Xəbər verildiyi kimi, Prezident İlham Əliyevin iyunun 18-də imzaladığı sərəncamla Azərbaycanda minimum əməkhaqqının məbləği sentyabrın 1-dən 250 manata qaldırılıb.
Sözügedən sərəncam ölkədə əhalinin rifah halının yaxşılaşdırılması istiqamətində 2019-cu ilin elə ilk aylarından atılan inqilabi addımların davamıdır. Sərəncama əsasən, Azərbaycanda minimum əməkhaqqının məbləği 2019-cu il sentyabrın 1-dən 40 faizədək artırılaraq 180 manatdan 250 manata çatdırılacaq. Bununla da ölkəmizdə minimum əməkhaqqının məbləğinin yaşayış minimumunu (180 manat) 40 faizədək üstələməsi təmin edilir. Bu artımın təmin edilməsi üçün dövlət büdcəsindən əlavə olaraq illik 240 milyon manat, cari il (sentyabr-dekabr ayları) üzrə isə 73 milyon manat vəsait ayrılacaq. Bundan əlavə, minimum əməkhaqqının məbləğinin 250 manata çatdırılması dövlət büdcəsindən maliyyələşdirilən sahələrdə Vahid Tarif Cədvəli ilə müəyyən edilmiş aylıq tarif (vəzifə) maaşları üzrə orta əməkhaqqının da orta hesabla 40 faiz artmaqla 265 manatdan 367 manata çatmasına imkan verir.
Ümumilikdə, orta aylıq əməkhaqqının 265 manatdan 367 manata qalxması insanlar üçün nə demək olacaq?
Müslüm İbrahimov: “Bunun sayəsində ölkə vətəndaşlarının istehlak səviyyəsi artacaq”
Məsələyə münasibət bildirən iqtisad elmləri doktoru Müslüm İbrahimovun sözlərinə görə, bu həmin kateqoriya üzrə məvacib alanlar üçün müsbət göstəricidir: “Bu onu göstərir ki, ölkənin aktiv iqtisadi inkişafı ilə bağlı ciddi addımlar atılır. Bunun sayəsində ölkə vətəndaşlarının istehlak səviyyəsi artacaq. Bu minvalla iqtisadi tənzimləmə mexanizmlərinin təkmilləşdirilməsi nəzərdə tutulur. Yəni maliyyə bazasının daha da genişlənməsindən söhbət gedir. Bu o deməkdir ki, ölkədə yüksək artım tempi ilə istehsal səviyyəsinin artmasına nail olmaq lazımdır. Bu, müəyyən dərəcədə, qiymətlərin artmasında bir baryer ola bilər. Minimum əməkhaqqının artırılması birinci növbədə istehsalın genişlənməsinə və artımına gətirib çıxarmalıdır. İkinci bir tərəfdən, bu, dünya ölkələrinin iqtisadi inkişaf səviyyələrinin qiymətləndirilməsi sistemində Azərbaycanın reytinqinin artması deməkdir. Çünki dünyada minimum əməkhaqqının artırılması əsas göstərici kimi qəbul olunur. O da bir reallıqdır ki, son illər Azərbaycan qeyri-neft sənayesində əlavə artıma nail olub. Bunun sayəsində nominal və real gəlirlər artıb. Ona görə də orta aylıq əməkhaqqının 265 manatdan 367 manata qalxması əhali üçün müsbət əhəmiyyət kəsb edir”.
Vidadi ORDAHALLI
