Sənayemizin qeyri-neft sektoru rekord addımlarla irəliləyir. Bunu Prezident İlham Əliyev sosial-iqtisadi sahə ilə bağlı keçirilən müşavirədə deyib.
Dövlət başçısı bu ilin altı ayında iqtisadiyyatın, qeyri-neft sektorunun, qeyri-neft sənayesinin və kənd təsərrüfatının artdığını vurğulayıb: “İqtisadiyyatımız bu ilin altı ayında 2,4 faiz, qeyri-neft sektorumuz 3,2 faiz artmışdır. Ən sevindirici göstərici qeyri-neft sənayesindədir. Burada artım 15,7 faizdir. Bu onu göstərir ki, son illərdə sənayeləşmə siyasətimiz gözəl nəticələr verir. Sənayemizin qeyri-neft sektoru rekord addımlarla irəliləyir. Eyni zamanda, kiçik və orta sahibkarlığın inkişafı üçün lazımi addımlar atılır. Beləliklə, altı ayda qeyri-neft sənayemizin 15,7 faiz artımı, əlbəttə ki, çox sevindirici haldır”.
O da məlum olub ki, ticarət dövriyyəsi 20 faizdən çox artıb. Qeyri-neft ixracı 15 faiz artıb. Altı ayda ölkə iqtisadiyyatına 6 milyard dollardan çox sərmayə qoyulduğunu, bunun böyük hissəsinin qeyri-neft sektorunun payına düşdüyünü deyən Prezident İlham Əliyev ilin əvvəlindən böyük sosial paketin təsdiqləndiyini və əhalinin rifahının, yaşayış səviyyəsinin daim diqqət mərkəzində saxlandığını bildirib.
Bütün bu deyilənlərlə yanaşı, qeyri-neft sektorunda istehsalın, ixracın artması Azərbaycan əhalisinin rifahına birbaşa və dolayı necə təsir göstərir?
Ruslan Atakişiyev: “İxrac artdıqca vergi, gömrük daxilolmaları artır və bu zaman sosial ödənişlər yüksəlir”
Sözügedən məsələyə aydınlıq gətirən İqtisadi Resursların Öyrənilməsi Mərkəzinin direktoru Ruslan Atakişiyev bununla bağlı bir sıra məqamlara toxundu: “İstehsal və ixrac artdıqca ölkə ehtiyatlarının həcmi artır. Təsadüfi deyil ki, bu gün valyuta ehtiyatlarımız 49 milyard dollardır. İxrac artdıqca ölkəyə daxil olan xarici valyutanın həcmi yüksəlir. Bu, birinci növbədə, müəssisələrdə çalışan işçilərin rifah halına müsbət təsir göstərir. Hər bir işçi 3-4 nəfərli ailəyə rəhbərlik edir. Bu da çox sayda insanın həmin gəlirdən pay almasına gətirib çıxarır. Ümumiyyətlə, istehsal prosesində gəlirlərin bölgüsü və yenidən bölgüsü prosesinə baxsaq görərik ki, bu kimi artımlar cəmiyyətin rifah halına müsbət təsir edir. Sifarişlər artır və nəticədə daha çox vətəndaş bundan faydalanır. Dolayı təsirlərdən biri budur. Digər tərəfdən, ixrac artdıqca vergi, gömrük daxilolmaları artır və bu zaman sosial ödənişlər yüksəlir. Yəni dövlətdən maliyyələşən büdcə təşkilatları, sosial müavinət alanlar faydalanir. Bu kateqoriyadan olan şəxslərə edilən ödənişlər artır. Ölkədə aparılan islahatlar ona hesablanıb ki, qeyri-neft sektoru daha da inkişaf etsin. Neft sektorunda hansısa azalma olanda bunu kompensasiya etmək mümkün olsun. Hesab edirəm ki, yavaş-yavaş biz buna nail olacağıq”.
Vidadi ORDAHALLI
