Məlum olduğu kimi, Azərbaycan Respublikası Dövlət Neft Şirkətinin (SOCAR) prezidenti Rövnəq Abdullayev Ukrayna Milli İnvestisiya Şurasının üzvü seçilib. Ukrayna Prezidenti Vladimir Zelenski bununla bağlı müvafiq fərman imzalayıb. Ukrayna Prezidentinin fərmanına əsasən, şuraya onunla birlikdə 29 nəfər daxil olub. Onlardan 10 nəfəri Ukrayna hökumətinin nümayəndələridir. Qalan 19 nəfər isə beynəlxalq şirkətlərin və maliyyə təşkilatlarının rəhbərləridir.
Şuraya Ukrayna Prezidentinin özü rəhbərlik edəcək. “Xalqın xidmətçisi” partiyasından deputatlığa namizəd, beynəlxalq “Template Monster” IT şirkətinin həmtəsisçisi David Araxamiya Şuranın katibi təyin edilib. İnvestisiya Şurasına Prezident Administrasiyası rəhbərinin müavinləri Aleksey Qonçaruk və Vadim Pristayko, Prezidentin köməkçisi Andrey Yermak və müşaviri Oleq Ustenko daxil olublar.
Razılıq əsasında Şuraya Ukrayna və xarici təşkilatların, işgüzar dairələrin nümayəndələri, sərmayələrin cəlb edilməsi, sahibkarlığın inkişafı məsələləri üzrə ekspertlər, iqtisadiyyat və maliyyə sahəsində mütəxəssislər daxildirlər.
Məsələn, Şuraya “Sumitomo Soqr” şirkətlər qrupunun baş direktoru Kuniharu Nakamura və “Marubeni Corporation” Direktorlar Şurasının sədri Fumiya Kokubu (hər ikisi Yaponiya), “Posco Daewoo Corporation”ın baş direktoru Kim Yanq-Sanq (Koreya), “DP World” şirkətlər qrupunun baş direktoru Sultan Əhməd bin Sulayem (BƏƏ), “Turkcell İletişim Hizmetleri A.Ş.”-nin İdarə Heyətinin sədri Əhməd Akça (Türkiyə) və SOCAR-ın prezidenti Rövnəq Abdullayev daxil olublar.
SOCAR prezidenti Rövnəq Abdullayevin Ukrayna Milli İnvestisiya Şurasının üzvü seçilməsinin ümumən Azərbaycana nə faydası olacaq?
Əli Əlirzayev: “Ölkəmizin əldə etdiyi təcrübədən faydalanacaqlar”
Məsələyə münasibət bildirən iqtisadçı-alim Əli Əlirzayev buna bir neçə aspektdən yanaşdı: “Məsələ ondadır ki, bu, idarəetmənin bir formasıdır. Elə layihələr var ki, onlar beynəlxalq səviyyəli layihələrdir. Həmin layihələrdə başqa ölkələrin imkanlarından, resurslarından, təcrübəsindən istifadə etmək olar. Azərbaycanla Ukrayna bir-birilə qarşılıqlı iqtisadi əlaqədə olan və yaxşı münasibətlərə malik ölkələrdir. Ukraynanın inkişafı ilə bağlı bir sıra qərarlar qəbul edəndə Azərbaycanın da mövqeyini nəzərə alacaqlar. Ölkəmizin əldə etdiyi təcrübədən faydalanacaqlar. Bunun özü mühüm hadisədir. Ukrayna Milli İnvestisiya Şurasında Cənubi Koreyanın, Türkiyənin, Birləşmiş Ərəb Əmirliklərinin nümayəndələri təmsil olunurlar. Əlbəttə ki, Azərbaycan adından SOCAR prezidentinin orada olması müsbət haldır. Bu, Azərbaycanın beynəlxalq imicinə müsbət təsir edən hadisədir. O baxımdan buna müsbət yanaşıram. Hesab edirəm ki, bütün mənalarda ölkəmiz üçün faydalı olacaq”.
Vidadi ORDAHALLI
