Xəbər verildiyi kimi, Prezident İlham Əliyev aqrar sahədə yeni subsidiya mexanizminin yaradılması haqqında fərman imzalayıb. Bu fərmanla təsdiq edilmiş “Kənd təsərrüfatı məhsulları istehsalının subsidiyalaşdırılması Qaydası”na əsasən, bitkiçilik sahəsində subsidiyaların hesablanmasında istifadə olunan baza məbləği 200 manat müəyyən edilir.
Qeyd edək ki, aqrar sahədə yeni subsidiya mexanizmi yaradılır.Yeni mexanizm subsidiyaların ödənilməsi ilə bağlı müxtəlif yenilikləri özündə ehtiva edir. İlk növbədə fermerlər subsidiya almaq üçün elektron kənd təsərrüfatı informasiya sistemində qeydiyyatdan keçməlidirlər.
Yeni qaydalarla subsidiyalarin tətbiqi ilə bağlı qərarları qəbul edən şura yaradılacaq. Subsidiya verilərkən baza əmsal tətbiq ediləcək. Subsidiyalar verilərkən hansı bitkinin hansı zonada yetişdirilməsi nəzərə alınacaq.
Ən maraqlı yeniliklərdən biri kooperativlərə görə veriləcək subsidiyalarla bağlıdır. Bu isə kiçik pay torpaqlarına malik fermerləri öz sahələrini birləşdirməyə sövq edəcək.
Heyvandarlıqla məşğul olanlar üçün nəzərdə tutulan subsidiya mexanizmlərində dəyişiklik ondan ibarətdir ki, həmin fermerlərdə ödəniş almaq üçün elektron sistemdə qeydiyyatdan keçməlidirlər. Həmçinin, keyfiyyətsiz toxum alan sahibkarlara subsidiya verilməməsi də fərmanda qeyd olunub.
Qadir Bayramlı: “Kənd təsərrüfatının inkişafı üçün fermerlərə subsidiyalar verilməsinin təkmilləşdirilməsinə ehtiyac var”
Aqrar sektorun inkişafı ilə bağlı imzalanan fərmanı şərh edən Azərbaycan Dövlət İqtisad Universitetinin (UNEC) dosenti Qadir Bayramlı “Bakı-Xəbər”ə açıqlamasında qeyd etdi ki, subsidiyaların verilməsi ilə bağlı bir sıra problemlər yaşanır: “Subsidiyalar verilməzdən öncə kənd təsərrüfatında kiçik və orta sahibkarların mənfəəti nəzərə alınmalıdır. Çünki ən çox ehtiyacı olan və maddi cəhətdən durumu zəif olanlar məhz bu şəxslərdir. İkincisi, subsidiyalar verilərkən şəffaflığa nəzarət olunmalıdır”.
Həmsöhbətimiz onu da vurğuladı ki, bu gün aqrar sektorun zəif sahələrindən biri keyfiyyətsiz toxum məsələsidir. Sahibkarların nəinki keyfiyyətsiz toxum alması, ümumiyyətlə, keyfiyyəti olmayan toxumun əkilməsinin qarşısı alınmalıdır. Nəzərə almaq lazımdır ki, keyfiyyətsiz toxum əkiləndə məhsuldarlıq 30 faiz aşağı olur. Çalışmaq lazımdır ki, fermerlər keyfiyyətli toxumla təmin olunsunlar. Fermerlərin keyfiyyətli toxumla təmin olunması üçün dövlətin dəstəyi göstərilməlidir”.
Ekspertin sözlərinə görə, kənd təsərrüfatının inkişafı üçün fermerlərə subsidiyalar verilməsinin təkmilləşdirilməsinə ehtiyac var. Bu sahədə yaşanan problemlər həll olunarsa, aqrar sektorda qeydə alınan problemlər öz həllini tapar.
Günel CƏLİLOVA
