“Western Union" şirkəti Rusiyadan pul köçürmələrini məhdudlaşdırmaq qərarına gəlib. Şirkət Qazaxıstan, Qırğızıstan, Çin və Vyetnam istisna olmaqla, xarici ölkələrə pul köçürmələrinin miqdarını 30 təqvim günü müddətində 600 min rubla qədər məhdudlaşdırıb. Bu barədə "Western Union"un məlumat mərkəzindən informasiya verilib.
Buna qədər aprelin 16-dan etibarən Rusiyadan Qazaxıstan, Qırğızıstan, Çin və Vyetnama göndərilən pul köçürməsinin miqdarı 30 gün ərzində 100 min rubl məbləğində məhdudlaşdırılmışdı. Şirkətdən bu addımın pul vəsaitlərinin qanunsuz məqsədlər üçün istifadəsi risqini minimuma endirmək üçün atıldığı vurğulanıb.
Qeyd edək ki, “Western Union” sistemi dünyada ən iri pulköçürmə sistemi olaraq, bu sahədə liderdir. Bu sistem vasitəsilə istənilən məsafəyə 5 dəqiqə ərzində pul köçürmək mümkündür. “Western Union” ən geniş agent şəbəkəsinə malikdir və 200 ölkədə fəaliyyət göstərir.
Region ölkələrindən, o cümlədən də Azərbaycandan qazanc məqsədilə çoxsaylı vətəndaş Rusiyaya üz tutur. Həmin kateqoriya şəxslər qazanclarının bir hissəsini məhz “Western Union” vasitəsilə ölkəmizə göndərirdilər. Qoyulan məhdudiyyət Rusiyada yaşayan soydaşlarımız və onların buradakı yaxınlarına necə təsir edəcək?
Elşən Əliyev: “Bu olmayacaqsa, başqa alternativlərə müraciət ediləcək”
İqtisadçı Elşən Əliyev “Bakı-Xəbər”ə bildirdi ki, bizim soydaşlarımızın bu məsələdə narahatlığı üçün əsas yoxdur: “Bilirsiniz ki, sürətli pul köçürmələrində “Western Union” liderlik edir. Belə əməliyyatların aparılması həmin şirkətə də qazanc gətirir. Məsələyə bu məntiqlə yanaşılsa, onda şirkət özü könüllü olaraq qazancından imtina etmək istəməz. Deməli, burada başqa səbəblər var ki, həmin şirkət məyyən məhdudiyyətlər tətbiq etməyə vadar olunur. Burada sərt siyasi qərar olsaydı, həmin şirkətin Rusiyadakı fəaliyyətinə birdəfəlik son qoyulardı. Belə deyilsə, deməli, ortada hansısa amillər var ki, onların aradan qaldırılması üzərində iş gedir. Çox güman ki, Rusiya bununla ölkədən pul çıxışını məhdudlaşdırmaq istəyir və bunun iqtisadiyyata müsbət təsirinin olacağını düşünür.
Rəsmi statistikaya nəzər salsaq, Azərbaycana sürətli pul köçürmələri keçən ilin eyni dövrü ilə müqayisədə artıb. Köçürmələrin əhəmiyyətli hissəsi, ənənəvi olaraq, Rusiyadan olunur. Azərbaycanda təcili pul köçürmələri bazarının bir neçə iri oyunçusu var. Agent bankların saylarına görə lider “Western Union” beynəlxalq sistemidir. Sistem fəaliyyətdə olan 24 bankda mövcuddur. İkinci və üçüncü yerləri “Contact” və “Zolotaya Korona” bölüşürlər. Növbəti yerdə operatoru yerli olan “Monex” sistemidir. Göründüyü kimi, ölkəyə əsas pul köçürmələri Rusiyadan edilir, burada da ilk yeri “Western Union” tutur. Bu heç də digərlərindən ucuz tariflə fəaliyyət göstərən şirkət deyil.
Tariflərin strukturuna nəzər salsaq, “Western Union” sistemi üzrə ən yüksək tariflər təqdim olunur. Tarif siyasətinə baxmayaraq, sistemin belə geniş yayılmış olması ilk öncə ən geniş coğrafiyanı əhatə etməsi ilə bağlıdır. Məhz operativlik və etibarlılıq baxımından soydaşlarımız bu sistemə daha çox müraciət ediblər. Ancaq bu olmayacaqsa, başqa alternativlərə müraciət ediləcək. Yəni burada heç bir faciə axtarmaq lazım deyil. İndi elə dövrdür ki, pulun ölkədən-ölkəyə göndərilməsinin müxtəlif variantları var. Hətta bu imkanlar olduğu halda, “qara bazar” qaydaları ilə pul köçürmələrindən istifadə edilir. Bütün hallarda, müəyyən çətinliklər törədiləcək. Yəni insanlar pul göndərmək üçün müxtəlif üsullar axtarmaq məcburiyyətində qalacaqlar”.
Məhəmmədəli QƏRİBLİ
