Həmçinin, ölkə başçısınin 19 fevral 2019-cu il tarixdə imzaladığı Fərman isə istismarına icazə verilməmiş çoxmənzilli yaşayış binalarının sakinlərindən ibarət 350-400 min insanın mənafelərinin təmin olunmasına xidmət etdi.
Bəllidir ki, ilin əvvəlində imzalanan sərəncamla minimum əməkhaqqı 130 manatdan 180 manata yüksəlmişdi. Ancaq iyun ayında imzalanan növbəti sərəncama əsasən, minumum əməkhaqqı sentyabr ayının birindən artıq 250 manat olacaq. Bundan başqa, Prezidentin həmin ərəfədə imzaladığı sərəncamlarla dövlət büdcəsindən maliyyələşən bir sıra təşkilatların işçilərinin, hərbi qulluqçuların, diaqnostik qiymətləndirmədən keçən müəllimlərin maaşları və bir sıra digər təşkilatların işçilərinin əməkhaqqı 20, 40 və 50 faiz artırılıb. Bu, faktiki olaraq, milyonlarla vətəndaşımızın gəlirlərinin əhəmiyyətli dərəcədə artmasına səbəb olacaq.
Təkcə cari ilin 6 ayı ərzində Prezident İ.Əliyev əhalinin sosial təminatının yaxşılaşması məqsədilə silsilə fərman və sərəncamlar imzalayıb. İmzalanan hər bir sənəd əhalinin sosil vəziyyətinin inkişaf etməsinə səbəb olub.
Rüfət Quliyev: “2019-cu ilin əvvəlindən bu günə kimi əhalinin sosial müdafiəsinin gücləndirilməsi məqsədilə Prezident İlham Əliyev tərəfindən inqilabi sosial islahatlar həyata keçirilir”
Milli Məclisin İqtisadi siyasət, sənaye və sahibkarlıq komitəsinin üzvü, millət vəkili Rüfət Quliyev bizimlə söhbətində qeyd etdi ki, 2019-cu ilin əvvəlindən bu günə kimi əhalinin sosial müdafiəsinin gücləndirilməsi məqsədilə Prezident İlham Əliyev tərəfindən inqilabi sosial islahatlar həyata keçirilir: “Sosial islahatlar əsasən müavinətlərin, təqaüdlərin və digər sosial ödənişlərin artırılmasıdır. Həmçinin, dövlət büdcəsindən maliyyələşən təşkilatlarda çalışan işçilərin əməkhaqları da artırılıb. Məlumdur ki, ilin əvvəlində minimum əməkhaqqı 130 manatdan 180 manata qaldırıldı. Bu artım əhali tərəfindən böyük rəğbətlə qarşılandı. Ümumilikdə, cari ilin əvvəllərində həyata keçirilən sosial islahatlar paketi milyonlarla insanın sosial müdafiəsinin gücləndirilməsi sahəsində inqilabi addım oldu. Bununla yanaşı, minimum əməkhaqqının məbləği artırılaraq 250 manat müəyyən olundu. Sosial-iqtisadi sahədə görülən hər bir iş ölkəmizin davamlı iqtisadi inkişafına söykənir”.
Millət vəkilinin sözlərinə görə, əhalinin gəlirinin artırılması, maddi rifahının yaxşılaşdırılması dövlətin öncül qayğılarından biridir və dövlətimiz də buna hər zaman önəm verir: “Minimum əməkhaqqı və minimum pensiyanın artırılması bunun əlamətidir. Minimun əməkhaqqının bir ilin ərzində 130 manatdan 250 manata çatdırılması çox ciddi göstəricidir. Həmçinin, pensiyaların artırılması əhalinin alıcılıq qabiliyyətinin artırılmasına, onların sosial rifahının yaxşılaşmasına ciddi kömək olacaq. Bunlar, bütövlükdə, ölkədə sosial durumun yaxşılaşmasına hədəflənib”.
Günel CƏLİLOVA
