Aydın Bağırov: “UEFA “Qarabağ”ın növbəti oyunlarında bu kimi çağırışları nəzərə almalıdır”
Çempionlar Liqasının əsas mərhələsinin VII turunda “Qarabağ” klubu Almaniyanın “Ayntraxt” komandası ilə qarşılaşıb. Matçı isveçrəli hakimin idarə etməsi yerli futbol ictimaiyyətində birmənalı qarşılanmayıb. Bildirilir ki, İsveçrənin almandilli ölkə olması “Qarabağ”ın əleyhinə ədalətsiz qərarların verilməsinə zəmin yaradıb.
UEFA-nın bu kimi məqamlara niyə diqqət yetirmədiyi sual doğurur. Ölkə başçısı İlham Əliyev “Qarabağ”ı Çempionlar Liqasının əsas mərhələsində “Ayntraxt” üzərində parlaq qələbə qazanması münasibətilə təbrik edərkən bu məsələyə toxunub. Prezidentin paylaşımında qeyd edilir ki, hakimin ədalətsiz və qərəzli qərarlarına baxmayaraq, haqq-ədalət öz yerini tapdı: “Birinci dəfə deyil ki, UEFA tərəfindən təyin edilən hakimlər ədalətsiz və qərəzli qərarları ilə Qarabağın qələbə yolunu kəsməyə çalışırlar. Ümid edirəm ki, UEFA bu hakimin kimin tərəfindən təyin olunmasına aydınlıq gətirəcək”.
İdman eksperti Aydın Bağırov baki-xeber.com-a şərhində bildirdi ki, “Qarabağ” komandası 2008-ci ildən etibarən Avropa kuboklarında sabit şəkildə iştirak edir. Son 12 ildə isə daimi olaraq Avropa kuboklarının əsas mərhələsində çıxış edir: “Bu müddət ərzində komandanın xeyli uğuru olub. Təəssüf ki, “Qarabağ”ın iştirakı ilə keçirilən son matçda komanda hakimin ədalətsizliyi ilə üzləşdi. Qeyd etmək lazımdır ki, futbolda hakim səhvləri qaçılmazdır. Hakim də insandır və yanılma ehtimalı var. Lakin “Qarabağ”ın oyunlarında baş verən səhvlərin bir çoxunda bu yanlış qərarların birbaşa nəticəyə təsir etdiyini görürük. Problemli məqam da məhz budur. Nəticəyə təsir edən səhv o deməkdir ki, komandanın illərdir gördüyü hazırlıq işləri, xərclənən maliyyə vəsaiti və uğur qazanmaq naminə əldə edilən nailiyyətlər hakimin səhvi ucbatından puç olur.
“Qarabağ” futbol komandasının oyunlarında bu cür haqsızlıqlar dəfələrlə müşahidə edilib. Bu kimi hallara ictimaiyyət və ölkə rəhbərliyi tərəfindən də etiraz bildirilib. “Qarabağ”ın son oyununda hakimin ədalətsizliyinə ölkə başçısı İlham Əliyev də haqlı olaraq toxundu və bu məsələ ilə bağlı UEFA-ya çağırış etdi. Bu, tamamilə haqlı çağırışdır.
Hesab edirəm ki, UEFA “Qarabağ”ın növbəti oyunlarında bu kimi çağırışları nəzərə almalıdır. Belə ki, hakim rəqibin qapısında aşkar penalti epizodu olmasına baxmayaraq, qayda pozuntusunu qeydə almadı. Əvəzində isə “Qarabağ”ın hücumu zamanı penalti təyin etdi. “Qarabağ”ın lehinə verilməli olan penalti “Ayntraxt” komandasının xeyrinə qərarlaşdırıldı. Bu isə oyunun nəticəsinə birbaşa təsir edən ciddi səhv idi.
Sevindirici haldır ki, komanda qısa müddətdə özünü toparladı və hakimin verdiyi yanlış qərarın mənfi təsirini öz əziyyəti hesabına aradan qaldıraraq növbəti mərhələyə vəsiqə qazandı. Bu hadisəyə UEFA tərəfindən xüsusi diqqət yetirilməlidir”.
Günel CƏLİLOVA
