Prezident İlham Əliyev ölkə əhalisinin rifah halının gücləndirilməsi istiqamətində ötən illər ərzində silsilə işlər görüb. Görülən işlər sayəsində minimum əməkhaqqı və minimum pensiya məbləği yüksəlib.
Bəllidir ki, bu il Azərbaycanda minimum əməkhaqqı 250 manata çatdırıldı. Beləliklə, cəmi 6 ay ərzində Azərbaycanda minimum əməkhaqqı təxminən iki dəfə artırılıb. Təbii ki, pensiya məbləğinin və əməkhaqqının artlırılması əhalinin güzəranına müsbət təsir edir.
Azərbaycanda qeydə alınan məlum müsbət dəyişikliklər beynəlxalq təşkilatların da diqqətindən yayınmayıb. Ümumiyyətlə, MDB ölkələri arasında Azərbaycan əməkhaqqı və pensiya məbləğinin artırılması parametrinə görə ön sıradadır.
Məlumat üçün bildirək ki, Azərbaycanda minimal pensiya 72 faiz artdığına görə ölkəmiz minimal pensiya üzrə alıcılıq qabiliyyətinə görə MDB də birinci, minimal əməkhaqqının 250 manata çatdırılmasından sonra isə bu göstərici üzrə MDB-də ikinci sırada qərarlaşıb.
Musa Quliyev: “Bu bizim müstəqillik dövründə sosial sahədə əldə etdiyimiz ən böyük uğur və göstəricilərdən biridir”
Millət vəkili Musa Quliyev bildirdi ki, 2019-cu il müasir tariximizin sosial müdafiə sahəsində ən uğurlu illərindən biridir: “İlin əvvəlində Prezident İlham Əliyev 2019-cu ili sosial müdafiə sahəsində xüsusi il elan etdi. Doğrudan da bu il müstəqilliyimiz ərzində sosial təminatların həyata keçirilməsi, fərman və sərəncamların verilməsi, əhalinin sosial müdafiəsinin əsaslı surətdə yaxşılaşması ilə xarakterizə olunur.
Məlumdur ki, pensiyalar il ərzində təxminən 70 faiz, minimum əməkhaqqı iki dəfə artırıldı. Pensiyaların alıcılıq qabiliyyətinə görə MDB məkanında birinci yerə çıxmışıq, minimum əməkhaqqının alıcılıq qabiliyyətinə əsasən isə ikinci yerdə qərarlaşmışıq. Bu bizim müstəqillik dövründə sosial sahədə əldə etdiyimiz ən böyük uğur və göstəricilərdən biridir”.
Vüqar Bayramov: “…son illər MDB ölkələrində müşahidə edilməyən bir haldır”
İqtisadçı-ekspert Vüqar Bayramov “Bakı-Xəbər”ə açıqlamasında qeyd etdi ki, əhalinin sosial rifah halının yüksəlməsi məqsədilə Prezident tərəfindən mühüm islahatlar həyata keçirilib. O islahatlardan biri də minimum əməkhaqqı və pensiya məbləğinin artmasıdır: “İstər əməkhaqqı, istərsə də pensiyadakı artımların istehlak bazarına təsirinin minimallaşdırılması mümkündür. Azərbaycanda minimum əməkhaqqının 2019-cu ildə iki dəfə - 100 faizə yaxın artırılması, nəticə etibarilə, son illər MDB ölkələrində müşahidə edilməyən bir haldır. Təbii ki, istisna hallarda bir sıra ölkələrdə bu tip artımlar olur. Nəticə etibarilə bu ondan xəbər verir ki, Azərbaycanda vətəndaşlarımızın sosial təminatının gücləndirilməsi prioritetdir və hər zaman prioritet olaraq da qalmaqdadır. Eyni zamanda, Azərbaycan son artımlardan sonra MDB məkanında ən yüksək minimum əməkhaqqı olan ölkələr kateqoriyasına daxil oldu. Nəticə etibarilə biz MDB-də ən yüksək minimum əməkhaqqı təklif edən ölkələrdənik".
V.Bayramov onu da vurğuladı ki, sözügedən əməkhaqqı və pensiya artımı mərhələli şəkildə həyata keçirilib: "Minimum əməkhaqqının 100 faizə yaxın - iki dəfə artırılması birbaşa onunla bağlıdır ki, bazara iqtisadi və psixoloji təsir və təzyiqlər yaranmasın. Bu baxımdan mərhələli şəkildə həm minimum əməkhaqqı, həm də minimum pensiya məbləğinin artırılması bazara təsir və təzyiqləri minimallaşdırmaq məqsədi daşıyır. Nəticə etibarilə vəsaitlərin bazara mərhələli şəkildə daxil olması anlamına gəlir ki, bu isə, təbii, inflyasiyayaradıcı effektlərin məhdudlaşdırılması və tənzimlənməsinə imkan verir".
Günel CƏLİLOVA
