Günel Fərhadqızı: “Bu, Azərbaycan istehsalı olan məhsulların sərbəst şəkildə Avropa bazarına yol tapması deməkdir”
Azərbaycan şirkətlərinin Bosniya və Hersoqovinanın şirkətləri ilə əməkdaşlıq etməsi Azərbaycan məhsullarına Avropa ölkələrinin bazarlarına çıxış açacaq. Bunu Azərbaycanda İxracın və İnvestisiyaların Təşviqi Fondunun (AZPROMO) rəhbəri Rüfət Məmmədov deyib.
Onun sözlərinə görə, bu, Bosniya və Hersoqovinanın Avropa İttifaqı ilə azad ticarət haqqında razılaşmasının olması sayəsində mümkündür: “Biz də, öz növbəmizdə, Bosniya şirkətlərinə Azərbaycanla arasında azad ticarət haqqında razılaşma olan MDB ölkələrinin bazarlarına sərbəst çıxış təklif edə bilərik. Yəni söhbət qarşılıqlı maraqdan gedir”.
AZPROMO-nun rəhbəri bildirib ki, iki ölkənin işgüzar dairələri geniş məsələlər dairəsi üzrə maraq göstərirlər: “İlk növbədə tikinti, ağır maşınqayırma, avtomobil istehsalı, kənd təsərrüfatı, qida, tekstil, mebel sənayesi və emal sənayesinin müxtəlif istiqamətləri üzrə. Yəni artıq bizim şirkətlərimizin ünsiyyət qurduğu bir sıra istiqamətlər var. Azərbaycanın kənd təsərrüfatı, aqrar sənaye, yeyinti məhsullarının emalı və istehsalı şirkətləri artıq Bosniya və Herseqovina bazarlarındadır. Bu, Bosniya və Herseqovina üçün, o cümlədən bizim üçün də ənənəvi sektordur”.
Bosniya və Hersoqovinanın Avropa Birliyi ilə azad ticarət etmək icazəsinin olduğunu nəzərə alsaq, onda bu razılaşma həm də Azərbaycan istehsalı olan məhsulların Avropa bazarına sərbəst çıxması deməkdir. Əldə olunan bu razılaşmadan Azərbaycan iqtisadiyyatı hansı dividendləri qazana bilər?
İqtisadçı Günel Fərhadqızı qəzetimizə bildirdi ki, Azərbaycanda son dövrdə qeyri-neft sektorunun inkişafının sürətləndirilməsi üçün genişhəcmli tədbirlər görülüb, dövlətin bu sahədə iqtisadi siyasəti gücləndirilib, çoxlu sayda fərman və sərəncamları verilib, dövlət proqramları, strategiya və konsepsiyalar qəbul edilərək reallaşdırılıb: “Xüsusi olaraq Prezident İlham Əliyevin 2016-cı il 16 mart tarixli Sərəncamı ilə təsdiq edilən “Milli iqtisadiyyat və iqtisadiyyatın əsas sektorları üzrə strateji yol xəritəsinin başlıca istiqamətləri” ölkəmizdə qeyri-neft sektorunun inkişafında müstəsna rol oynayan strateji sənəddir. Bu strategiya Azərbaycanda qeyri-neft sektorunun mövcud durumunu, inkişaf potensialını, qeyri-neft sektorunun inkişafında hökumətin rolunu, maraqlı tərəflər arasında potensial əməkdaşlıq formalarını, bu əməkdaşlığın uğurla həyata keçirilməsi metodlarını və bir sıra digər mühüm inkişaf istiqamətlərini əks etdirən çox vacib sənəddir. Hazırda Azərbaycan məhsullarının xarici ölkə bazarlarına çıxarılması üçün reklam, marketinq məsələlərinə xüsusi diqqət yetirilir. “Made in Azerbaijan” brendinin xarici bazarlarda təbliği, yeni müəssisələrin ixracla bağlı xarici ölkələrdə sertifikat və patentlər alması, sərgilərin təşkili, ixrac xərclərinin dövlət büdcəsindən ödənilməsi nəzərdə tutulur. Bu işlər Azərbaycanda İxracın və İnvestisiyaların Təşviqi Fonduna həvalə edilib. Bu işdə məhsulların beynəlxalq sərgi və yarmarkalarının təşkili, KİV-lərdə reklamların aparılması olduqca vacibdir. Bundan əlavə, Azərbaycan məhsullarının xarici ölkələrin mağaza şəbəkələrinə və rüsumsuz ticarət mağazalarına çıxışını təmin etmək üçün vəsaitlər dövlət büdcəsindən maliyyələşdirilir. Hazırda qarşıda qoyulan əsas vəzifə qlobal iqtisadi mühitdə xam neft, təbii qaz ixracının verdiyi maliyyə imkanlarından bəhrələnərək, geniş çeşidli, dayanıqlılıq və rəqabətqabiliyyətlilik meyarlarına söykənmiş qeyri-neft malları ixracı potensialının yaradılmasıdır. Bu məqsədlə Azərbaycanın qeyri-neft sektorunun ixrac potensialının genişləndirilməsi yollarının çoxvektorluluğu əsas prioritet kimi götürülməlidir. Bu baxımdan da Avropanın çox əlverişli bir regionunda yerləşən Bosniya və Hersoqovina kimi ölkə ilə ixrac sahəsindəki əməkdaşlığımız olduqca ürəkaçandır. Bu, Azərbaycan istehsalı olan məhsulların sərbəst şəkildə Avropa bazarına yol tapması deməkdir. Təbii ki, yerli məhsulun ixracatından ölkəyə valyuta daxil olması artacaq ki, bu da iqtisadiyyatın inkişafına səbəb olacaq”.
Məhəmmədəli QƏRİBLİ
