Məlum olduğu kimi, Prezident İlham Əliyev növbəti dəfə əhalinin, demək olar ki, bütün təbəqələrini əhatə edən mühüm sərəncamlar imzalayıb. Dövlət başçısının sərəncamlarına əsasən, bir çox sahədə çalışan vətəndaşlarımızın əməkhaqqı 40 faiz artırıldı.
Burada ən önəmli məqamlardan biri də minimum əməkhaqqının 250 manat məbləğində müəyyən edilməsidir. Qeyd edək ki, ölkə başçısı minimum əməkhaqqının və pensiyaların təxminən 40 faiz artırılması barədə sərəncam imzalayıb. Minimum əməkhaqqının artırılması nəticəsində yüz minlərlə vətəndaşın maaşı xeyli artacaq.
Əhalinin rifah halının yaxşılaşdırılmasında növbəti inqilabi addımların atılmasına imkan verən sosial islahatlar paketi cari il ərzində minimum pensiyanın məbləğinin növbəti dəfə əhəmiyyətli şəkildə artırılmasına da şərait yaradıb. Məsələ ondadır ki, dövlət başçısının yeni qanunvericilik təşəbbüsü olaraq, əmək pensiyasının minimum məbləğinin 25 faiz artırılaraq cari il oktyabrın 1-dən 160 manatdan 200 manata çatdırılması nəzərdə tutulur. Ölkə başçısının əhalinin rifah halının yüksəldilməsi, xüsusilə aztəminatlı və imtiyazlı təbəqələrin sosial durumunun yaxşılaşdırılması məqsədilə minimum aylıq əməkhaqqının artırılmasına dair sərəncamı cəmiyyətdə müsbət qiymətləndirilir.
Bütün bunların fonunda, sözügedən artımlar birbaşa və dolayı olaraq aztəminatlı ailələrin sosial durumuna necə təsir göstərəcək?
Vüqar Bayramov: “Dolayı təsirlərinə gəldikdə isə, bu, real sektorun inkişafı timsalında özünü göstərəcək”
Məsələyə münasibət bildirən iqtisadçı-ekspert Vüqar Bayramovun sözlərinə görə, sözügedən artımlar aztəminatlı ailələrin sosial durumuna həm birbaşa, həm də dolayı müsbət təsir göstərəcək: “Birbaşa olaraq bu artımlar sosial təminata daha çox ehtiyacı olan vətəndaşların sosial durumunun yaxşılaşmasına hesablanıb. Nəzərə alsaq ki, həm minimum əməkhaqqı, həm də minimum pensiya məhz sosial təminata ehtiyacı böyük olan vətəndaşların aldıqları ödənişlərdir, o zaman təbii ki, bu artımlar onların sosial vəziyyətinə müsbət təsir göstərəcək. Nəticə etibarilə bu, aztəminatlı ailələrin aylıq gəlirlərinin artmasına, onların sosial vəziyyətinin gücləndirilməsinə xidmət etmiş oldu. Məsələ ondadır ki, bunun sayəsində birbaşa gəlirlər artacaq. Bu da təbii ki, aztəminatlı ailələrin sosial vəziyyətinin yaxşılaşdırılması baxımından çox vacibdir. Çünki ailə büdcəsinin artması, birbaşa olaraq, onların sosial təminatına xidmət edir. Dolayı təsirlərinə gəldikdə isə, bu, real sektorun inkişafı timsalında özünü göstərəcək. Çünki artımlar həm də real sektorun dəstəklənməsi baxımından vacibdir. Ona görə ki, bütün bunlar həm də vətəndaşların alıcılıq qabiliyyətinin artmasına imkan verəcək. Nəticədə yerli istehsal olan məhsullara tələb artacaq. Bu da həmin məhsulların istehsalını genişləndirəcək. Bütün bunlar həm də dolayı olaraq real sektorun genişləndirilməsi və bazara daha çox yerli məhsulun çıxarılmasına imkan verəcək. Bundan həm adi vətəndaşlar, həm də real sektor faydalanacaq. Ona görə də sözügedən artımların çoxşaxəli faydası var”.
Vidadi ORDAHALLI
