2019-cu ilin yanvar-iyun ayları ərzində Azərbaycandan ixracat 9,98 milyard dollar təşkil edib. İxrac ötən ilin müvafiq dövrünə nisbətən 1,3 milyard dollar və ya 15 faiz artıb.
2018-ci ilin müvafiq dövrü ilə müqayisədə 2019-cu ilin yanvar-iyun ayları ərzində qeyri-neft sektoru üzrə ixrac 127 milyon dollar və ya 15 faiz artıb. Bu ilin ilk yarısında Rusiyaya 355 milyon, Türkiyəyə 213,3 milyon, Gürcüstana 85,4 milyon, İsveçrəyə 73,5 milyon və İtaliyaya 30,5 milyon ABŞ dolları dəyərində qeyri-neft sektoruna aid mal ixrac edilib.
Bütövlükdə, 2019-cu ilin birinci yarımilliyi ərzində meyvə-tərəvəz ixracı 318 milyon 400 min, plastmas və onlardan hazırlanan məmulatların ixracı 103 milyon 300 min, pambıq lifi ixracı 75 milyon 700 min, elektrik enerjisinin ixracı 51 milyon 900 min, alüminium və ondan hazırlanan məmulatların ixracı 46 milyon 700 min, kimya sənayesi məhsullarının ixracı 45 milyon 600 min, qara metallar və onlardan hazırlanan məmulatların ixracı 30 milyon, pambıq ipliyi ixracı 14 milyon 600 min, alkoqollu və alkoqolsuz içkilərin ixracı 15 milyon 500 min dollar təşkil edib. İyun ayında isə qeyri-neft sektoru üzrə ixrac 192 milyon dollar təşkil edib ki, bu da ötən ilin analoji dövrü ilə müqayisədə 13 milyon dollar və ya 7 faiz artım deməkdir.
Görünən odur ki, qeyri-neft ixracında artım tendensiyası ilbəil davam edir. Ümumilikdə, bunu ekspertlər necə dəyərləndirirlər?
Ruslan Atakişiyev: “İxracın səviyyəsi bundan qat-qat çox olmalıdır”
Məsələyə münasibət bildirən İqtisadi Resursların Öyrənilməsi Mərkəzinin direktoru Ruslan Atakişiyev, ümumən, buna müsbət yanaşdı: “2016-cı ildə ölkə iqtisadiyyatının inkişafı ilə bağlı Yol Xəritəsi təsdiq olundu və qeyri-neft sektorunun inkişafı prioritet bir sferaya çevrildi. Bununla bağlı olaraq bir sıra tədbirlər həyata keçirildi. Məlum olduğu kimi, son dövrlər Azərbaycanda istehsal olunan məhsulların dünyada tanıdılması ilə bağlı bir sıra silsilə xarakterli tədbirlər görülür. Öz növbəsində, bu kimi məsələlər qeyri-neft ixracına stimul verir. Bir sıra dünya ölkələrində Azərbaycanın ticarət evləri açılır. Azərbaycan istehsalı olan məhsulların sərgisi keçirilir. Bütün bunlar, istər-istəməz, ixraca müsbət təsir göstərir. Bununla yanaşı, bizim əsas iqtisadi tərəfdaşımız olan Rusiya Federasiyası ilə iqtisadi əlaqələr genişlənir. Azərbaycanın kənd təsərrüfatı məhsulları asan şəkildə Rusiya bazarına ixrac olunur. Əvvəllər sərhəddə bir sıra problemlər yaşanırdısa, artıq bununla bağlı məsələlər yoluna qoyulub. Sözügedən proseslər ixraca müsbət təsir göstərir. Ancaq ümumilikdə götürdükdə Azərbaycanın qeyri-neft sektorunda potensialını nəzərə alsaq, görüləsi işlər çoxdur. İxracın səviyyəsi bundan qat-qat çox olmalıdır”.
Vidadi ORDAHALLI
