23/08/2019 22:40
728 x 90

Cəmi 5 ayda Azərbaycanın xarici ticarəti 14 milyard dolları keçdi – müsbət saldo 2,4 milyard...

“İqtisadi inkişaf ticarət dövriyyəsində müsbət saldo ilə müşayiət olunur”

img

Bu ilin yanvar-may aylarında ölkənin xarici ticarət dövriyyəsi 14 milyard 74,2 milyon dollar, o cümlədən, ixracın dəyəri 8 milyard 240 milyon dollar, idxalın dəyəri 5 milyard 834,2 milyon dollar təşkil edib. Nəticədə 2 milyard 405,8 milyon dollarlıq müsbət ticarət saldosu yaranıb.

Dövlət Statistika Komitəsindən verilən məlumata görə, ötən ilin eyni ayları ilə müqayisədə xarici ticarət dövriyyəsi faktiki qiymətlərlə 16,5 faiz, o cümlədən, idxal 51,3 faiz, ixrac 0,1 faiz artıb. Real ifadədə isə dövriyyə 6,8 faiz, o cümlədən, idxal 20,4 faiz, ixrac 0,4 faiz çoxalıb.

O da məlum olub ki, ixracın 29,7 faizini İtaliyaya, 11,4 faizini Türkiyəyə, 7 faizini Çinə, 5,6 faizini Hindistana, 5,5 faizini Almaniyaya, 5,2 faizini İsrailə, 5 faizini İspaniyaya, 3,9 faizini Çexiyaya, 3,4 faizini Gürcüstana, 3,2 faizini Rusiyaya, 3 faizini Fransaya, 2,5 faizini Portuqaliyaya, 14,6 faizini isə digər ölkələrə göndərilmiş məhsulların dəyəri təşkil edib.

Ölkəmizə idxal olunmuş məhsulların ümumi dəyərinin 14,2 faizi İsveçrə, 14 faizi Rusiya, 9,7 faizi Türkiyə, 8,3 faizi Çin, 6,6 faizi ABŞ, 4,8 faizi Almaniya, 4,6 faizi İran, 3,6 faizi Kanada, 3,5 faizi Avstraliya, 3,1 faizi Ukrayna, 2,7 faizi İtaliya, 2,1 faizi Fransa, 2 faizi Qazaxıstan, 20,8 faizi isə digər ölkələrlə aparılmış idxal əməliyyatlarının payına düşüb.

Görünən odur ki, təkcə bu ilin 5 ayında müsbət saldo əhəmiyyətli dərəcədə artıb. Növbəti aylarda artım daha böyük olacaq. Ümumilikdə, ticarət dövriyyəsindəki bu göstəricini ekspertlər necə dəyərləndirirlər?

  • Aydın Hüseynov: “Bu həm də onu göstərir ki, getdikcə iqtisadiyyatda qeyri-neft sektorunun ümumdaxili məhsulda çəkisi artır”

Məsələyə münasibət bildirən millət vəkili Aydın Hüseynovun sözlərinə görə, qeydə alınan artım Azərbaycan iqtisadiyyatının dinamik inkişafından xəbər verir: “İqtisadi inkişaf ticarət dövriyyəsində müsbət saldo ilə müşayiət olunur. Bu isə birinci növbədə ölkədəki iqtisadi inkişafla və ən başlıcası, ixracın artması ilə əlaqədardır. Bu onu göstərir ki, müsbət saldo qeydə alınıbsa, deməli, bu, valyuta ehtiyatlarına da yaxşı təsir göstərir. Qeydə alınan bu göstəricilər ölkədə iqtisadi inkişaf üçün çox mühüm amillərdən biridir. Başqa bir tərəfdən bu onu göstərir ki, artıq Azərbaycan getdikcə cari tələbatın ödənilməsi istiqamətində çox böyük addımlar atır. Artıq biz dünya bazarında daha çox məhsulla iştirak edirik. Daha çox ixracyönümlü, rəqabətqabiliyyətli məhsullar təklif edirik. Bu isə ölkədə həyata keçirilən iqtisadi strategiyanın çox düzgün şəkildə həyata keçirilməsini göstərir. Getdikcə ölkədə qeyri-neft sektoru inkişaf edir. Nəticədə iqtisadiyyatda belə önəmli nəticələr qeydə alınır. Bu həm də onu göstərir ki, getdikcə iqtisadiyyatda qeyri-neft sektorunun ümumdaxili məhsulda çəkisi artır. Bu isə Prezident İlham Əliyevin müəyyən etdiyi iqtisadi strategiyanın uğurla həyata keçirilməsinin bir nümunəsidir”.

Vidadi ORDAHALLI

Son xəbərlər