17/07/2019 11:24
728 x 90

Tovuzda şəhid Zaur Axundovun xatirəsinə həsr edilən taekvondo turniri başa çatıb - FOTO

“Qala” taekvondo klubunun rəhbəri “Yarışın ən əzmkar məşqçisi” mükafatına layiq görülüb

img

Şəhidlərin xatirəsini uca tutmaq, onların işıqlı əməllərini daim yaşatmaq üçün dövlət və ictimaiyyət tərəfindən müxtəlif tədbirlər keçirilir. Azərbaycanın ərazi bütövlüyü uğrunda şəhid olan Vətən oğullarının xatirəsinə müxtəlif yerli və beynəlxalq əhəmiyyətli idman yarışları təşkil olunur.

Tovuz Rayon Gənclər və İdman İdarəsinin dəstəyi və Zaur Axundov adına taekvondo klubunun təşkilatçılığı ilə, Qarabağ uğrunda gedən döyüşlərdə şəhid olmuş Z.Axundovun xatirəsinə həsr olunan Tovuz rayon açıq birinciliyi başa çatıb.

  • Ramil Həsənov: “30-dan artıq komandanın qatıldığı bu nüfuzlu turnirdə komandamız 1 qızıl, 1 gümüş və 3 bürünc medal qazandı”

Turnirdə “Qala” taekvondo klubunun da uşaq və yeniyetmə idmançıları böyük nəticə göstəriblər. “Qala” taekvondo klubunun rəhbəri, 4-cü dan qara kəmər sahibi, respublikanın əməkdar məşqçisi Ramil Həsənov “Bakı-Xəbər”ə açıqlamasında bildirdi ki, yarış olduqca gərgin şəraitdə baş tutub və sevindirici haldır ki, yetirmələri bu dəfə də fərqlənməyi bacarıblar. “Bu yarış sıradan bir yarış deyildi. Burada Azərbaycandan və ölkəmizdən kənarda fəaliyyət göstərən taekvondo klublarının idmançıları iştirak edirdilər. Bu turnirdə mənim yetirmələrin də uğurla çıxış etdilər. 30-dan artıq komandanın qatıldığı bu nüfuzlu turnirdə komandamız 1 qızıl, 1 gümüş və 3 bürünc medal qazandı. Bunu “Qala” taekvondo klubunun növbəti uğuru hesab edirəm. İnanıram ki, yetirmələrim başqa turnirlərdə də yüksək nəticələr göstərəcəklər. Bu cür yarışların təşkil edilməsi uşaq, yeniyetmə və gənclərin fiziki və mənəvi inkişafında müstəsna rol oynayır. Xalqımızın şəhidlərimizin ruhuna sayğısı sonsuzdur, ehtiramı böyükdür. Şəhid Z.Axundovun xatirəsinə həsr edilən turnirin də gənclərimiz üçün həm də mənəvi əhəmiyyəti var” - deyə bildirən R.Həsənov qeyd etdi ki, turnirdə Xanmurad Süleymanov I, Mircəfər Cabbarov II, Fatma İsmayılova, Gülnur Musazadə və Hüseyn Səfərli III yerlərə layiq görülüblər. İdmançıların məşqçiləri Ramil Həsənov və idman ustası Fatma Əliyevadır.

Qeyd edək ki, turnirdə taekvondo müəllimlərinə xüsusi təsis edilmiş mükafatlar təqdim edilib. “Qala” taekvondo klubunun rəhbəri, məşqçi-müəllim Ramil Həsənov, “Yarışın ən əzmkar məşqçisi” mükafatı ilə təltif edilib.

  • Ümid Axundov: “Bu turniri şəhid Zaur Axundovun xatirəsinə həsr etməkdə məqsədimiz odur ki, onun timsalında bütün şəhidlərimizi yad edək”

Turnirin təşkilatçısı və Z.Axundov adına taekvondo klubunun rəhbəri Ümid Axundov da bizimlə söhbətində turnirin əhəmiyyətindən danışdı. Ü.Axundovun sözlərinə görə, şəhid Z.Axundovun xatirəsinə həsr olunan turnir 14 ildir keçirilir. O bildirdi ki, ənənəvi olaraq, hər il keçirilən turnirdə 31 klub və taekvondo bölmələrindən, eləcə də Gürcüstanın “Rustavi” taekvondo klubundan, ümumilikdə, 380 uşaq, yeniyetmə və gənc taekvondoçu dayaq üzərinə çıxmışlar. Onun sözlərinə görə, 29-30 iyun tarixlərində Olimpiya İdman Kompleksində təşkil edilən turnirdə mükafatçılar, Rayon Gənclər və İdman İdarəsinin müvafiq diplom və medalları ilə təltif olunublar. “Bu yarış 14 ildir keçirilir. Əvvəllər yarış elektron qaydada keçirilmirdi, adi qaydada keçirilirdi. Yarışda əsasən 4-5 komanda və 60-100 idmançı iştirak edirdi. Amma son 4 ildir bu turnir çox yüksək səviyyədə, elektron sistemdə, sırf olimpiya qaydası ilə təşkil olunur. İştirakçıların da sayı əsasın 500 nəfərə yaxın olub. Son yarışda 380 idmançı öz güclərini sınadı. Bu il yarışda, həmçinin, Gürcüstan taekvondoçuları da iştirak edirdilər. Ümumilikdə, turnirə 31 komanda  qatılmışdı. Bu turniri qardaşım şəhid Z.Axundovun xatirəsinə həsr etməkdə məqsədimiz odur ki, onun timsalında bütün şəhidlərimizi yad edək. Gənclərin idmana marağının artırılmasına, onlarda vətənpərvərlik hisslərinin formalaşdırılmasına töhfə veririk”.

Turnirin təşkilində Tovuz Rayon Gənclər və İdman İdarəsindən, eləcə də rayonun Qarabağ Əlilləri Cəmiyyətindən və digər qurumlardan, müəyyən iş adamlarından da dəstək aldıqlarını deyən Ü.Axundov yarışın keçirilməsinə hər hansı bir formada köməklik göstərənlərə təşəkkürünü də bildirdi.

İradə SARIYEVA

Son xəbərlər