Məlum olduğu kimi, Sumqayıtda “Gilan Tekstil Park” MMC-in tibbi maska fabrikinin və qoruyucu kombinezonların istehsalı müəssisəsinin açılışı olub. Açılışda iştirak edən Prezident İlham Əliyevə bildirilib ki, tibbi maska fabrikində birdəfəlik istifadə üçün maskalar istehsal olunacaq.
Bundan əlavə, “Gilan Tekstil Park” Məhdud Məsuliyyətli Cəmiyyətdə birdəfəlik istifadə üçün qoruyucu kombinezonların da istehsalına başlanıb. Məhsullar polietilen qoruyucu membranla örtülüb, yüksək sıxlıqlı polipropilendən olan toxunmamış parçadan tikilir. Bu isə, öz növbəsində, məhsulun keyfiyyətini artırır. Belə ki, bu parça möhkəmliyi, sukeçirməzliyi, kimyəvi maddələrə davamlılığı, yüngüllüyü ilə fərqlənir.
İstehsal olunan qoruyucu kombinezonlar istifadəçiləri virus, infeksiya, zərərli kimyəvi maddələrdən və ya həssaslıq yarada bilən məhsul və proseslərdən qoruyur. Məhsulun uyğunluğu müvafiq standartlar üzrə sertifikatlaşdırılıb. Burada gün ərzində 6 min ədəd qoruyucu kombinezonun istehsalı nəzərdə tutulur. Müəssisənin istifadəyə verilməsi yeni iş yerlərinin açılması baxımından da böyük əhəmiyyət daşıyır. Belə ki, buradakı istehsalat prosesinə 210 işçi cəlb olunub.
Yerli tələbat ödənildikdən sonra həm tibbi maskaların, həm də qoruyucu kombinezonların ixracı da nəzərdə tutulur. Beləliklə, bu cür müəssisələrin fəaliyyətə başlaması Azərbaycanın ixrac potensialının artırılmasına xidmət etməklə bərabər, qeyri-neft sektorunun inkişafı baxımından da böyük rol oynayır. Sumqayıtda “Gilan Tekstil Park” MMC-də istehsal olunacaq tibbi maska və tibbi kombinezonların daxili tələbatı ödəməklə yanaşı, ixrac olunması ölkəyə daxil olacaq valyutanın artmasına gətirib çıxaracaq.
“Qeyri-neft sektoruna aid istənilən müəssisə açılarkən əsas hədəf...”
İqtisadçı Pərviz Heydərov “Bakı-Xəbər”ə açıqlamasında qeyd etdi ki, qeyri-neft sektoru üzrə yaradılan hər hansı bir müəssisənin əsas məqsədi ölkənin ixrac potensialını artırmaqdır: “Qeyri-neft sektoru elə bir sahədir ki, bu sahə üzrə yaradılan hər bir müəssisədə istehsal ediləcək və ya edilməsi nəzərdə tutulan məhsul sırf daxili bazarı təmin etməməlidir. Daxili bazarı təmin etmək üçün yaradılan hər hansı bir müəssisənin fəaliyyəti uzun olmaz. Və onların perspektivi də olmaz”.
Həmsöhbətimizin sözlərinə görə, qeyri-neft sektoruna aid istənilən müəssisə açılarkən əsas hədəf həm daxili tələbatı ödəmək, həm də istehsal olunan məhsulu xarici ölkələrə ixrac etməkdir. Ölkəmizdə qoruyucu kombinezonların istehsal olunması ölkəyə daxil olacaq valyutanın artmasına imkan verəcək.
Günel CƏLİLOVA
