“Mərkəzi Bank müxtəlif valyutalarda öz ehtiyatlarını saxlaya bilər, həmin valyutaların məzənnəsinin dəyişməsi adıçəkilən bankın valyuta ehtiyatlarının həcminin dəyişməsinə səbəb ola bilər”
Mərkəzi Bankın valyuta ehtiyatları artmaqda davam edir. Azərbaycan Mərkəzi Bankının sədri Elman Rüstəmov bu günlərdə Prezident İlham Əliyevin yanında sosial-iqtisadi sahə ilə bağlı keçirilən müşavirədə çıxışı zamanı deyib ki, cari ildə valyuta ehtiyatları 330 milyon dollardan çox artıb: “Amma diqqətinizi ona cəlb etmək istəyirəm ki, valyuta ehtiyatlarının idarə olunmasının effektivliyinin artırılması olduqca mühüm məsələdir. Bu vəsaitin təxminən 100 milyon dollardan çoxunu biz altı ayda xarici idarəetmədən almışıq. Baxmayaraq ki, beynəlxalq maliyyə bazarlarında vəziyyət kifayət qədər mürəkkəbdir və faiz dərəcələri aşağıdır. Biz ili 3,2 faiz gəlirlə başa vurmağı düşünürük”. Valyuta ehtiyatlarının idarə olunmasında effektivliyin artırılması üçün təxminən 100 milyon dollardan çoxunun xarici idarəetmədən alınmasına münasibət bildirən Azərbaycan Dövlət İqtisad Universitetinin (UNEC) professoru, iqtisadçı Elşad Məmmədov bildirdi ki, mütəmadi olaraq Mərkəzi Bankı valyuta ehtiyyatlarının artması və azalması barəsində məlumatlar ictimaiyyətə çatdırılır: “Sadəcə, bu bəyanatlarda valyuta ehtiyatlarının artımı və ya azalmasının strukturu barədə rəsmi məlumat yayılmır. Mərkəzi Bank müxtəlif valyutalarda öz ehtiyatlarını saxlaya bilər. Həmin valyutaların məzənnəsinin dəyişməsi Mərkəzi Bankın valyuta ehtiyatlarının həcminin dəyişməsinə səbəb ola bilər”. Həmsöhbətəmiz onu da vurğladı ki, Dövlət Neft Fondu müəyyən transfertlər həyata keçirir. Hansısa mərhələdə Mərkəzi Banka pul köçürə bilər. Bu da bankın aktivlərinə təsir edə bilər. İqtisadçının sözlərinə görə, hazırda devalvasiya təhlükəsi yoxdur. Bu səbəbdən də Mərkəzi Bank dollar kütləsini bazardan yığa bilər: “Məlumat üçün bildirim ki, bu yaxınlarda Mərkəzi Bankın sədri Elman Rüstəmov çıxışı zamanı bildirmişdi ki, Azərbaycanda revalvasiya təzyiqləri var. Yəni manatın ucuzlaşması deyil, möhkəmlənməsi təzyiqi var. Bu səbəbdən də Mərkəzi Bank dolları bazardan yığıb, manat intervensiyasını həyata keçirməyi düşünür. İstənilən halda, həm Mərkəzi Bankın, həm də Neft Fondunun ehtiyatlarının həddən artıq şişirdilməsi iqtisadiyyat üçün məqsədəuyğun hesab oluna bilməz. Pul vəsaitlərinin banklarda deyil, iqtisadiyyatda dövr etməsi milli iqtisadiyyata daha faydalıdır”.
Günel CƏLİLOVA
