İqtisadi və sosial məsələlərlə bağlı hələ bu il fevralın 25-də keçirilən müşavirədə Prezident İlham Əliyev 2019-cu ilin sosial inkişaf və əhalinin sosial müdafiəsi baxımından başqa illərdən fərqlənən il olacağını bildirmişdi. "Biz əlavə gəlirləri ilk növbədə vətəndaşların sosial müdafiəsinə yönəltməliyik”. Belə də oldu. Bir sıra artımlara qərar verildi.
Bütün bunlarla yanaşı, dövlət başçısının iyunun 18-də imzaladığı 17 sərəncamla ilin əvvəlindən start götürən sosial islahatların ikinci mərhələsi başladı. Bu mərhələdə minimum aylıq əməkhaqqı 180 manatdan 250 manata çatdırılacaq, hərbi və hüquq-mühafizə orqanlarının xüsusi rütbəli əməkdaşlarının və dövlət büdcəsindən maliyyələşən bir sıra digər təşkilatlarda çalışan şəxslərin aylıq vəzifə maaşları artırılacaq. Artımlar, ümumilikdə, 20-50 faiz təşkil edəcək.
Belə ki, orta aylıq əməkhaqqı artımı ilə bağlı proqnoz bu il üçün 15 faizdir. Buna uyğun olaraq 2020-ci ilin 1 yanvar tarixindən bütün pensiyaçıların pensiyası indeksasiya nəticəsində əlavə 15 faiz artacaq. Beləliklə, hazırda 160 manat alan pensiyaçı oktyabrdan 200 manat, yanvardan isə 230 manat pensiya alacaq.
Bütün bu artımlar ölkədə müxtəlif sahələrin inkişafına təsir göstərir. Onlardan biri də kiçik və orta sahibkarlıqdır. Məsələ ondadır ki, sözügedən artımlar əhalinin alıcılıq qabiliyyətini və bu da tələbatı artırır. Tələb artığına görə sahibkarın daha çox məhsul istehsal etməsinə, əhaliyə göstərilən xidmətin həcminin genişlənməsinə iqtisadi zəmin yaranır. Bütün bunlar, əlbəttə ki, kiçik və orta sahibkarlığın inkişafına stimul verir.
Maraqlıdır, bəs ekspertlər sosial paketin bu yöndə faydasını necə dəyərləndirirlər?
Əli Əlirzayev: “Tələbat yarandığı üçün, sahibkarlar daha çox məhsul istehsal edərək bazara çıxarmaqda maraqlı olacaqlar”
Sözügedən məsələni dəyərləndirən iqtisadçı-alim Əli Əlirzayevin sözlərinə görə, məlum artımlar bu və ya digər dərəcədə kiçik və orta biznesin inkişafına müsbət təsir edəcək: “Məsələ ondadır ki, 2019-cu ilin əvvəlindən əməkhaqları, pensiyalar, təqaüdlər artırılıb. Bunun nəticəsində əhalinin gəlirləri artır. İyunun 18-də Prezidentin imzaladığı sərəncamla müəllimlərin, hərbçilərin, dövlət büdcəsindən maliyyələşən bəzi təşkilatlarda çalışanların əməkhaqları artırılıb. Bu məqsədlə büdcədən illik əlavə 1 milyard manat xərclənəcək. Şübhəsiz ki, bütün bunlar birbaşa və dolayı olaraq sahibkarlığın inkişafına müsbət təsir edəcək. Tələbat yarandığı üçün, sahibkarlar daha çox məhsul istehsal edərək bazara çıxarmaqda maraqlı olacaqlar. Eyni zamanda, buna görə yeni iş yerləri yaratmalı olacaqlar. Deməyim odur ki, bütün bunlar bir-birilə sıx əlaqəlidir. O üzdən, hesab edirəm ki, ölkə əhalisinin gəlirlərinin artması kiçik və orta sahibkarlığın inkişafına stimul verir. Bu baxımdan artımların bu yöndə müsbət təsirləri olacaq”.
Vidadi ORDAHALLI
