Almaniya Kansleri Fridrix Merz Münhendə keçirilən Xristian Sosial Birliyi konqresində çıxışı zamanı Avropa üçün Pax Americana dövrünün başa çatdığını bildirib.
Merz bunun "münasibətlərdə müvəqqəti dalğalanma deyil, demək olar ki, tektonik bir dəyişiklik" olduğunu vurğulayıb.
Pax Americana, İkinci Dünya Müharibəsindən sonra ABŞ-ın iqtisadi gücü, hərbi üstünlüyü və siyasi təsiri sayəsində dünya nizamında uzunmüddətli sabitlik və nisbi sülh dövrü kimi qəbul edilir. Bu dövr ABŞ-ın qlobal liderliyi altında Qərb dünyasının təhlükəsizlik, ticarət və qurumlar üzərində formalaşan "Amerika sülhü" hesab olunur.
Amerikanın təsiri altında uzunmüddətli sabitlik dövrünün artıq keçmişdə qaldığını bildirən Merz, “amerikalılar öz maraqlarını çox qətiyyətlə müdafiə edirlər və biz də öz maraqlarımızı müdafiə etməliyik" deyib. Kansler əlavə edib ki, Avropa həm ABŞ ilə münasibətlərdə böyük bir transformasiyaya, həm də Rusiyadan qaynaqlanan risklərin artmasına hazırlaşmalıdır. Merz, Almaniyanın "sıfırdan yenidən qurulmasına ehtiyac olduğunu" bildirərək, ölkənin açıq və azad cəmiyyət irsini qoruyub gələcək nəsillərə ötürmək məsuliyyətini vurğulayıb.
TAHİR
