Bu ilin yanvar-iyun aylarında Azərbaycana 18.740 ədəd müxtəlif təyinatlı avtomobil idxal olunub. Dövlət Gömrük Komitəsinin məlumatına əsasən, bu, ötən ilin eyni dövrü ilə müqayisədə 95 faiz və yaxud təxminən 2 dəfə çoxdur.
Son bir ildə sürücü daxil olmaqla 10 nəfər və ya daha çox adam daşımaq üçün nəzərdə tutulmuş motorlu nəqliyyat vasitələrinin idxalı 68,3 faiz artaraq 101 ədəd, əsasən adamların daşınması üçün nəzərdə tutulmuş minik avtomobilləri və digər motorlu nəqliyyat vasitələrinin idxalı 2 dəfə artaraq 16.965 ədəd, yük daşımaq üçün motorlu nəqliyyat vasitələrinin idxalı 62,9 faiz artaraq 1.593 ədəd, xüsusi təyinatlı motorlu nəqliyyat vasitələrinin idxalı isə 24,6 faiz artaraq 81 ədəd olub.
O da məlum olub ki, bu ilin 6 ayında Azərbaycan Gürcüstandan 720 ədəd yük maşını idxal edib. Qonşu ölkədən alınan yük maşınlarının ümumi dəyəri 4 mln. 862,5 min dollar təşkil edib.
İllik müqayisədə Azərbaycanın Gürcüstandan idxal etdiyi avtomobillərin sayı 408 ədəd və ya 2,3 dəfə çoxdur. Ötən ilin birinci yarısında Azərbaycan Gürcüstandan 2 mln. 123,3 min dollar dəyərində 312 ədəd yük maşını idxal edib.
Qeyd edək ki, 2014-cü ildən başlayaraq ölkəyə avtomobil idxalı azalırdı. Bu, sonrakı illərdə də özünü göstərdi. Devalvasiyadan sonra isə azalma bir qədər də artdı. Ancaq 2018-ci ildən başlayaraq avtomobil idxalında artım tendensiyası müşahidə olunmağa başladı. Ancaq bu ilin 6 ayında daha çox avtomobilin idxal olunduğu diqqəti çəkir.
Maraqlıdır, avtomobil idxalının 2 dəfə artması nə ilə bağlıdır? Avtomonillərə tələbat və ya əhalinin alıcılıq qabiliyyəti artıb? Yoxsa bunun digər səbəbləri var?
Nüsrət İbrahimov: “... alıcılıq qabiliyyətinin yüksəlməsinə öz təsirini göstərir”
Sözügedən məsələ ilə bağlı fikirlərini “Bakı-Xəbər”lə bölüşən əmlak məsələləri üzrə ekspert Nüsrət İbrahimov avtomobil idxalının artmasını bir sıra amillərlə əlaqələndirdi: “Bunun konkret səbəbini dəqiq demək çətindir. Reallıq ondan ibarətdir ki, əvvəlki illərdə avtomobil idxalının həcmində azalma müşahidə edilirdi. Xüsusən də 2015-2016-cı illərdə avtomobil idxalının azalması daha böyük idi. Bu səbəbdən, bir növ, bazarda avtomobillərlə bağlı bir boşluq yaranmışdı. 2017-ci ildən başlayaraq avtomobil bazarında bir canlanma müşahidə olunmağa başladı. Həmin ilin sonundan başlayaraq bazarda pul kütləsi artmağa başladı. Pul artdıqca, bu, bazarda özünü göstərməyə başladı. Bu tendensiya 2018-ci ildə də davam etdi. 2019-cu ildən başlayaraq avtomobil idxalı bir qədər də artdı. Yəni 2018-ci illə müqayisədə daha sürətlə idxal artmağa başladı. Yəqin bunun səbəbi əhalinin pul gəlirlərinin artmasıdır. Çünki əhalinin pul gəlirləri artanda bu, alıcılıq qabiliyyətinin yüksəlməsinə öz təsirini göstərir. Ancaq, ümumilikdə, bu gün avtomobil bazarında alqı-satqıda elə bir aktivlik hiss olunmur. Hansı ki, ilin əvvəlində aktivlik daha yüksək idi”.
Vidadi ORDAHALLI
