Dolların son bahalaşması nə ilə bağlıdır?

Rəsul Cahangirli: "Neftin ucuzlaşmaqda davam etməsi dolların bahalaşmasına təsir göstərir"
"Bahalaşma davam edəcək"
Son vaxtlar valyutadəyişmə məntəqələrində dollar bahalaşır, avro və rubl ucuzlaşır. Azərbaycan Mərkəzi Bankının məlumatına görə, ABŞ dolları günə yüksəlişlə başlayıb. Mərkəzi Bank 1 ABŞ dollarının məzənnəsini 1,0499 manat olaraq açıqlayıb.
Avro və rublun dəyərində isə ucuzlaşma müşahidə olunur. Rəsmi məzənnəyə əsasən, 1 avronun dəyəri 1.1412 manat, 1000 Rusiya rublunun dəyəri isə 16 manat 60 qəpikdir. Qeyd edək ki, Mərkəzi Bank valyuta məzənnələrini həftə içi hər gün açıqlayır.
Digər tərəfdən, "Morgan Stanley", "Goldman Sachs" kimi qlobal banklar 1 avronun 1 dollara bərabər olacağını proqnozılaşdırırlar. Dollar və avro məzənnəsinin bərabərləşməsinin, "Goldman Sachs" bu ilin dekabr ayında, "Morgan Stanley" isə 2016-ci ilin dördüncü rübündə baş verəcəyini gözləyir. Həmçinin bank, avro/dollarda il sonu proqnozunu, əvvəlki səviyyə olan 1.13-dən 1.06-ya və 2016-ci ilin birinci rübü üçün isə 1.11-dən 1.03-ə endirib.
Avronun dollar qarşısında məzənnəsinin dəyişməsi onun Azərbaycan manatı qarşısında da dəyişməsinə səbəb olur. "Goldman Sachs"ın proqnozu reallaşarsa, avronun manat qarşısında 8% ucuzlaşa biləcəyini də gözləmək olar. Artıq bu ucuzlaşma başlayıb. Qlobal bazarda avro dollar qarşısında zəifləməyə başlayıb (1 avro = 1.0869 dollar). ABŞ-da Mərkəzi Bankın pul siyasətini sərtləşdirərək, faizləri artırmağa hazırlaşdığı bir ərəfədə, Avropa Mərkəzi Bankı pul siyasətini daha da yumuşaldacağını açıqlayıb. Nəticədə də dollar bahalaşır, avro isə ucuzlaşır.
Sözügedən məsələ ilə bağlı fikirlərini "Bakı-Xəbər"lə bölüşən ekspert Rəsul Cahangirlinin sözlərinə görə, dollar bahalaşmasının bir neçə səbəbi var: "Bu, dünyada gedən iqtisadi proseslərlə, xüsusən də Avropada hökm sürən iqtisadi böhranla bağlıdır. Yaxın bir ay ərzində dolların bahalaşacağı gözlənir. O cümlədən neftin ucuzlaşmaqda davam etməsi amili də dolların bahalaşmasına təsir göstərir. Çünki neft qiymətinin ucuzlaşması zamanı investorlar öz yatırımlarını neftdən çıxarıb qızıla qoymağa üstünlük verirlər. Dünya iqtisadiyyatında gedən proseslərlə bağlı investorlar öz vəsaitlərini bəzi qiymətli kağızlardan çıxararaq qızıla yatırmağa çalışıblar. Tarixən neftlə qızıl arasındakı əlaqə bundan ibarət olub. Amma son dövrdə bu asılılıq o qədər də nəzərə çarpmır. Əsas paralellik dolların məzənnəsi ilə əlaqədar olaraq dəyişir. Dollar bahalaşmaqda davam etsə, həm qızılın, həm də neftin qiyməti ucuzlaşacaq. Bu prosesin yaxın bir ayda reallaşma ehtimalı çox yüksəkdir".
Vidadi ORDAHALLI