Respublikamızda həyata keçirilən sosial-iqtisadi siyasətin başlıca məqsədlərindən biri vətəndaşların həyat səviyyəsinin yüksəldilməsi və əhalinin sosial müdafiəsinin təmin edilməsidir. Son bir neçə ildə iqtisadiyyatın inkişafında əldə edilən nailiyyətlər bu məqsədin uğurla reallaşmasına şərait yaradıb.
Bütün kateqoriyalardan olan vətəndaşların sosial müdafiəsinin gücləndirilməsi, əhalinin aztəminatlı təbəqələrinə kömək göstərilməsi, yoxsulluğun aradan qaldırılması Azərbaycanda dövlət siyasətinin başlıca istiqamətlərindən biridir. Prezident İlham Əliyevin sosial siyasətinin fəlsəfəsi də ondan ibarətdir ki, ölkədə aztəminatlı, yoxsul insan olmasın. Fərəhli haldır ki, iqtisadiyyatda həyata keçirilən köklü islahatlar bu sferada dinamik və davamlı inkişafı təmin etməklə bərabər, əhalinin sosial-iqtisadi vəziyyətinin yaxşılaşdırılmasına geniş imkanlar açıb.
İqtisadi inkişaf, maliyyə imkanlarının çoxalması adekvat olaraq xalqın sosial rifahının, güzəranının daha da yaxşılaşdırılması, sosial problemlərin həlli istiqamətində atılan addımların real nəticələri ilə müşayiət olunmaqdadır. Prezident İlham Əliyevin sosial sahəyə diqqət və qayğısının nəticəsidir ki, son illər dövlət büdcəsi təsdiq olunarkən ali maliyyə sənədində sosialyönümlülük prioritet olaraq qalır.
Məlumdur ki, bu sahədə görülən işlər sayəsində müavinətlərin və təqaüdlərin artırılması 300 min əlilliyi olan şəxsi, 500 min məcburi köçkünü, 100 mindən artıq tələbəni, ümumilikdə, 1.3 milyon insanı əhatə edib. Ən əsası, bu addımlar aztəminatlı təbəqəni əhatə etməklə, bu kateqoriyaya aid olan insanların sosial durumunun xeyli yaxşılaşdırılmasını təmin edəcək.
Aztəminatlı ailələrin müdafiəsinin təmin olunması məqsədilə vəsait ayrılıb. Ayrılan vəsait aztəminatlı ailələrin sosial vəziyyətinin yaxşılaşmasına və inkişaf etməsinə şərait yaradır.
Elçin Quliyev: “Sosial müavinətlərin, təqaüdlərin əhəmiyyətli dərəcədə artırılması əhalinin sosial vəziyyətinin daha da yaxşılaşdırılmasına səbəb olub”
Milli Məclisin İqtisadi siyasət, sənaye və sahibkarlıq komitəsinin üzvü, millət vəkili Elçin Quliyev “Bakı-Xəbər”ə açıqlamasında qeyd etdi ki, əhalinin sosial rifahının daha da yüksəldilməsi dövlət siyasətinin başlıca istiqamətlərindən biridir: “Dövlət başçısının həyata keçirdiyi sosial islahatların əsas istiqamətləri əhalinin məşğulluğunun təmin edilməsi, paralel olaraq, sosial müdafiə məsələlərində ünvanlılıq prinsipinə üstünlük verilməsi, aztəminatlı ailələrin, əlillərin, ailə başçısını itirənlərin, şəhid ailələrinin və bu qəbildən olan digər şəxslərin pensiya və müavinət təminatının yaxşılaşdırılmasından, onların həyat səviyyəsinin yüksəldilməsinə şərait yaradılmasından ibarətdir. Məlumdur ki, bu il əməkhaqlarının, pensiyaların, sosial müavinətlərin, təqaüdlərin əhəmiyyətli dərəcədə artırılması əhalinin sosial vəziyyətinin daha da yaxşılaşdırılmasına gətirib çıxardı. Sosial proqramların qəbulu cəmiyyətimizin böyük hissəsini əhatə edir”.
Millət vəkili bildirdi ki, bu ilin ilk ayları ölkəmizdə xüsusən sosial sahədə həyata keçirilən və milyonlarla vətəndaşın rifahına birbaşa təsir göstərən tədbirlərlə əlamətdardır: “Qısa müddət ərzində bu qədər sosialyönümlü qərarların verilməsi bir daha göstərir ki, Prezident İlham Əliyev üçün ən ümdə məsələlərdən biri vətəndaşlarımızın yüksək rifah içində yaşamasıdır. Bu həm də Prezident İlham Əliyevin cəsarətli və inamlı, ölkə vətəndaşlarının gələcəyinə hesablanmış qətiyyətli siyasətinin təzahürüdür. Şübhəsiz, respublikamızın iqtisadi imkanları artdıqca, vətəndaşlarımızın sosial rifahının daha da yüksəldilməsinin şahidi olacağıq. Artıq buna kimsə şübhə edə bilməz. Sosial müavinətlərin artırılması, əlillərin, şəhid ailələrinin maddi rifahının yaxşılaşdırılması istiqamətində verilən sərəncamlar, görülən tədbirlər yürüdülən məqsədyönlü sosial siyasətin tərkib hissəsidir və vətəndaşların rifah halının daha da yaxşılaşdırılmasına xidmət edir. Prezident İlham Əliyev əhaliyə, xüsusilə aztəminatlı ailələrə sosial xidmətlərin göstərilməsi zamanı vətəndaş məmnunluğunu daim diqqət mərkəzində saxlayıb”.
Günel CƏLİLOVA
