Azərbaycan Prezidentinin sosial sferanın inkişaf etdirilməsi, əhalinin rifahının yüksəldilməsi istiqamətində həyata keçirdiyi məqsədyönlü siyasətin əhatə dairəsi doğrudan da çox böyükdür. Məlumdur ki, 2019-cu ilin əvvəlindən başlayaraq Prezident İlham Əliyev iki böyük sosial islahat paketi təsdiq edib.
Birinci paket 3 milyon vətəndaşın maaş, pensiya, sosial müavinətlərinin artırılması, mühüm sosial məsələlərin həllinə 1.6 milyard manatın yönəldilmısini nəzərdə tutub və icra olunub.
İkinci paketin icrası ilə bağlı hazırlıq işləri tamamlanıb, sentyabrın 1-dən minimal əməkhaqqının 250 manata çatdırılması, əlavə olaraq 400 min nəfərin maaşının 20-50 faiz artırılması, 750 min pensiyaçıya verilən vəsaitin oktyabrın 1-dən yüksəldilməsi nəzərdə tutulub.
Hər iki paketin ümumi məbləği cari il üçün 2.3 milyard manat, gələn il üçün isə daha 3 milyard manat olmaqla, ümumilikdə, 4.2 milyon vətəndaşın əhatə edilməsi və 5.2 milyard manatın sərf olunması nəzərdə tutulur.
Sosial sahə üzrə görülən işlər bir tərəfdən Azərbaycan dövlətinin gücünü, digər tərəfdən də Azərbaycan Prezidentinin həyata keçirdiyi siyasətin effektivliyini, reallaşdırılan islahatların yüksək praktiki nəticələr verdiyini göstərir.
Təkcə onu demək kifayətdir ki, Azərbaycanda minimal pensiya 72 faiz artdığına görə ölkəmiz minimal pensiya üzrə alıcılıq qabiliyyətinə görə MDB-də birinci olacaq. Minimal əməkhaqqının 250 manata çatdırılmasından sonra isə Azərbaycan bu göstərici üzrə MDB-də ikinci sırada qərarlaşıb. Göründüyü kimi, cənab Prezidentin təqdim etdiyi iki sosial paket, demək olar ki, ölkə əhalisinin yarısı qədər insana şamil olunacaq. Bu göstəricini necə dəyərləndirmək olar?
İqtisadçı Elşən Əliyev “Bakı-Xəbər”ə bildirdi ki, həyata keçirilən uğurlu siyasət kursu və müxtəlif sahələri əhatə edən islahatlar, sistemli və ardıcıl şəkildə reallaşdırılan layihələr Azərbaycanın inkişafına bir qədər də təkan verir, onu dünyanın aparıcı ölkələri ilə eyni sırada qərarlaşdırır: “Bu reallığı təkcə biz deyil, eləcə də beynəlxalq təşkilat və qurumlar da təsdiqləyir, ölkəmizin inkişaf dinamikasını təqdir edirlər.
Azərbaycanda əksər sahələrdə qeydə alınan inkişaf və tərəqqini, onun aydın mənzərəsini rəsmi statistik rəqəmlərdən də aydın görə bilirik. Ölkə başçısı tərəfindən aparılan sosial-iqtisadi siyasətin qayəsində Azərbaycan vətəndaşının, onun sosial təminatının və rifahının dayandığını özündə növbəti dəfə bariz şəkildə ehtiva edən bu qərarlar, ümumilikdə, ölkə əhalisinin yarısına qədər sayda olan insanı əhatə etməklə, həm dövlət orqanlarında, həm də özəl sektorda çalışan şəxslərin maddi vəziyyətini əhəmiyyətli dərəcədə yaxşılaşdıracaq. İmzalanan sərəncamlar minimum aylıq əməkhaqqının 180 manatdan 250 manata çatdırılmasını, dövlət qulluqçularının aylıq vəzifə maaşlarının 50 faiz, hərbi və hüquq-mühafizə orqanlarının xüsusi rütbəli əməkdaşlarının və mülki işçilərinin əməkhaqlarının 40 faiz, dövlət ümumi təhsil və peşə təhsili müəssisələrində çalışan, bilik və bacarıqlarının diaqnostik qiymətləndirilməsi aparılan müəllimlərin vahid aylıq vəzifə maaşlarının orta hesabla 20 faiz, dövlət büdcəsindən maliyyələşən bir sıra digər təşkilatlarda çalışan şəxslərin aylıq vəzifə maaşlarının orta hesabla 40 faiz artırılmasını nəzərdə tutur”.
İqtisadçının sözlərinə görə, bu ilin əvvəlindən etibarən Prezident İlham Əliyev tərəfindən qəbul edilən qərarlar qlobal iqtisadiyyatda baş verən neqativ meyllərin ölkə əhalisinin sosial təminatına mənfi təsirini minimallaşdırmağa imkan vermişdisə, hazırkı sərəncamlar isə əhalinin gəlirlərinin artmasına, yığım imkanlarının genişlənməsinə şərait yaradacaq: “Əməkhaqlarının əhəmiyyətli artımı əhalinin alıcılıq qabiliyyətinə müsbət təsir etməklə, iqtisadi aktivliyin daha da artmasına və iqtisadiyyatın digər sferalarının inkişafına da öz töhfəsini verəcək”.
Məhəmmədəli QƏRİBLİ
