15/10/2019 18:32
728 x 90

Minimum əməkhaqqının artımının bölgələrdən Bakıya işçi köçünə əks təsir göstərmək gücü...

“Sözügedən artımlar bölgələrdən paytaxta gələn əməkçi miqrantların sayının azalmasına səbəb ola bilər”

img

Sosial ədalət prinsiplərinin daha da möhkəmləndirilməsi məqsədilə ölkə başçısı tərəfindən minimum əməkhaqqının məbləği 40 faizə yaxın artırılaraq 250 manata çatdırılıb. Minimum əməkhaqqının artımı birbaşa olaraq 950 minədək vətəndaşı əhatə edəcək. Həmin insanlardan 600 mini dövlət sektorunda, 350 mini özəl sektorda işləyənlərdir.

Minimum əməkhaqqının artırılmasının bir sıra üstünlükləri var. Bunun bir üstünlüyü ondan ibarətdir ki, dövlət sektorunda çalışan şəxslərin minimum məvaciblərinin artırılması özəl sektora da öz təsirini göstərir. Bunun nəticəsində özəl sektorda çalışanların da minimum əməkhaqqı artırılacaq.

Digər tərəfdən, bu, regionlarda işləyənlərin də həyat şəraitinə müsbət təsir göstərəcək. Məsələ ondadır ki, zaman-zaman iş dalınca regionlardan Bakıya və ölkənin digər böyük şəhərlərinə gedənlər olur. Regionların inkişafına dair dövlət proqramları qəbul edildikdən sonra bu sahədə vəziyyət əhəmiyyətli dərəcədə müsbətə doğru dəyişdi. Ancaq buna rəğmən, minimum əməkhaqqının aşağı olduğunu əsas gətirib regionlardan paytaxta iş dalınca gələnlər olur. Belələri bunu məhz məvaciblərin azlığı ilə əlaqələndirir. Bu səbəbdən bölgələrdə əməkçi miqrantlar iş dalınca əsasən paytaxta üz tuturlar. Görürsən ki, məktəbdə gözətçi işləyən, digər dövlət sektoruna aid sahədə fəaliyyət göstərənlər bu şəxslərdir. O baxımdan, minimum əməkhaqqının məbləğinin 40 faizə yaxın artırılaraq 250 manata çatdırılması bölgələrdən əməkçi miqrantların iş dalınca paytaxta üz tutması hallarının azalmasına necə təsir göstərəcək?

  • Vüqar Bayramov: “Ancaq biz bunu birdən-birə yox, mərhələli şəkildə müşahidə edəcəyik”

Məsələyə münasibət bildirən iqtisadçı-ekspert Vüqar Bayramovun sözlərinə görə, sözügedən artımlar bölgələrdən paytaxta üz tutan əməkçi miqrantların sayının azalmasına öz təsirini göstərəcək: “Ümumilikdə, əməkhaqqı artımları birmənalı şəkildə vətəndaşların sosial təminatının yaxşılaşdırılmasına yönəlib. Eyni zamanda, bu artımlara gedilməsində məqsəd ondan ibarətdir ki, bölgələrdə çalışan vətəndaşların sosial vəziyyəti daha da yaxşılaşsın. Dövlət vəsaiti hesabına bölgələrdə yaradılan iş yerlərinin sayında artım baş verir. Bölgələrdə nə qədər çox iş yeri yaradılsa, bu bir o qədər paytaxta iş dalınca gələnlərin sayının azalmasına öz təsirini göstərəcək. Çünki monitorinqlər göstərir ki, bölgələrdən vətəndaşların paytaxta gəlməsinə səbəb məhz onların daha yüksək əməkhaqqı işi ilə təmin olunmaq istəyidir. Ona görə də sözügedən proseslər mərhələli şəkildə öz səmərəsini verəcək. Minimum əməkhaqqının artırılması bölgələrdən paytaxta gələn əməkçi miqrantların sayının azalmasına səbəb ola bilər. Görəndə ki, məvaciblər artır, o zaman harasa miqrasiya etməkdə maraqlı olmayacaqlar. Ancaq hesab edirəm ki, biz bunu birdən-birə yox, mərhələli şəkildə müşahidə edəcəyik. Bütün bunlarla yanaşı, həm dövlət büdcəsi, həm də özəl sektor hesabına daha çox iş yerinin yaradılması bölgələrdəki vətəndaşlarımızın işlə təminatı prosesini gücləndirəcək. Bu həm də paytaxtla bölgələr arasında fərqin mərhələli şəkildə azaldılmasına gətirib çıxaracaq”.

Vidadi ORDAHALLI

Son xəbərlər