“Azərbaycan bilavasitə bu forumun nəticəsi olaraq Dövlət Xidmətlərinin Təchizi üzrə Müəssisələrin ASAN Assosiasiyasının yaradılması təşəbbüsünü irəli sürmüşdür. Ümid edirəm ki, bu yeni assosiasiya dövlət xidmətlərinin səmərəli təchizi üçün ekspertlər arasında dialoqu təşviq etmək məqsədi daşıyan əhəmiyyətli beynəlxalq bir alətə çevriləcək. Bu, sözügedən sahədə bütün mövcud yaxşı təcrübələrdən istifadə etmək istəyində olanlara yardım edə bilər”. Bunu Bakıda BMT-nin Dövlət Xidmətləri Forumunun açılışında çıxış edən Birinci vitse-prezident Mehriban Əliyeva deyib.
Ölkənin Birinci vitse-prezidenti vurğulayıb ki, bu ilin əvvəlində birinci bənzər mərkəz Kabildə açılıb və Əfqanıstandan olan 100-dən çox ekspertə ASAN tərəfindən təlim keçirilib. O, yaxşı təcrübələrimizi başqa ölkələrlə paylaşmağı davam etdirməyə hazır olduğumuzu bildirib. Bu günədək ASAN-la müxtəlif ölkələr və beynəlxalq təşkilatlar arasında 10 anlaşma memorandumunun imzalandığını vurğulayıb. M.Əliyeva onu da qeyd edib ki, biz bununla kifayətlənmirik və dövlət xidmətlərinin keyfiyyətini təkmilləşdirməyə davam edirik.
Bütün bu deyilənlərin fonunda Azərbaycanın ASAN Assosiasiyasının yaradılması təşəbbüsü ilə çıxış etməsi ölkəmizə nə verər? Bunun əhəmiyyətini ekspertlər necə dəyərləndirirlər?
Məhərrəm Zülfüqarlı: “Sözügedən təşəbbüsün ortaya qoyulması ölkənin beynəlxalq imicinin daha da yüksəlməsinə xidmət edəcək”
Məsələyə münasibət bildirən İctimai Problemlərin Tədqiqi Assosiasiyasının rəhbəri Məhərrəm Zülfüqarlının sözlərinə görə, Azərbaycanın sözügedən təşəbbüslə çıxış etməsi ölkəyə bir sıra üstünlüklər vəd edir: “Reallıq ondan ibarətdir ki, “ASAN xidmət” brendi çox böyük üstünlüklərə malikdir. Əhalinin böyük hissəsi bundan razıdır. Hətta müxalifət liderləri də bu xidmət barədə müsbət danışırlar. Bununla belə, bir sıra dünya dövlətləri də buna maraq göstərir və öyrənmək istəyirlər. Yəni beynəlxalq aləmdə “ASAN xidmət”in müsbət imicinin formalaşması Azərbaycanın xeyrinədir. BMT-nin sözügedən tədbirinin ölkəmizdə keçirilməsi müsbət haldır. Azərbaycan dövlətçiliyi üçün bu cür xidmətlərin sayını artırmaq lazımdır. Hesab edirəm ki, ASAN Assosiasiyasının yaradılması bir sıra ölkələrin bu təcrübədən yararlanmasına kömək edəcək. Tək keçmiş sovet məkanı yox, hətta inkişaf etmiş ölkələr də “ASAN xidmət”in təcrübəsindən bəhrələnirlər. Çünki bu, Azərbaycan brendidir. Sözügedən təşəbbüsün ortaya qoyulması Azərbaycanın beynəlxalq imicinin daha da yüksəlməsinə xidmət edəcək. Ona görə də hörmətli Mehriban xanımın bu təşəbbüslə çıxış etməsini alqışlayıram. Fikrimcə, bu, ölkəmiz üçün, xüsusən də Azərbaycanın beynəlxalq imici üçün faydalı olacaq”.
Vidadi ORDAHALLI
