“Azərbaycan minimal pensiya baxımından MDB ölkələri arasında ikinci yeri tutur”. Bunu Azərbaycanın əmək və əhalinin sosial müdafiəsi naziri Sahil Babayev BMT-nin Dövlət Xidmətləri Forumunda deyib. Nazir qeyd edib ki, Azərbaycan minimal pensiya baxımından MDB ölkələri arasında ikinci yeri tutur.
Ölkə başçısı "Əmək pensiyaları haqqında” Qanuna dəyişikliklər edilməsi ilə bağlı təşəbbüslə çıxış edib.
Məlumat üçün bildirək ki, bu ilin mart ayından etibarən ölkədə minimum pensiya məbləği 160 manat müəyyən olunub. Yaxın müddət ərzində minimum pensiya məbləğinin artırılması gözlənir.
Əmək və Əhalinin Sosial Müdafiəsi Nazirliyinin yaydığı xəbərdə qeyd olunur ki, ölkə başçısının həyata keçirdiyi sosial paketin bir hissəsi kimi, ölkə üzrə minimum əmək pensiyalarının məbləği 160 manatdan 200 manata çatdırılacaq: "Bu artım 25%-lik artım təşkil edəcək və 700 minə yaxın pensiyaçımızın sosial rifahının yaxşılaşdırılmasına dəstək olacaq. Azərbaycanda minimum pensiyanın məbləği bu il oktyabrın 1-dən artırılacaq".
Pərviz Heydərov: “Minimum pensiya məbləği növbəti dəfə artırılan zaman daha çox vətəndaşı əhatə etməsi nəticəsində Azərbaycan MDB məkanında öncül yeri təmin etmiş və qorumuş olacaq”
Azərbaycanda minimum pensiya məbləğinin MDB-də ikinci yer tutmasına münasibət bildirən iqtisadçı-ekspert Pərviz Heydərov “Bakı-Xəbər”ə açıqlamasında qeyd etdi ki, minimum pensiya məbləği cari ilin mart ayından etibarən 160 manata çatdırılıb: “Bununla da minimal pensiya məbləği ciddi şəkildə artırılmış oldu. Bu addımın atılması ilə Azərbaycan minimum pensiya məbləğinin səviyyəsinə görə MDB məkanında yüksək göstərici ilə seçildi. Bu artım ölkə başçısının il ərzində həyata keçirdiyi sosial paketin tərkib hissəsi idi. Bu artım 233 min nəfəri əhatə etdi. İyunun 18-də isə Prezident İlham Əliyev yenidən minimum əməkhaqqını artırdı. Məlum qərardan sonra minimum əməkhaqqı 250 manata yüksəldi. Minimum əməkhaqqının artırılmasına paralel olaraq minimum pensiya məbləği artırılaraq 200 manata çatacaq. Bu isə o deməkdir ki, 200 mindən çox vətəndaşın pensiya məbləği ciddi şəkildə artırılacaq”.
Həmsöhbətimiz onu da vurğuladı ki, minimum pensiya məbləği növbəti dəfə artırılan zaman daha çox vətəndaşı əhatə edəcək. Bununla Azərbaycan MDB məkanında öncül yeri təmin etmiş və qorumuş olacaq.
Günel CƏLİLOVA
