Ənvər Əliyev: “Bu məsələnin partiyanın nizamnaməsinə nə dəxli var ki?”
Vətəndaş Həmrəyliyi Partiyasının (VHP) Mərkəzi Nəzarət-Təftiş Komissiyasının (MNTK) üzvləri “Azərbaycan dilinin dövlət dili kimi inkişaf strategiyası: Mövcud vəziyyət və perspektivlər” mövzusunda Milli Məclisdə keçirilmiş konfrans zamanı VHP-dən olan millət vəkili Rafael Hüseynovun partiya sədri Sabir Rüstəmxanlının çıxışını yarımçıq kəsib onun fikrini tamamlamasına imkan yaratmaması ilə bağlı rayon təşkilatlarından və partiya fəallarından daxil olan müraciətləri müzakirə edib.
MNTK partiya Nizamnaməsinin 9.2-ci maddəsinə əsasən Ali Məclisin üzvü Rafael Hüseynova töhmət elan edilməsi barədə qərar qəbul edib.
Yəni partiya R.Hüseynova töhmət verib. Bu arada R.Hüseynov da bildirib ki, heç nə onunla S.Rüstəmxanlı arasında qardaşlıq və dostluq münasibətlərini poza bilməz.
VHP-nin R.Hüseynova töhmət elan etməsi ciddi şəkildə müzakirə edilir və bildirilir ki, Milli Məclisdə baş verən bir hadisənin partiya daxilində müzakirəsi doğru deyil.
Əslində bu hərəkət partiyadaxili demokratiyaya nə qədər uyğundur? Rəfail Hüseynov hansı partiya nizamnaməsi və proqramını pozub? Ora partiyanın tədbiri deyildi ki...VHP-nin nizamnaməsinin hansı maddəsi pozulub? Sabah partiya sədri öz partiya üzvünün evinə qonaq getsə, ona yaxşı baxılmasa buna da töhmət düşür?
“...Partiyanın nizamnaməsinin pozulması ilə heç bir əlaqəsi yoxdur”
VHP-nin sabiq üzvü Ənvər Əliyev “Bakı-Xəbər”ə bildirdi ki, Milli Məclisdə reqlamet səbəbindən R.Hüseynovla S.Rüstəmxanlı arasında yaranan anlaşılmazlığın partiyada müzakirəyə çıxarılması düzgün deyil. “Bildiyim qədər, Milli Məclisin komitə iclasında Sabir müəllimlə Rəfail müəllim arasında reqlamentə görə mübahisə düşüb. Bu məsələnin partiyada müzakirə edilməsi doğru deyildi. Bu məsələnin partiyanın nizamnaməsinə nə dəxli var ki? Bu hadisənin partiyanın nizamnaməsinin pozulması ilə heç bir əlaqəsi yoxdur”.
Ə.Əliyev qeyd etdi ki, hadisə partiyanın iclasında yox, Milli Məclisdə baş verib və bu baxımdan bu məsələnin partiyada müzakirə edilməsi də uyğun deyildi. “Bu məsələnin partiyanın nizamnaməsi ilə bağlılığı yoxdur. İclasın daxili intizam qaydası var, 5 dəqiqəlik reqlament verilir, bu pozulubsa onunla bağlı daxili qaydalara əsasən addım atırlar. Bu hadisə də partiyada yox, partiyadan kənarda baş verib”-deyə Ə.Əliyev qeyd etdi.
İradə SARIYEVA
