Prezident İlham Əliyev 2019-cu ilin ötən dövrü ərzində sosial məsələlərlə bağlı bir sıra qərarlar qəbul edib. Bu da onu göstərir ki, əhalinin bütün qruplarının rifahının yüksəldilməsi həyata keçirilən sosial siyasətin əsas leytmotividir.
Bütövlükdə, Prezident İlham Əliyevin fevral ayında qəbul etdiyi sosial qərarlar təxminən 3 milyon vətəndaşı əhatə edib. Maddi tərəfinə gəldikdə isə, bu, böyük məbləğdə büdcə vəsaiti deməkdir. Konkret desək, 2019-cu ilin fevralında Prezident İlham Əliyevin imzaladığı fərman və sərəncamlara əsasən, 3 milyona yaxın insanın sosial müdafiəsinin gücləndirilməsi məqsədlərinə 1,5 milyard manat ayrılıb.
Ölkə başçısının iyunun 18-də imzaladığı sərəncamlar isə bu istiqamətdə həyata keçirilən dövlət siyasətinin davamı, silsilə tədbirlərin növbəti mərhələsidir. Ölkədəki mütərəqqi sosial siyasəti özündə növbəti dəfə bariz şəkildə ehtiva edən son qərarlar, ümumilikdə, 2 milyon insanı əhatə edir. Bu məqsədlə 1 milyard manat vəsait ayrılıb. Bununla həm dövlət orqanlarında, həm də özəl sektorda çalışan şəxslərin maddi vəziyyəti əhəmiyyətli dərəcədə yaxşılaşacaq.
Bir sözlə, 2,5 milyard manatlıq sosial paket cəmi 7 ayda üst-üstə 5 milyon ölkə vətəndaşının maddi durumuna müsbət təsir edəcək. Nəzərə alsaq ki, ölkə əhalisinin sayı 10 milyon nəfərdir, bunun necə böyük sosial əhəmiyyətə malik olduğunu təsəvvür etmək çətin deyil.
O baxımdan, ekspertlər bunun əhəmiyyətini necə dəyərləndirirlər?
Rəsul Cahangirli: “Ölkənin artan maliyyə imkanları əhalinin sosial rifahının yüksəldilməsinə yönəldilib”
Məsələyə münasibət bildirən ekspert Rəsul Cahangirlinin sözlərinə görə, bütün bunlar çox mühüm əhəmiyyətə malikdir: “Məsələ ondadır ki, bu il dövlət büdcəsindən bu məqsədlə üst-üstə 2,5 milyard manat vəsait ayrılacaq. Bu kifayət qədər böyük rəqəm olmaqla yanaşı, əhalinin vəziyyətinə ciddi şəkildə müsbət təsir edəcək. Faktiki olaraq, ölkə əhalisinin böyük hissəsi bu ayırmalardan faydalanacaq. Ölkənin artan maliyyə imkanları əhalinin sosial rifahının yüksəldilməsinə yönəldilib. Azərbaycan dövlətinin prioritet istiqamət olaraq qəbul etdiyi sosialyönümlü siyasət əhalinin maddi rifahının yaxşılaşdırılmasına və sosial müdafiəsinin gücləndirilməsinə istiqamətlənmiş xətdir. Hesab edirəm ki, ölkə vətəndaşlarının sosial rifahının artımı bundan sonra da davam edəcək. Azərbaycanın qeyri-neft sektoru inkişaf etdikcə, bu və ya digər formada ölkənin iqtisadi imkanları artdıqca, insanların rifahının yüksəldilməsi üçün addımlar atılacaq. Çünki dövlət başçısının həyata keçirdiyi sistemli siyasət buna xidmət edir. Azərbaycanda həyata keçirilən islahatlar nəticəsində həm iqtisadiyyat inkişaf edir, həm də büdcəyə daxilolmaların həcmi get-gedə artır. Bütün bunlar bir-birilə sıx bağlı olduğu üçün, daha çox ölkə vətəndaşı artımlardan faydalanmaq imkanı əldə edir”.
Vidadi ORDAHALLI
