2019-cu ildə ölkəmizin həyatında yeni bir mərhələnin bünövrəsi qoyuldu. Prezident İlham Əliyev hələ 2018-ci ilin sonlarında Rusiya və digər ölkələrin telekanallarına verdiyi müsahibələrdə 2019-cu ilin Azərbaycan üçün uğurlu bir il olacağını bildirməklə yanaşı, qeyd edirdi ki, bu il Azərbaycanda islahatlar ili olacaq.
Ölkə başçısı əminliklə bildirirdi ki, 2019-cu ildə ölkəmiz daha da inkişaf edəcək. “Həyata keçirdiyimiz islahatların artıq xeyli hissəsi özünü 2019-cu ildə göstərəcək. Biz Azərbaycan iqtisadiyyatının transformasiyası prosesini bitiririk. Buna görə də düşünürəm ki, iqtisadi inkişaf cəhətdən bütün planlar reallaşdırılacaq. Dövlət büdcəsi də artıq qəbul olunub. O, həmişəki kimi, sosialyönümlüdür. Buna görə də bütün sosial proqramlar həyata keçiriləcək” - deyə Prezident İlham Əliyev vurğulayırdı.
2019-cu ilin ötən dövründə həyata keçirilən islahatlardan nə əldə olundu?
Fəzail İbrahimli: “Bu islahatlar özünü daha çox sosial sahədə büruzə verir”
Azərbaycanda həyata keçirilən islahatları “Bakı-Xəbər”ə şərh edən millət vəkili, tarixçi-alim Fəzail İbrahimlinin sözlərinə görə, Prezident İlham Əliyev yalnız xarici telekanallara verdiyi müsahibələrdə deyil, həmçinin, prezident seçkiləri zamanı 2019-cu ilin Azərbaycanda ciddi islahatlar ili olacağını bəyan edib. F.İbrahimli vurğuladı ki, ölkə başçısı islahatlarla bağlı verdiyi vədlərinin hamısını yerinə yetirdi. 2019-cu ildə həyata keçirilən islahatlar nəticəsində bir sıra uğurlar əldə etdiyimizi deyən millət vəkilinin sözlərinə görə, bu özünü ən çox əhalinin sosial rifah halının yüksəldilməsi sahəsində büruzə verdi. “2019-cu il, sözün həqiqi mənasında, Azərbaycan üçün ciddi islahatlar ili oldu. Ölkə başçısının həyata keçirdiyi islahatlar ən çox özünü sosial sahədə göstərdi və əhalinin müxtəlif təbəqələrinin sosial rifah halının yüksəldilməsi istiqamətində dərin islahatlar həyata keçirildi. Prezidentin imzaladığı sosial paketlər əhalidə ruh yüksəkliyi, gələcəyə inam yaratdı.
Bilirsiniz ki, Prezident İlham Əliyev fevral ayında maaşların, pensiyaların, tələbələrin, magistr aspirantların təqaüdlərinin artırlmasına dair 10-dək çox önəmli sərəncam, fərmanlar imzalayıb. Xüsusilə minumum əməkhaqqının birdən-birə 38,5 faiz artması, sözün həqiqi mənasında, sosial inqilab oldu. Müxtəlif sahələrdə işləyən insanların əməkhaqlarının qaldırılması, əhalinin sosial rifah halının yüksəldilməsi istiqamətində həyata keçirilən islahatlardan cəmiyyətimiz, xalqımız qazandı. Əhalinin sosial müdafiəsi sahəsində atılan addımlar cənab Prezidentin bəyan etdiyi islahatların tərkib hissəsinə daxildir. Ölkəmizdə həyata keçirilən sosial-iqtisadi islahatlar, o cümlədən də kadr islahatları, yeni mərkəzlərin yaradılması, qurumların təsis edilməsi onu göstərdi ki, 2019-cu il Azərbaycanda ciddi və uğurlu islahatlar ili oldu. Diqqətçəkən məqamlardan biri odur ki, sosial-iqtisadi sahədə baş verən islahatlar davamlı xarakter alıb və bunların hamısı da Azərbaycan insanının sosial rifah halının yüksəldilməsinə xidmət edir. Dövlətin əsas iki vəzifəsi var. Biri dövlətin təhlükəsizliyi, digəri isə əhalinin sosial rifah halının yüksəldilməsidir. Hesab edirəm ki, Azərbaycan bir dövlət kimi bu iki mühüm göstəriciyə yüksək səviyyədə nail olub”.
F.İbrahimlinin sözlərinə görə, bu gün həm ölkəmizin təhlükəsizliyi, həm də əhalinin sosial rifah halının yüksəldilməsi daim dövlət başçısının diqqətindədir.
2019-cu ilin əvvəlki illərdən fərqlənən çox əhəmiyyətli bir il olduğunu vurğulayan millət vəkilinin sözlərinə görə, hazırda həm daxildə, həm də xaricdə Azərbaycanı istəməyən qüvvələr var, dövlətimiz ölkəmizin təhlükəsizliyini yüksək səviyyədə təmin etməklə həm də vətəndaşlarımızın təhlükəsizliyini təmin edib. “Cənab Prezidentin bəyan etdiyi kimi, 2019-cu ildə ölkəmiz yeni inkişaf mərhələsinə qədəm qoydu və bu inkişaf özünü bütün sahələrdə aparılan çox ciddi islahatlarla bir daha təsdiqlədi. Bildiyimiz kimi, islahatların yeni mərhələsinin anonsunu Prezident İlham Əliyev prezident seçkiləri zamanı vermişdi. Doğrudan da keçən bir il ərzində Azərbaycanda çox ciddi və çoxşaxəli islahatlar həyata keçirildi. Qeyd etdiyim kimi, bu islahatların bütün sahələri əhatə etməsi çox müsbət göstəricidir”.
Azərbaycanda aparılan iqtisadi və sosial sahədəki islahatların da müsbət nəticələr verdiyini deyən F.İbrahimli hesab edir ki, həm sosial-iqtisadi, həm kadr, həm də digər sahələrdə islahatlar Azərbaycan xalqının, dövlətinin maraqlarına xidmət edir: “2019-cu il Azərbaycan üçün doğrudan da islahatlar ili oldu və biz bu 8 ay ərzində bütün sahələrdə böyük uğurlar əldə etmişik. Qeyd etdiyim kimi, bu islahatlar özünü daha çox sosial sahədə büruzə verir”.
İradə SARIYEVA
