Məlum olduğu kimi, iyulun 31-də Azərbaycan Respublikasının Prezidenti İlham Əliyevin yanında sosial-iqtisadi sahə ilə bağlı müşavirə keçirilib. Prezidentin iştirakı ilə keçirilən müşavirədə bir sıra məsələlərə toxunulub. O cümlədən, Azərbaycanın dövlət borcu haqqında da fikir səslənib.
Prezidenr İlham Əliyev qeyd edib ki, büdcə daxilolmaları artır: “Eyni zamanda, valyuta ehtiyatlarımız artır. Valyuta ehtiyatlarımız rekord həddə çatıb – 49 milyard dollar səviyyəsindədir. Bu bizim böyük sərvətimizdir, böyük uğurumuzdur. Bu ilin altı ayında valyuta ehtiyatlarımız 4 milyard dollar artıb. Biz bu vəsaitdən çox qənaətlə istifadə edirik. Məhz buna görə hətta böhranlı illərdə, neftin qiyməti aşağı olan illərdə biz öz valyuta resurslarımızı qorumuşuq və artırmışıq. Məqsəd də məhz belə idi ki, biz ildən-ilə öz valyuta ehtiyatlarımızı artıraq və bununla paralel olaraq, xarici dövlət borcumuzu da kifayət qədər əhəmiyyətli dərəcədə aşağı sala bilmişik. Bir il ərzində xarici borcumuz 4 faiz aşağı düşüb və təxminən 19 faiz səviyyəsindədir. Bu, dünya miqyasında ən gözəl göstəricilərdən biri hesab olunur. Çünki bəzi ölkələrdə dövlət xarici borcu ümumdaxili məhsuldan da artıq olur, yaxud da ki, ona bərabərdir. Bizdə isə bu, 19 faizdir. Biz bu sahədə bundan sonra da çox diqqətli olmalıyıq. Ancaq strateji əhəmiyyət daşıyan layihələrə kreditlərin alınması mümkündür. Çünki bizim öz daxili imkanlarımız var və biz bu imkanlardan istifadə etməliyik”.
Fikrət Yusifov: “Ölkə iqtisadiyyatının inkişafı istiqamətində görülən işlər sayəsində dövlət borcu azalıb”
Ekspertlər bir il ərzində xarici borcun 4 faiz dəyərində aşağı düşməsinin gözlənilən olduğunu deyirlər.
İqtisadçı-ekspert Fikrət Yusifov “Bakı-Xəbər”ə açıqlamasında qeyd etdi ki, adambaşına düşən borca görə Azərbaycan dünya ölkələri arasında yaxşı göstəriciyə malikdir: “Eyni zamanda, Azərbaycanın maddi və maliyyə imkanları ötən illərdən fərqli olaraq inkişaf edib. Sevindirici haldır ki, Azərbaycanın maddi durumu inkişaf edib, pul bazası artıb. Neft Fondunda olan yığımların həcmi yüksəkdir. Bu səbəbdən də borclanmanın aşağı olması gözləniləndir”.
Həmsöhbətimiz hesab edir ki, ölkə iqtisadiyyatının inkişafı istiqamətində görülən işlər sayəsində qeyd olunan sahədə irəliləyişlər əldə olunacaq. Ölkənin dövlət borcu azdırsa və ya yoxdursa, bu normal hal kimi dəyərləndirilməlidir”.
İqtisadçının sözlərinə görə, biznes mühitinin yaxşılaşdırılması istiqamətində çox ciddi addımlar atılıb. Görülən işlər sayəsində Azərbaycanın valyuta ehtiyatları 49 milyard dollara çatıb, xarici borcu 4 faiz aşağı düşüb.
Günel CƏLİLOVA
