Məlum olduğu kimi, Prezident İlham Əliyev “Azərbaycan Respublikasının Əmək və Əhalinin Sosial Müdafiəsi Nazirliyinin tabeliyində “Əmək Bazarı və Sosial Müdafiə Məsələləri üzrə Milli Observatoriya”nın yaradılması haqqında” Fərman imzalayıb.
Fərmana əsasən, Əmək və Əhalinin Sosial Müdafiəsi Nazirliyinin tabeliyində iki ay müddətində əmək bazarı və sosial müdafiə sahələrində mövcud vəziyyətin qiymətləndirilməsini, inkişaf meyllərinin öyrənilməsini və monitorinqləri həyata keçirən, bu sahələrdə səmərəli idarəetmə qərarlarının qəbul edilməsi məqsədilə təhlil və proqnozlar hazırlayan, publik hüquqi şəxs statuslu Əmək Bazarı və Sosial Müdafiə Məsələləri üzrə Milli Observatoriya yaradılacaq.
Maraqlıdır, yeni yaradılan qurumun mahiyyəti nədən ibarət olacaq? Ekspertlər bunu necə dəyərləndirirlər?
Musa Quliyev: “Bunu öyrənməkdən ötrü elmi-tədqiqat xarakterli publik hüquqi şəxsin yaradılmasına ehtiyac vardı”
Sözügedən məsələnin mahiyyətini şərh edən millət vəkili Musa Quliyevin fikrincə, Strateji Yol Xəritəsində nəzərdə tutulan məsələlərdən biri də sosial müdafiə və əmək bazarının öyrənilməsi və gələcək perspektivlərinin müəyyənləşdirilməsidir: “Əmək Bazarı və Sosial Müdafiə Məsələləri üzrə Milli Observatoriyanın yaradılması vacibdir. Ona görə də Prezident İlham Əliyevin bununla bağlı fərmanını müsbət qiymətləndirirəm. Qarşıda duran əsas məsələlərdən biri də işsizlik və məşğulluq məsələlərinin həlli ilə bağlıdır. Bütün dünyada bu məsələ problem olaraq qalır. Dünya əhalisi artır, yeni iş yerlərinin yaradılması imkanları məhdudlaşır. Müasir texnologiyaların tətbiqi işçi qüvvəsinə tələbatı azaldır, yəni ixtisarlar baş verir. Belə bir şəraitdə elə optimal variant seçmək lazımdır ki, həm insanlar işlə təmin edilsin, həm də iqtisadiyyat inkişaf etsin. Nəzərə almaq lazımdır ki, Azərbaycan əhalisi ildə 100-110 min nəfər artır. Əmək bazarında ildə ən azı 100 min yeni iş yeri yaradılmalıdır. Burada bağlanan iş yerlərini də nəzərə almaq lazımdır. Planlaşdırılan iş yerləri hansı istiqamət üzrə, harada açılmalıdır? Bunu öyrənməkdən ötrü elmi-tədqiqat xarakterli publik hüquqi şəxsin yaradılmasına ehtiyac vardı. Sosial müdafiə çoxşaxəli siyasi platformadır. Burada öncədən proqnozlaşdırma, aparıcı sahədə trendlərin müəyyənləşdirilməsi və tətbiq edilməsi çox vacibdir. Ölkədə bununla bağlı proqnozlaşdırma vacibdir. Məsələn, Azərbaycanda 5 ildən sonra pensiyaçıların, işsizlərin və s. sayının nə qədər olacağı müəyyən edilməlidir. Sosial müdafiə stategiyasını buna uyğun qurmaq lazımdır. Əmək Bazarı və Sosial Müdafiə Məsələləri üzrə Milli Observatoriyanın yaradılması çox vacib idi. Düşünürəm ki, bu həm iqtisadiyyata, həm də sosial müdafiə siyasətinə çox böyük töhfələr verəcək”.
Vidadi ORDAHALLI
