Məlum olduğu kimi, əmək pensiyasının minimum məbləğinin 25 faiz artırılaraq cari il oktyabrın 1-dən 160 manatdan 200 manata çatdırılması nəzərdə tutulur.
Əmək və Əhalinin Sosial Müdafiəsi Nazirliyindən verilən məlumata görə, əmək pensiyasının minimum məbləğinin əhəmiyyətli şəkildə artırılmasına dair qanunvericilik layihəsi hazırlanaraq artıq Milli Məclisə təqdim olunub. Minimum pensiya məbləğinin artırılması, ümumilikdə, 660 min pensiyaçını əhatə edəcək. Artımın edilməsi üçün illik 216 milyon manat, cari il (oktyabr-dekabr ayları) üzrə 62 milyon manat əlavə vəsait yönəldiləcək.
Qeyd edək ki, bu artım Prezident İlham Əliyevin təşəbbüsü ilə cari il ərzində əmək pensiyasının minimum məbləğinin artırılması istiqamətində atılan artıq ikinci mühüm addımdır. Bundan əvvəl də dövlət başçısının qanunvericilik təşəbbüsü əsasında pensiyanın minimum məbləği cari il martın 1-dən orta hesabla 40 faizədək artırılaraq 116 manatdan (bir sıra kateqoriyalar üzrə 80 manatdan) 160 manata çatdırılıb, həmin artım, ümumilikdə, 233 min pensiyaçını əhatə edib.
Beləliklə, təkcə bu il ərzində Azərbaycanda minimum pensiyanın məbləğində 72,4 faiz artım edilməklə, bu məbləğin 116 manatdan 200 manata çatdırılması təmin edilib.
Maraqlıdır, martda minimum pensiyanın artırılması, ümumilikdə, 233 min pensiyaçını əhatə etdiyi halda, oktyabrda olacaq artım 660 min pensiyaçını əhatə edəcək. Aradakı bu böyük fərq nədən yaranıb? Pensiyaçıların sayı çoxalıb, yoxsa bu digər səbəblərlə bağlıdır?
İlqar Hüseynli: “Ancaq budəfəki sərəncamın əhatə dairəsi daha geniş olduğu üçün, arada belə fərq yaranıb”
Sözügedən məsələyə aydınlıq gətirən ekspert İlqar Hüseynli bununla bağlı bir sıra məqamlara toxundu: “Məsələ ondadır ki, müxtəlif kateqoriyalar üzrə pensiya təminatları var. Əmək fəaliyyətinə görə pensiyaçıların təqaüdləri ayrıdır. Xəstəliyə görə əmək pensiyası alanlar var. Bunlar üçün də kateqoriyalar fərqlidir. Bəzən bu kateqoriyalar üzrə pensiya alanların sayı artır. Digər tərəfdən, müxtəlif yaş qruplarına görə pensiya alanların sayı dəyişir. Bir məqamı qeyd edim ki, mart ayında yalnız əmək pensiyalarının minimum hissəsi artırıldı. Ona görə də bu artım 233 min pensiyaçını əhatə etdi. Ancaq budəfəki sərəncamın əhatə dairəsi daha geniş olduğu üçün, arada belə fərq yaranıb. Çünki həm xəstəliyə, həm də digər kateqoriyaya görə minimum əmək pensiyası alanlar var. Həmin pensiyaçıların təqaüdləri artırıldı. Artımlar sözügedən kateqoriyaya aid olan bütün ölkə vətəndaşlarına şamil edildiyinə görə minimum pensiyanın məbləğinin artırılması, ümumilikdə, 660 min pensiyaçını əhatə edəcək. Deməyim odur ki, aradaki fərq məhz bununla əlaqədardır. Bütün hallarda, hesab edirəm ki, minimum pensiyaların 200 manata çatdırılması müsbət haldır”.
Vidadi ORDAHALLI
