Prezident İlham Əliyevin əhalinin sosial müdafiəsinin gücləndirilməsi ilə əlaqədar imzaladığı sərəncamlar ölkə vətəndaşlarının maddi vəziyyətinin yaxşılaşdırılması üçün atılan çox mühüm addımdır. Məsələ ondadır ki, sosial islahatlar paketi cari ildə əhalinin sosial müdafiəsinin gücləndirilməsində mühüm rol oynayacaq.
Bu il martın 1-dən həm minimum pensiyalar, həm də minimum əməkhaqqının məbləği orta hesabla 40 faiz artırılıb. Aparılan islahatlar nəticəsində tətbiq edilən artımlar həm minimum əməkhaqqı, həm də minimum pensiyalar sahəsində minimum standartlara çatmağa imkan yaradıb. Çünki dövlət başçısının iyunun 18-də imzaladığı sərəncamlarla 1 milyon 350 min insanın əməkhaqlarında ciddi artımlar edilir. Eyni zamanda, minimum əməkhaqqının artımı məqsədilə imzalanan sərəncamla Azərbaycanda minimum əməkhaqqının məbləği 2019-cu il sentyabrın 1-dən 40 faizədək artırılmaqla 180 manatdan 250 manata çatdırılacaq. Bununla da ölkəmizdə minimum əməkhaqqının məbləğinin yaşayış minimumunu (180 manat) 40 faizədək üstələməsi təmin edilir. Bu artım birbaşa olaraq 950 minədək vətəndaşı əhatə edəcək. Həmin insanlardan 600 mini dövlət sektorunda, 350 mini özəl sektorda işləyənlərdir. Onu da qeyd edim ki, bununla bu il ərzində minimum əməkhaqları artıq ikinci dəfə ciddi şəkildə artır.
Həmçinin, pensiyaların minimum məbləği oktyabrın 1-dən 160 manatdan 200 manata çatdırılacaq. Bu, təxminən 25 faiz artım deməkdir. İlkin hesablamalara görə, yeni artım 660 mindən çox pensiyaçını əhatə edəcək. Nəticədə ölkədə bu il oktyabrın 1-dən 200 manatdan aşağı pensiya alan vətəndaş olmayacaq.
Ölkə başçısının bununla bağlı qərarlarını təhlil edəndə məlum olur ki, islahatlar bütün sahələri əhatə edir və kompleks şəkildə sosial siyasət həyata keçirildiyini sübut edir. Ən başlıca məqamlardan biri ondan ibarətdir ki, minimum əməkhaqqı və pensiyaların artırılması cəmiyyətdə kəskin sosial təbəqələşmənin dərinləşməsinin, bununla bağlı meyllərin qarşısını alır. Bundan əvvəl bir sıra sosial müavinətlərin əhəmiyyətli şəkildə artırılması da sözügedən məsələdə mühüm rola malikdir.
Maraqlıdır, bəs ekspertlər son artımların cəmiyyətdə kəskin sosial təbəqələşmənin qarşısının alınmasında rolunu necə dəyərləndirirlər?
Aydın Hüseynov: “Bu, insanlara maliyyə dəstəyi olmaqla yanaşı, həm də bir mənəvi dəstəkdir”
Məsələyə münasibət bildirən millət vəkili Aydın Hüseynovun sözlərinə görə, artımlar sosial təbəqələşmənin qarşısını alır: “Bununla bağlı görülən işlər göz qabağındadır. Bu ilin fevralında minimum əməkhaqqı 180 manata qaldırıldı. Bu günlərdə Prezident İlham Əliyevin imzaladığı sərəncamla minimum əməkhaqqı 250 manata çatdırıldı. Bu, Azərbaycan vətəndaşlarının sosial rifahının yaxşılaşmasına böyük töhfə verəcək. 2019-cu ildə Prezident tərəfindən xalqın rifahının yaxşılaşdırılması istiqamətində çox mühüm addımlar atılıb. Cari ildə minimum əməkhaqqı, pensiyalar, tələbələrə verilən təqaüdlər artırılıb. Problemli kreditlərin həlli və digər sosial məsələlərlə bağlı mühüm fərman və sərəncamlar imzalanıb. Minimum əməkhaqqının artımı birbaşa olaraq 950 minədək vətəndaşı əhatə edəcək. Həmin insanlardan 600 mini dövlət sektorunda, 350 mini özəl sektorda işləyənlərdir. Həmçinin, bilirsiniz ki, minimum pensiyaların məbləği artırılaraq 200 manata qaldırılıb. Bütün bunlar vətəndaşların ailə büdcəsinin zənginləşməsi və alıcılıq qabiliyyətinin artması deməkdir. Çünki ailə büdcəsi zənginləşdikcə, alıcılıq qabiliyyəti artır. Nəzərə alsaq ki, sosial müavinətlər, minimum əməkhaqqı və pensiyalar əhəmiyyətli dərəcədə artırılır, o zaman bütün bunlar cəmiyyətdə sosial təbəqələşmənin qarşısını alır. Qoymur ki, vətəndaşlar arasında sosial təbəqələşmə yaransın və yaxud da dərinləşsin. O baxımdan son sosial paketin əhəmiyyətini yüksək dəyərləndirirəm. Bu yöndə atılan addımlar çox önəmlidir. Eyni zamanda, bu, insanlara maliyyə dəstəyi olmaqla yanaşı, həm də bir mənəvi dəstəkdir”.
Vidadi ORDAHALLI
