“Hər kəs bilməlidir ki, bizim valyuta ehtiyatlarımız azalıb. İqtisadiyyatı yenidən canlandırmaq, iş yerlərini bərpa etmək üçün vaxt lazım olacaq”. Bunu Prezident İlham Əliyev Sumqayıtda “Gilan Tekstil Park” Məhdud Məsuliyyətli Cəmiyyətinin tibbi maska fabrikinin və tikiş fabrikinin nəzdində fəaliyyət göstərən qoruyucu kombinezonların istehsalı müəssisəsinin açılışından sonra müəssisələrin bir qrup işçisi ilə görüşündə çıxışı zamanı deyib.
Ölkə başçısının sözlərinə görə, bizim iqtisadi göstəricilərimiz bu ilin yanvar-fevral ayları çox ümidverici idi: “Mən, sözün düzü, fikirləşirdim ki, biz bu ili rekord göstəricilərlə başa vuracağıq. Ancaq bu pandemiya həyatımıza müdaxilə edərək bizim planlarımızı pozdu. Amma buna baxmayaraq, - indi dedim ki, bir çox ölkələrin indi iqtisadi vəziyyəti ağırdır və iqtisadiyyat tənəzzülə uğrayıb, - Azərbaycanda dörd ayın yekunları göstərir ki, iqtisadiyyat az da olsa artıb - 0,2 faiz. Əlbəttə ki, bu, şərti artım sayıla bilər. Amma yenə də hələ ki, düşməyib. Ancaq hər kəs bilməlidir ki, bizim valyuta ehtiyatlarımız azalıb. İqtisadiyyatı yenidən canlandırmaq, iş yerlərini bərpa etmək üçün vaxt lazım olacaq. Ona görə biz indi 90 min ictimai ödənişli iş yeri yaradırıq, 80 min ailə dövlətdən sosial yardım alır, özünüməşğulluq proqramı çərçivəsində 12 min ailəyə lazım olan vasitələr verilir. Bütün bunları biz edirik ki, işsizlik artmasın. Ancaq bütün ölkələrdə işsizlik artıbdır, ən inkişaf etmiş ölkələrdə sürətlə artıb. Yəqin indi rəqəmlər göstərəcək ki, bizdə də artıb”.
Koronavirus pandemiyası ilə əlaqədar olaraq iqtisadi artımın aşağı düşməsi, valyuta ehtiyatlarının azalması təbiidir. Çünki məlum pandemiya bütün dünya ölkələrinin iqtisadiyyatına mənfi təsir göstərir. Ancaq neftin dünya bazar qiymətinin ucuz olaraq qalması və pandemiya məsələsi indiki kimi davam edərsə, Azərbaycanda nə baş verəcək?
“Qeyri-neft sektorunun müxtəlif sahələrinin inkişafı yeni imkanlar yaradacaq”
Məsələyə münasibət bildirən millət vəkili Aydın Hüseynovun sözlərinə görə, vəziyyətin indiki kimi davam etməsi Azərbaycan iqtisadiyyatına ciddi mənfi təsir göstərə bilməyəcək: “Hesab edirəm ki, bununla bağlı ciddi bədbinliyə qapılmağa əsas yoxdur. Digər iqtisadi mexanizmlərin işə salınması vəziyyətdən çıxmağa imkan verəcək. Məsələ ondadır ki, zəruri hesab olunmayan investisiya layihələrinin təxirə salınması gündəlikdədir. O cümlədən, əsaslı hesab olunmayan xərclərin tərkibində dəyişiklik ola bilər. Sözügedən sahələrdə xərclərin azaldılması büdcəyə qənaət etməyə imkan verəcək. Bu da yaranan çətin vəziyyətdən çıxmağa bizə kömək edəcək. Nəzərə almaq lazımdır ki, Azərbaycanda kənd təsərrüfatının inkişafı, daxili istehsalın artırılması istiqamətində böyük layihələr həyata keçirilir. Qeyri-neft sektorunun inkişafına xüsusi diqqət göstərilir. Sözügedən istiqamətdə görülən işlər intensiv xarakterlidir. Bütün bunlar onu deməyə əsas verir ki, neftin qiyməti ucuz olaraq qalsa belə, Azərbaycanın iqtisadi inkişafı davam edəcək. Qeyri-neft sektorunun müxtəlif sahələrinin inkişafı yeni imkanlar yaradacaq. Nəticədə ölkəmiz pandemiyadan az itki ilə çıxacaq. O üzdən, düşünürəm ki, biz bu imkanlardan maksimum səmərəli istifadə etməliyik”.
Vidadi ORDAHALLI
