Futbol üzrə Azərbaycan millisi tarixinin ən uğursuz dönəmlərindən birini yaşayır desək yanılmarıq. “Bakcell Arena”da AVRO-2020-nin seçmə mərhələsi çərçivəsində növbəti oyununa çıxan milli komanda Slovakiya yığmasına böyük hesabla məğlub olub. Nikola Yurçeviçin yetirmələrinin doğma meydanda 5:1 hesabı ilə uduzmaları azarkeşləri də məyus edib. Azərbaycan dövləti millimizin inkişafı üçün əlindən gələni əsirgəmir.
Milliyə dünyanın ən tanınmış futbol məşqçilərini yüksək əməkhaqqı müqabilində cəlb edirlər. Komandanın maddi-texiniki bazası, oyunçulara göstərilən qayğı ən yüksək səviyyədədir. Buna baxmayaraq, futbol millimiz ard-arda biabırçı məğlubiyyət seriyasını davam etdirir. Komandamız doğma divarlar arasında belə dünyanın heç də güclü olmayan futbol yığmalarına böyük hesabla məğlub olur. Hər oyundan-oyuna isə bu məğlubiyyətlər daha biabırçı hal alır. Yığmamızın bu cür oyun göstərməsinin kökündə hansı amillər durur?
Kənan Məstəliyev: “Yalnız məşqçi dəyişməklə bu problemin həllinə nail ola bilmərik”
Tanınmış futbol şərhçisi Kənan Məstəliyev “Bakı-Xəbər”ə açıqlamasında bildirdi ki, Slovakiya və ondan əvvəl Macarıstana məğlubiyyət çox üzücü oldu: “İki oyunda belə üzücü məğlubiyyət azarkeşlər üçün gözlənilməz olsa da, futbolla dərindən maraqlanan mütəxəssislər üçün isə belə olmadı. Çünki biz vəziyyətin acınacaqlı olduğunu görürdük, bu barədə yazılar yazırdıq. Mart ayında Xorvatiya məğlubiyyətindən sonra Litva kimi zəif bir komanda ilə Bakıda 0-0-lıq hesabdan sonra bu barədə yazmışdım. Belə acı vəziyyətlə bağlı bir sıra fikirlər söyləmək olar. Birincisi, baş məşqçi yanlış seçimdir. Çünki bu adam karyerası boyunca baş məşqçi işləməyib. İkinci məşqçi və ya köməkçi kimi fəaliyyət göstərib. Heç vaxt vacib qərarların verilməsində iştirak etməyib. İndi həmin təcrübəni Azərbaycanda həyata keçirmək istəyir. Belə bir adamı milli komandamıza baş məşqçi təyin etmək çox böyük səhv idi. Adam altı aydı işləyir, hələ də futbolçularımızı yaxşı tanımır, onların potensialına bələd deyil. Məşqçi ilə bağlı məsələ tam fiaskodur. Bundan sonra da onun nəsə edəcəyinə heç bir inam yoxdur. Ölkədəki futbolun səviyyəsi elə vəziyyətə salınıb ki, bu yalnız baş məşqçi probleminə bağlı məsələ deyil. Ölkəmizin futbol çempionatında cəmi 8 komanda iştirak edir. Ölkənin göstəriciləri ilə müqayisədə bu, biabırçı dərəcədə azdır. Bizim kimi ölkələrdə yüksək divizionda oynayan komandaların sayı ən azı 14 olur. Komandaların azlığı rəqabətin zəif olmasını şərtləndirir. Həmin bu 8 komandadan 5-ni AFFA maliyyələşdirir. Birinci divizionda da vəziyyət ürəkaçan deyil. Orada əsasən yüksək liqada oynayan komandaların ikinci heyəti çıxış edir. 3-cü liqa isə ümumiyyətlə yoxdur. Aşağı divizionun qalibləri illərdir yuxarı diviziona lisenziya probleminə görə keçə bilmirlər. Regionlarımızda futbol, demək olar ki, yox səviyyəsindədir. Yüksək divizionda çıxış edən 8 komandanın hamısı Abşeron yarımadasındadır. Yalnız Qəbələni istisna sayırlar. Amma onların oyunçuları da Bakıda yaşayır, komanda məşqlərini də burada edirlər. Yalnız oyundan-oyuna Qəbələyə gedirdilər. Gəncə, Tovuz, Lənkəran, Naxçıvan kimi futbol ənənələri olan bölgələrin komandalarından heç biri yüksək dəstədə təmsil olunmur. Ölkə futbolunda olan bu cür problemlər, təbii ki, millimizin oyununda özünü büruzə verir. İllərdir bizim tənqidlərimizə baxmayaraq, bu belə davam edir. Yalnız məşqçi dəyişməklə bu problemin həllinə nail ola bilmərik. Struktur yenilikləri baş verməsə, Azərbaycan futbolunu bundan da böyük məğlubiyyətlər gözləyir. Hesab edirəm ki, AFFA prezidenti bu məsələyə ciddi müdaxilə edib, dəyişikliklərə imza atmalıdır. Dövlətimiz əlindən gələni əsirgəmir ki, yaxşı nəticə olsun. Amma biz günü-gündən geriyə addımlayırıq”.
Məhəmmədəli QƏRİBLİ
