Daşınmaz əmlakın icbari sığortasını həyata keçirməyən vətəndaşlar və sahibkarlar bir sıra məhdudiyyətlərlə qarşılaşa bilərlər. "İcbari sığorta haqqında" Qanuna əsasən, bu sığorta növü məcburi xarakter daşıyır. Qanunvericiliyə əsasən, sığorta müqaviləsinin bağlanmamasına görə cərimə nəzərdə tutulsa da, faktiki olaraq icra mexanizmi təsdiq edilməyib.
Qeyd edək ki, icbari sığorta müqaviləsinin bağlanmamasına görə fiziki şəxslər 30, vəzifəli şəxslər 80, hüquqi şəxslər üçün isə 200 manat məbləğində cərimə nəzərdə tutulub. 20 gün ərzində icbari sığorta müqaviləsi bağlanmasa, əmlak sahibi yenidən eyni məbləğdə cərimə edilir. Mexanizm təsdiqləndikdən sonra cərimələrin tətbiq edilməsi proseduru da həyata keçiriləcək.
“Qanunvericilikdə evlərini icbari sığortalamayanlara qarşı cərimələrin tətbiqi nəzərdə tutulub"
Daşınmaz əmlakın icbari sığortasını həyata keçirməyən vətəndaşlar və sahibkarların üzləşəcəyi məhdudiyyətlər barədə məlumat verən Azərbaycan Sığortaçılar Assosiasiyasının icraçı direktoru Elmar Mirsalayev qeyd etdi ki, daşınmaz əmlakını sığortalamayan vətəndaş və sahibkarlar alqı-satqı və girov əməliyyatlarını icra edə bilməyəcəklər: “Daşınmaz əmlakın icbari sığortası “İcbari sığorta haqqında” Azərbaycan Respublikasının Qanunu ilə tənzimlənir və bu növ məcburi olaraq tətbiq edilir. Ötən ilin sonunda bu sığorta növü üzrə ciddi təbliğat işləri aparıldı və nəticədə əhalinin böyük bir hissəsi daşınmaz əmlakını sığortaladı. Sığorta müqavilələrinin müddətinin 1 il olduğunu nəzərə alsaq, ötən ilin sonunda bağlanmış müqavilələrin müddəti bu günlərdə bitmək üzrədir. Bu müqavilələrin müddəti növbəti dövr üzrə mütləq şəkildə uzadılmalıdır. Əks təqdirdə vətəndaşlar müəyyən məhdudiyyətlərlə üzləşə bilərlər. Qanunvericilikdə evlərini icbari sığortalamayanlara qarşı cərimələrin tətbiqi nəzərdə tutulub. Bundan əlavə, icbari sığortası olmayan evlərin satışı çətinləşəcək".
Günel CƏLİLOVA
