“Müasir yanaşma, kənd təsərrüfatının elmi əsaslarla inkişafı məhsuldarlığı böyük dərəcədə artırır və artıracaq”. Bunu Prezident İlham Əliyev iyulun 31-də sosial-iqtisadi sahə ilə bağlı müşavirədə deyib.
Prezident bildirib ki, müxtəlif istiqamətli addımlar kənd təsərrüfatında canlanmaya gətirib çıxarıb: “Kənd təsərrüfatında bu il rekord göstərici əldə edilib. Qeyd etdiyim kimi, bu, aparılan islahatlar nəticəsində mümkün olub. Əlbəttə ki, dövlət dəstəyi, hər zaman olduğu kimi, bu il də göstərilir, bundan sonra da göstəriləcək. Bu istiqamətdə atılan addımlar artıq real nəticələr verir və kənd təsərrüfatı uğurla inkişaf edir. Əsasən bitkiçilik sahəsində, heyvandarlıqda artım təxminən üç faizə yaxındır. Hesab edirəm, bu sahəyə daha da böyük diqqət göstərilməlidir ki, heyvandarlıq da əhəmiyyətli dərəcədə artsın. Məndə olan məlumata görə, taxıl istehsalı 40 faiz artıb. Məhsuldarlıq da kifayət qədər yüksəkdir. Əvvəlki illərlə müqayisədə indi orta məhsuldarlıq 30 sentnerdən çoxdur. Ancaq elə təsərrüfatlar var ki, orada məhsuldarlıq 60 sentnerdir və ondan da çoxdur. Yəni bu onu göstərir ki, müasir yanaşma, kənd təsərrüfatının elmi əsaslarla inkişafı məhsuldarlığı böyük dərəcədə artırır və artıracaq”.
Dövlət başçısı onu da qeyd edib ki, digər məhsulların istehsalı da artıb: “Beləliklə, bostan məhsulları təxminən 40 faiz, meyvə 20 faizdən çox, barama 25 faiz, tərəvəz 14 faiz. Yəni ixracımız da artır və əlbəttə ki, növbəti illərdə biz bu istiqamətdə öz siyasətimizi apararaq özümüzü daha da böyük nəticələrə çatdıracağıq”.
O da məlumdur ki, son illər Azərbaycanda kənd təsərrüfatının inkişafı ilə bağlı bir sıra kompleks işlər görülür. Məqsəd həm daxili tələbatı yerli istehsal hesabına ödəmək, həm də ixracı artırmaqdır. Bütün bu deyilənlərin fonunda, son dövrlər kənd təsərrüfatında elmi yanaşmanın hansı təzahürləri özünü göstərir?
Fuad İbrahimov: “Elmi yanaşmanın nəticəsidir ki, bostan, tərəvəz və digər məhsulların istehsal həcmi ilbəil artır”
Sözügedən məsələyə aydınlıq gətirən iqtisadçı-ekspert Fuad İbrahimov bununla bağlı bir sıra məqamlara toxundu: “Əvvəla kənd təsərrüfatı ilə yanaşı, istənilən sahədə elmi yanaşmaya üstünlük verilməsi effektiv nəticə verir. Çünki kənd təsərrüfatının elmi əsaslarla inkişaf etdirilməsi daha səmərəli nəticələrin əldə olunmasına gətirib çıxarır. Elmi yanaşma olmayanda, o zaman bu sahədə əldə olunan nəticələr aşağı olur. Bu nəinki kənd təsərrüfatına, ümumiyyətlə, makroiqtisadiyyata aiddir. Kənd təsərrüfatı məhsullarının yetişdirilməsində, istehsalında sovet dönəmində Azərbaycanın yetərincə təcrübəsi olub. Müstəqilliyin ilk illərində bu sahədə bir sıra problemlər yarandı. Bu gün ölkə rəhbərliyinin bu məsələyə xüsusi diqqət ayırması onu göstərir ki, Azərbaycanda aqrar məhsulların istehsalı artıq elmi yanaşmaya əsaslanır. Bunun təzahürləri bir neçə formada özünü göstərir. Məsələ ondadır ki, ölkədə aqroparkların sayı artırılır. Hazırda iyirmi iki aqropark faktiki fəaliyyətdədir. Bu ilin sonuna qədər 11 aqroparkın fəaliyyətə başlaması gözlənir. Bununla belə, ölkəyə cins heyvanlar gətirilir. Daha məhsuldar bitki sortları gətirilir ki, bu da məhsuldarlığın həcminin artmasına öz müsbət təsirini göstərir. Məhsuldar barama sortları ölkəyə gətirilir. Elmi yanaşmanın nəticəsidir ki, bostan, tərəvəz və digər məhsulların istehsal həcmi ilbəil artır. Bəzən görürsən ki, kimlərsə bu məsələyə başdansovdu yanaşır. Belə hallar da var. Məsələn, bu günlərdə Rusiyaya ixrac olunan pomidor sərhəddə saxlandı. Məlum oldu ki, sözügedən məhsulun tərkibində qida üçün yararsız maddə var. Elmi yanaşma Azərbaycanda daha çox məhsuldarlıqda özünü göstərir. Elə etməliyik ki, bu, məhsulun keyfiyyətinə də öz müsbət təsirini göstərsin”.
Vidadi ORDAHALLI
