İlkin məlumatlara görə, 2019-cu ilin yanvar-iyun aylarında ölkə əhalisinin nominal gəlirləri əvvəlki ilin eyni dövrünə nisbətən 6,6 faiz artaraq 27 355,8 milyon manat təşkil edib.
Əhalinin hər nəfərinə orta hesabla 2768,6 manatlıq gəlir düşüb.
Bütün icbari və könüllü ödənişlər edildikdən sonra əhalinin sərəncamında 25 131,5 milyon manatlıq və ya əvvəlki ilin eyni dövrünə nisbətən 6,7 faiz çox vəsait qalıb.
2019-cu ilin yanvar-may aylarında ölkə iqtisadiyyatında muzdla çalışan işçilərin orta aylıq nominal əməkhaqqı 2018-ci ilin müvafiq dövrünə nisbətən 7,9 faiz artaraq 583,7 manat təşkil edib.
Əməkhaqqı neft sektorunda 3168,5 manat, qeyri neft-qaz sektorunda 524,7 manat təşkil edib. Dövlət müəssisələrində çalışan işçilərin əməkhaqları 471,9 manat, özəl müəssisələrdə isə 730,3 manat olub. Mədənçıxarma sənayesi, maliyyə və sığorta fəaliyyəti, peşə, elmi-texniki fəaliyyət, informasiya və rabitə, nəqliyyat və anbar təsərrüfatı, eləcə də tikinti sahələrində orta aylıq nominal əməkhaqqı ölkə üzrə orta göstəricidən yüksək olub.
Bütün bunların fonunda ölkə əhalisinin nominal gəlirlərinin əvvəlki ilin eyni dövrünə nisbətən 6,6 faiz artması nəyin göstəricisidir və ekspertlər bunu necə dəyərləndirirlər?
Fikrət Yusifov: “Digər tərəfdən, iqtisadiyyatda, o cümlədən, qeyri-neft sektorunda müəyyən artımlar müşahidə olunur”
Sözügedən məsələni “Bakı-Xəbər”ə şərh edən iqtisad elmləri doktoru Fikrət Yusifov əhalinin nominal gəlirlərinin artmasını bir sıra amillərlə əlaqələndirdi: “Bu il ərzində ölkədə əməkhaqlarının artırılması ilə bağlı bir sıra addımlar atıldı. Artımlar ilk növbədə bununla bağlıdır. Digər tərəfdən, iqtisadiyyatda, o cümlədən, qeyri-neft sektorunda müəyyən artımlar müşahidə olunur. Bütövlükdə, iqtisadiyyatda gedən artım prosesləri və əməkhaqlarının, pensiyaların artırılması bunlarla bilavasitə bağlıdır. Yəni bu yöndə verilmiş qərarlarla bilavasitə bağlıdır. Onu da nəzərə almaq lazımdır ki, Prezident İlham Əliyev sentyabrın 1-dən əməkhaqqının artırılması ilə bağlı qərar qəbul edib. İlin yekununda əhalinin nominal gəlirləri daha da artacaq. Bütün bunlar ölkədəki iqtisadi inkişafdan xəbər verir. Ona görə də əhalinin nominal gəlirlərinin artmasına müsbət baxıram”.
Vidadi ORDAHALLI
