17/07/2019 11:19
728 x 90

Azərbaycan Avropa Oyunlarını ənənəvi dünya idmanı turnirinə çevirməyə nail oldu

“II Avropa Oyunlarının uğurla keçməsi sübut etdi ki, Azərbaycan yeni idman turniri ənənəsini yaratdı”

img

Məlum olduğu kimi, Belarusun paytaxtı Minskdə keçirilən II Avropa Oyunları uğurla başa çatdı. II Avropa Oyunlarında Avropanın 50 ölkəsindən 4 min idmançı medallar uğrunda mübarizə aparıb. Bu yarışlarda ölkəmizi 76 idmançı təmsil edib. Azərbaycan idmançıları oyunlarda, ümumilikdə, 28 medal qazanıb. İdmançılarımızın hesabında 5 qızıl, 10 gümüş, 13 bürünc mükafat var.

Bütövlükdə, 28 medal qazanan Azərbaycan yarışı 10-cu pillədə bitirib. Ümumilikdə, 200 dəst medala 43 ölkə təmsilçiləri yiyələniblər. Onlardan cəmi 34-ü qızıl medal sevinci yaşaya bilib.

Medal sıralamasına Rusiya başçılıq edir. 4 il əvvəl Bakıda keçirilən İlk Avropa Oyunlarında olduğu kimi, yenə şimallılar birinci olub. İkinci yeri isə yenə meydan sahibləri tutublar. Bu dəfə Belarus bu uğura imza atıb. Ukrayna isə ilk üçlüyü qapayıb. İlk altılıqda növbəti yerləri İtaliya, Hollandiya və Almaniya tutub. Daha üç milli – Gürcüstan, Fransa və Böyük Britaniya da Azərbaycan yığması kimi ilk onluqda qərarlaşıb.

Bütün bunların fonunda, II Avropa Oyunlarının uğurla yekunlaşması və dövlətlərin burada həvəslə iştirakı sübut etdi ki, Avropa Oyunları ənənəvi dünya idmanı turnirlərindən birinə artıq çevrildi. Bununla yanaşı, Azərbaycan yeni idman turniri ənənəsini yaratdı. Nəzərə almaq lazımdır ki, I Avropa Oyunlarının çox uğurla Azərbaycanda keçirilməsi bu baxımdan çox mühüm rol oynayıb. Ekspertlər bunu necə dəyərləndirirlər?

  • Kamal Quliyev: “Bunun nəticəsidir ki, Avropanın 50 ölkəsi sözügedən oyunlara böyük həvəslə qatıldı”

Məsələyə münasibət bildirən idman sahəsi üzrə ekspert Kamal Quliyevin sözlərinə görə, II Avropa Oyunlarının uğurla keçməsi və bir sıra ölkələrin bu oyunlarda həvəslə iştirak etməsi sübut etdi ki, Azərbaycan yeni idman turniri ənənəsini yaratdı: “Birbaşa bunlar bir-birilə əlaqəlidir. Çünki 2015-ci ildə I Avropa Oyunlarının Azərbaycanda möhtəşəm şəkildə keçirilməsi bu məsələdə mühüm rol oynadı. Azərbaycan, faktiki olaraq, yeni idman turniri ənənəsinin əsasını qoydu. O zaman bəziləri iddia edirdilər ki, guya Azərbaycandan sonra bu oyunları keçirən ölkə olmayacaq. Ancaq bu deyilənlər özünü doğrultmadı. Minskdə keçirilən II Avropa Oyunlarının uğurla yekunlaşması göstərdi ki, dünyanın yeni idman turnirinə marağı böyükdür. Bunun nəticəsidir ki, Avropanın 50 ölkəsi sözügedən oyunlara böyük həvəslə qatıldı. Onu da qeyd edim ki, Azərbaycanda ötən illər ərzində yaradılan müasir idman infrastrukturu dünyanın aparıcı ölkələri ilə müqayisə olunacaq dərəcədə üstün səviyyədədir. O baxımdan bütün bunlar Azərbaycanın beynəlxalq idman turnirlərində uğurlarını şərtləndirən başlıca faktorlardan biridir. Ölkəmizin uğurla beynəlxalq idman yarışlarına evsahibliyi etməsi yeni imkanlar açır”.

Vidadi ORDAHALLI

Son xəbərlər