Elçin Cəfərov: “Qarşıdakı dövrdə Türkiyə futbolunu çox ciddi xaos gözləyir”
Məlum olduğu kimi, Türkiyə milli komandası Dünya Çempionatında çıxışını vaxtından əvvəl başa vurub. "Ay-ulduzlular" II tur çərçivəsində Paraqvay yığmasına minimal hesabla (0:1) məğlub olub. İlk turda da Avstraliyaya 0:2 hesabı ilə uduzan Türkiyə seçməsi ardıcıl iki uğursuz nəticədən sonra mundialla vidalaşıb. Bu çempionatın tarixində oyun başlayandan sonra ən tez və sürətli vurulan qol da Türkiyənin qapısına vuruldu. Cəmi 64 saniyədən sonra Türkiyə qapısına qol vuruldu. Dünya futbol tarixində belə sürətli qol bəlkə də olmayıb.
Türkiyə komandasının Dünya Çempionatında uğursuzluğu və belə xoşəgəlməz vəziyyətlə üzləşməsi ciddi müzakirələrə səbəb olub. Nəzərə almaq lazımdır ki, Türkiyə 2002-ci ildə keçirilən dünya çempionatında üçüncü yeri tutmuşdu. İndi baş verənlərə baxanda sanki Türkiyə futbolu getdikcə öləziyir, əvvəlki nüfuzunu, formasını itirir. Bir zamanlar çempionatlarda ciddi nəticələr göstərən Türkiyə futbolunda nə baş verir? Bu, Türkiyə Futbol Federasiyasında sön dövrlər baş verən qalmaqallarla bağlıdırmı?
Sözügedən məsələyə aydınlıq gətirən futbol üzrə ekspert Elçin Cəfərov baki-xeber.com-a açıqlamasında bunun səbəbini bir sıra amillərlə əlaqələndirdi: “Ümumiyyətlə, Türkiyə milli komandasının Dünya Çempionatında çıxışını vaxtından əvvəl başa vurması bir çoxlarını təəccübləndirdi. Eyni zamanda kədərləndirdi. Nəinki Türkiyədə, Azərbaycanda da kifayət qədər tərəfdarı olan azarkeşlərin məyusluğuna səbəb oldu. Türkiyə milli komandasının mənfi performans sərgiləməsi istər-istəməz bəzi sualları meydana çıxarır. Əslində Dünya Çempionatının pley-off mərhələsinin ilk qarşılaşmasında, yəni Rumınya-Kosova maçlarındakı oyun anlayışı ilə, hazırkı Türkiyənin oyun anlayışı demək olar eynidir. Oyunçu profilləri və oyun formatı, şablonu, düsturu eynidir. Sadəcə olaraq Rumınya-Kosova maçlarında ələ düşən fürsətdən bir epizod yaradıldı və ondan da maksimum şəkildə istifadə edildi. Nəticədə Dünya Çempionatının final mərhələsinə vəsiqə qazanıldı. Bir çoxları üçün bu mundial təəccüblü olsa da, mənim üçün bu, belə olmadı. Qapanan, xüsusilə xətlərarası məsafəni çox dar saxlayan kollektivlər Türkiyə ilə maçda favaritə çevrilirlər. Çünki Türkiyənin oyunu meydançanın rəqib hissəsinə yıxmaq istəyi və yan pas, geri pas məsələsi var. Bu zaman meydançanın rəqibə aid hissəsində itirilən toplar olur ki, bu zaman da rəqib sürətli oynayaraq müdafiə arxasaına atılan toplarla təhlükəli epizodlar yaradır. Bu zaman Türkiyənin bir sıra çətinliklərlə qarşılaşdığının şahidi olmuşuq. Avstraliya maçından öncə, Venesuela ilə hazırlıq görüşündə də analoji hadisənin şahidi olmuşduq. Eyni oyun şablonu, profili, düsturu və nəticə etibarı ilə bal hazırlamayan arı kimi oynayan bir Türkiyə yığması izləmişik. Əsas problem rəqibin cərimə meydançası içərisində topa sahib olma əmsalı kifayət qədər aşağıdır. Bu, da komandanın hücum bölgəsində kifayət qədər zəif təsir bağışlamasının nəticəsidir. Digər tərəfdən son dövrlər Türkiyə futbolunda cərəyan edən oyun alqı-satqısı məsələləri, bəzi maçların nəticələrinin öncədən müəyyənləşdirilməsi ilə bağlı qalmaqallar da bu prosesə təsirsiz ötüşmür. Hətta mundialdan sonra Türkiyədə çox ciddi həbslər olacaq. Hətta çempion Qalatasarayla bağlı çox ciddi arqumentlər var. Bunun əsaslı olub-olmaması araşdırmalardan sonra bəlli olacaq. Bir sözlə, qarşıdakı dövrdə Türkiyə futbolunu çox ciddi xaos gözləyir. Bu fonda Türkiyə millisinin uğursuz çıxışı bir növ bu hadisələrin daha da erkən başlamasına səbəb olacaq. Türkiyə millisi bu cür xaotik vəziyyətdə idarə olunması ilə dünya çempionatında uğurlu çıxışı sual altında idi. Bu, belə də oldu”.
Vidadi ORDAHALLI
