Rizvan Fikrətoğlu: “Fənni çətin və cansıxıcı yox, praktiki və yaradıcı hala gətirmək lazımdır”
Elm və təhsil naziri Emin Əmrullayev parlamentdə müzakirələr zamanı qeyd edib ki, tədris planlarında Azərbaycan dili üzrə dərs saatları artırılacaq. Nazirin bu açıqlaması ictimaiyyət tərəfindən müzakirəyə səbəb olub.
Qeyd edək ki, azərbaycan dilinin imkanları artırılmalıdır, bu istiqamətdə qarşıya qoyulan məqsədlər doğrudur. Dilinə sahib çıxan cəmiyyət gələcəyə daha böyük inamla baxır.
Ekspertlər hesab edir ki, azərbaycan dili üzrə tədris saatını artırmaqdansa tədrisin keyfiyyətinin artırılması daha məqbul olar. Mövcud, hazırkı dərs saatlarında dərs keyfiyyəti artarsa nəticə daha yaxşı olmazmı?
“Bu qərarın effektli olması üçün məzmun, metodika və müəllim hazırlığına paralel şəkildə investisiya qoyulmalıdır”
Təhsil eksperti Rizvan Fikrətoğlu “Bakı-Xəbər”ə şərhində bildirdi ki, bu qərarın effektli olması üçün məzmun, metodika və müəllim hazırlığına paralel şəkildə investisiya qoyulmalıdır: “Ana dili təkcə qrammatika deyil - oxu, yazı, diksiya, nitq mədəniyyəti, analiz bacarıqları var. Şagirdlərin nitq mədəniyyətində geriliyi var. Zəif söz ehtiyatı, fikir ifadəsində çətinlik, yazı mədəniyyətinin aşağı olması reallıqdır. Saat çoxluğu bu boşluğu, düşünürəm ki, qismən doldura bilər. Ancaq dərslər eyni köhnə metodla keçiriləcəksə, əlavə saatlar sadəcə əlavə yük olacaq. Ona görə də dərslər keçirilərkən müasir, maraqlı, şagird yönümlü dərs metodları tətbiq olunsa, yazı və nitq məşğələləri prioritetləşsə, Azərbaycan dili müəllimlərinin peşəkar inkişafı gücləndirilsə, məncə, fayda çox ola bilər. Bundan əlavə, dərsliklər yenilənməlidir, mətnlər şagird üçün aktual və cəlbedici olmalıdır. Şagirdlərə dili sevdirmək üçün layihə və debatlara yer ayrılmalıdır. Nəzərə almaq lazımdır ki, azərbaycan dili təkcə qrammatika fənni deyil - ünsiyyət dili və düşünmə aləti kimi tədris olunmalıdır. Fənni çətin və cansıxıcı yox, praktiki və yaradıcı hala gətirmək lazımdır. Bununla yanaşı, dərsliklərin yenilənməsi önəmlidir. Müasir Azərbaycan ədəbiyyatı və publisistikası daha çox yer almalıdır. Qrammatika bölmələri sadələşdirilməli, praktikləşdirilməlidir. Bu model tətbiq olunsa, şagirdlər fikrini aydın, səlis və mədəni formada ifadə edəcəklər. Yazı bacarıqları güclənəcək. Onların esse, məktub yazma qabiliyyəti formalaşacaq. Ana dilində yaradıcılıq, məntiqi analiz, nitq inamı artacaq. Həmçinin, Azərbaycan dili müasir tələblərə uyğun bir fənnə çevrilə bilər”.
Günel CƏLİLOVA
