Pandemiya bu il əksər dünya ölkəsində sığorta yığımlarına mənfi təsir etdiyi halda, Azərbaycanda bu sahədə 10 faizdən çox artım var. Belə ki, bu ilin yanvar-oktyabr ayları ərzində Azərbaycanda fəaliyyət göstərən sığorta şirkətləri tərəfindən cəmi 628 374,2 min manat həcmində sığorta haqqı yığılıb. Nəticədə ötən ilin eyni dövrü ilə müqayisədə sığorta yığımları 57 milyon 854 min manat və yaxud 10,1 faiz artıb.
Azərbaycan Mərkəzi Bankının yaydığı məlumatdan aydın olub ki, hesabat dövründə şirkətlər tərəfindən 350 035,5 min manat həcmində ödəniş həyata keçirilib. Hesabata əsasən, sığorta yığımları ötən ilin eyni dövrü ilə müqayisədə 10,1 faiz artıb. Sığorta ödənişlərində isə 55,2 artım qeydə alınıb.
Görünən odur ki, bir sıra ölkələrdən fərqli olaraq pandemiya Azərbaycanın sığorta bazarına mənfi təsir göstərə bilməyib. Bu isə müsbət tendensiyadır.
Maraqlıdır, bəs ekspertlər bunun səbəbini necə izah edirlər?
“Artımın çoxu könüllü sığortaların payına düşür”
Məsələyə münasibət bildirən ekspert Rəsul Cahangirli bunu müxtəlif amillərlə əlaqələndirdi: “Bunun başlıca səbəbi onunla bağlıdır ki, pandemiya digər ölkələrdən fərqli olaraq, Azərbaycan iqtisadiyyatına o qədər də böyük təsir göstərə bilməyib. Dövlətin müəyyən qabaqlayıcı addımları, sosial paketlər bu məsələdə müəyyən rol oynayıb. Digər tərəfdən, artımı təhlil edəndə görürük ki, artımın çoxu könüllü sığortaların payına düşür. Bu tendensiya ilin əvvəlindən bu şəkildə davam edir. Əgər aylar üzrə təhlil etsək görərik ki, artım bəzən aşağı düşür. İlin əvvəlində sığorta bazarında artım daha yüksək idi. Ancaq ilin ortalarına və üçüncü rübə doğru artım bir az aşağı düşdü. Artımın çoxu könüllü sığortaların payına düşür. Bunların da içərisində böyük rolu həyat sığortaları oynayır. Avtomobil, əmlak sığortaları da üstünlük təşkil edir. Demək olar ki, artım bütün sığorta sahələrində müşahidə olunur. Başqa bir tərəfdən, artıq əhali sığortadan faydalanır, bilir ki, sığorta nə işə yarayır. Bunların sayəsində əhalinin sığortaya inamı əvvəlki kimi deyil. Yəni inam artıb. Hesab edirəm ki, bütün bunlar normal haldır. Həm pandemiya, həm dünyada baş verən neft qiymətləri fonunda baş verən iqtisadi böhrana rəğmən, bazarımızda azalma yoxdursa, bunun özü böyük uğurdur”.
Ekspert onu da qeyd etdi ki, pandemiya və neftin ucuzlaşması olmasaydı, yığımlar daha çox olacaqdı.
Vidadi ORDAHALLI
