Çoxlarının əzbərlədiyi bir söz var: “İdmanın siyasətə heç bir dəxli yoxdur”. Çox təəssüflər olsun ki, bu aksioma deyil və dəfələrlə idmanın siyasətə aidiyyəti olduğunun, qatıldığının şahidi olmuşuq. Ən azı 30 il boyu idman yarışlarının da, musiqi, kino, teatr, mədəniyyət festivallarının da siyasi alətə, siyasi təzyiq vasitəsinə çevrildiyi görmüşük, yaşamışıq.
Bu sahədə ən çox ziyan çəkən biz olmuşuq. Ermənilərin böyük bacıları, xalaları, bibiləri hər zaman pərdə arxasından onlara qahmar durub. Bunu o qədər görmüşük ki... Azərbaycanlı güləşçi Sabir Cəfərova qarşı edilənlərin içində də erməni təəssübkeşliyinin olduğu gözdən qaçmır. Gəlin, əvvəlcə hadisəni təqdim edək. Yayılan məlumatlara görə, Romada keçirilən U-20 Avropa çempionatında yarışan Azərbaycan idmançısı Sabir Cəfərovun davranışı qalmaqala səbəb olub. Yarışda uğurlu çıxış edən idmançı finala qədər irəliləyib. O, həlledici görüşdə erməni güləşçisi Hayk Papikyana 3:2 hesabı ilə məğlub olub və gümüş medal əldə edib. Lakin mükafatlandırma zamanı Ermənistanın himni səsləndirilərkən Sabir Cəfərov kürsünü tərk edib. Məhz bu, böyük qalmaqala səbəb olub. Nəticədə təşkilatçılar Sabir Cəfərovu yarışdan kənarlaşdırıb və gümüş medalı əlindən alınıb.
S.Cəfərovun medalının əlindən alınması artıq bizim cəmiyyətdə müəyyən rəy yaradıb ki, bu, ikili standartdan irəli gəlir və Dünya Güləş Birliyi ermənipərəst mövqe sərgiləyir. Bu cür iddia edənlərin sayı az deyil.
Doğrudanmı, burada ikili standartlar özünü göstərib? Sabir Cəfərovun medalının əlindən alınması doğrudanmı ədalətsizlikdir?
Sərxan Musayev: “Qaydaları pozduğu üçün Azərbaycan millisinin güləşçisi Sabir Cəfərovun medalı əlindən alınıb”
Baş verənlərlə və iddialarla bağlı Azərbaycan Güləş Federasiyasının mətbuat xidmətinin rəhbəri Sərxan Musa ilə əlaqə saxladıq. S.Musa “Bakı-Xəbər”ə açıqlamasında bildirdi ki, səsləndirilən iddialar doğru deyil, baş verənlər tamamilə qanuna uyğundur. O qeyd etdi ki, məyyən olunmuş qaydalar var və o qaydalara əməl olunmalıdır: “U-20 Avropa çempionatını təşkil edən Dünya Güləş Birliyinin öz qaydaları var və bu qaydalara idmançımız riayət etməyib, emosional davranıb, himni dinləməyib. Qaydaları pozduğu üçün Azərbaycan millisinin güləşçisi Sabir Cəfərovun medalı əlindən alınıb. Burada ikili standartlardan söhbət getmir. İdmançı səhv addın atıb və sonra səhv addım atdığının fərqinə vardıqda isə gec olub”.
S.Musa bildirdi ki, məşqçilər Sabirin belə bir hərəkət edəcəyini bilməyiblər, çünki hadisə ani baş verib. Həmin vaxt məşqçilərin başqa bir güləşçini xalçaya hazırlaşdırdıqlarını deyən S.Musanın sözlərinə görə, onlar idmançının bu hərəkətini görməyib, o kürsüdən düşüb gedəndə isə onu qaytarmaq üçün gec olub. “Dünya Güləş Birliyi belə siyasi oyunlardan uzaqdır. Burada hər hansı bir hakim qərəzi və başqa bir məsələ olsaydı nəsə demək olardı. Bundan əvvəl yeniyetmələrin Avropa çempionatı keçirilirdi. Səhv etmirəmsə, 9 görüş oldu və hamısında da bizim idmançılar qalib gəldi. Bizim himnimizi dəfələrlə dinlədilər. Obyektiv yanaşaq, onların idmançıları axıra qədər bizim himnimizi dinləyiblər. Yəni əgər burada aşkar qayda pozuntusu varsa, hansısa ikili standartlardan danışmağa dəyməz”- deyə Federasiyanın mətbuat xidmətinin rəhbəri bildirdi.
Federasiyadan deyilir ki, S.Cəfərov qaydaları pozub və bu səbəbdən də medalı əlindən alınıb.
Amma qeyd edildiyi kimi, ictimaiyyətin məsələyə münasibəti fərqlidir. Çoxları bildirir ki, indiyə qədər erməni idmançıları, futbol komandaları neçə-neçə beynəlxalq yarışda, tədbirdə, stadionlarda Azərbaycanın dövlət atributlarına çirkab atıb, bizim dəyərləri təhqir ediblər. Hətta separatçıların murdar əski parçasını belə gətirib Azərbaycanın keçirdiyi oyunlar zamanı stadiona asıblar. Lakin təəssüf ki, indiyə qədər heç bir erməni idmançısı cəzalandırılmayıb, beynəlxalq idman təşkilatları onların başına hər zaman sığal çəkib. İctimai rəydə S.Cəfərovun medalının əlindən alınmasına münasibət bu cürdür.
Əli Mahmud: “İdmanın siyasiləşdirilməsi doğru deyil və bu çox mənfi nəticələr verir”
“Qarabağa aparan yol” qəzetinin baş redaktoru Əli Mahmud bizimlə söhbətində təəssüflə bildirdi ki, Azərbaycana qarşı hər zaman Qərbin ikili yanaşması var: “İdmanın siyasiləşdirilməsi doğru deyil və bu çox mənfi nəticələr verir. Təəssüf ki, son 30 ildə biz idmandan da siyasi alət kimi istifadə edildiyinin şahidi oluruq. İdmançının medalının əlindən alınması məsələsi təəssüf doğurur. İndiyə qədər qanun pozuntusuna görə erməni idmançılarının cəzalandırıldığını görməmişik. İdmançı səhv edibsə cəzalanmalıdır, amma bu cəza təkcə azərbaycanlı idmançıya tətbiq edilməməlidir. İndiyə qədər Azərbaycana qarşı təxribatçı hərəkətlərə yol verən erməni idmançıları da cəzalandırılmalı idilər. Amma onlara beynəlxalq yarışlarda gözün üstə qaşın var deyən yoxdur”.
Ola bilsin, S.Cəfərov qanun pozuntusuna yol verib və buna görə də halal medalı əlindən alınıb. Sabir erməni himnini dinləməkdənsə kürsünü tərk edib. O, Ermənistanın himini dinləyib onun qarşısında baş əysəydi, əlbəttə, bu tənqid oluna bilərdi, ictimaiyyət də onu qınayardı. Lakin gördüyünüz kimi, o, milli təəssübkeşliyimizi medaldan üstün tutub kürsünü tərk edib. Bunu qınamaq yox, alqışlamaq lazımdır!
Əli TURABOV
