16/12/2019 04:45
728 x 90

6 ayda Azərbaycanda xarici kapitalla minə yaxın şirkət – “xarici kapital qaçır” deyənlər hardadır?

“Məsələnin ən yaxşı tərəflərindən biri də ondan ibarətdir ki, xarici kapitalın iştirakı ilə yatırımlar ilk növbədə qeyri-neft sektoruna yönəldilir”

img

Bir ara bəzi müxalif mövqedən çıxış edən mətbuat orqanları iddia edirdilər ki, guya xarici şirkətlər Azərbaycanı tərk etməyə başlayıb. Xüsusən də ölkənin qeyri-neft sektoruna sərmayə qoymaqda maraqlı deyillər. Ancaq bu ilin 6 ayında açıqlanan statistik rəqəmlər bütün bu deyilənləri alt-üst etdi.

Belə ki, bu il xarici kapitalın iştirakı ilə Azərbaycanda mindən çox şirkət, o cümlədən, 144 birgə müəssisə yaradılıb. Dövlət Statistika Komitəsinin məlumatına görə, 2018-ci ilin birinci yarısına nisbətən xarici kapitallı şirkətlərin sayı 49 faiz artıb. Eyni zamanda, bu ilin iyul ayının əvvəlində ölkədə 100 faiz xarici kapitallı 9161 şirkət və 2 651 birgə şirkət qeydiyyatdan keçib. Altı ayda 39 xarici şirkət fəaliyyətini dayandırıb.

Görünən odur ki, xarici investisiyaların ölkə iqtisadiyyatına cəlb edilməsi Azərbaycan dövlətinin müəyyən etdiyi iqtisadi inkişaf strategiyasının mühüm tərkib hissəsidir. Son dövrlər ölkədəki siyasi sabitlik və iqtisadi inkişaf xarici dövlətlərin Azərbaycan iqtisadiyyatına uzunmüddətli sərmayə qoymaq üçün marağını daha da artırıb. Məsələ ondadır ki, indiyə qədər Azərbaycanda investorların hüquq və mənafelərinin qorunması, mülkiyyətin toxunulmazlığı, yerli və xarici sahibkarlara eyni iş şəraitinin yaradılması, əldə edilmiş mənfəətdən maneəsiz istifadə olunması ilə bağlı mühüm qanunlar qəbul edilərək hüquqi baza yaradılıb. Bütün bunların nəticəsidir ki, bu ilin 6 ayında xarici kapitalın iştirakı ilə Azərbaycanda mindən çox şirkət, 144 birgə müəssisə yaradılıb.

O baxımdan yaranan bu cür müsbət dinamikanı ekspertlər necə dəyərləndirirlər?

  • Fikrət Yusifov: “Aparılan islahatlar real sektorda daha münbit bir atmosfer yaradıb”

Məsələyə münasibət bildirən iqtisad elmləri doktoru Fikrət Yusifovun sözlərinə görə, bütün bunlar onu göstərir ki, Azərbaycan iqtisadiyyatına xarici kapitalın marağı artıb: “Nəticələr bunu deməyə tam əsas verir. Məsələ ondadır ki, bu ilin 6 ayının nəticələri pozitivdir. O cümlədən, qeyri-neft sektorunda pozitiv nəticələr əldə olunub. Bunda xarici kapitalın da öz payı var. Reallıq onu göstərir ki, Azərbaycan iqtisadiyyatına kapital axını var. Ölkəyə xaricdən gələn kapitalın həcmi ilbəil artır. Bunun həcmi digər qonşu ölkələrlə müqayisədə qat-qat böyükdür. Məsələnin ən yaxşı tərəflərindən biri də ondan ibarətdir ki, xarici kapitalın iştirakı ilə yatırımlar ilk növbədə qeyri-neft sektoruna yönəldilir. Deməyim odur ki, qeyr-neft sektoruna marağın artması bu sahədə son illər aparılan islahatların nəticəsidir. Aparılan islahatlar real sektorda daha münbit bir atmosfer yaradıb. Bu da təbii ki, xarici kapitalın iştirakı ilə müəssisələrin açılmasına stimul verir. Xarici sərmayədarlar Azərbaycanın qeyri-neft sektorunda bundan sonra da çoxsaylı layihə həyata keçirib investisiyalar qoymaqda maraqlı olacaqlar”.

Vidadi ORDAHALLI

Son xəbərlər