Azərbaycanda ənənəvi idman növlərindən biri və demək olar ki, birincisi güləşdir. İstər Olimpiya Oyunları, istərsə də dünya və Avropa çempionatlarında üçrəngli bayrağımız ən çox məhz güləşçilərimizin uğurları fonunda qalxıb, himnimiz səslənib. Ölkəmizdə təkbətək idman növləri içində elit mövqeyini qoruyan güləşin bünövrəsi də möhkəm sütunlar üzərində bərqərardır.
Ümumiyyətlə, yerləşdiyimiz coğrafi areal da bizdə bu idman növünün zirvədə olmasına zəmin yaradır. Şimallı-cənublu Qafqaz ölkələrinin əksəriyyətində idman növlərinin ümdəsi güləşdir. Vaxtilə Azərbaycan güləş yarışlarında bayrağımızı yüksəyə qaldırardı. Ancaq son zamanlar bunun əksi müşahidə olunub. Bunun səbəbi kimi, son illər Güləş Federasiyasında baş verən xoşagəlməz hadisələr qeyd olunurdu. Hətta Prezident İlham Əliyev də artıq 17-dən 23 yaşadək idmançıların Bolqarıstanda keçirilmiş güləş üzrə 7-ci Avropa çempionatının iştirakçılarının qəbulu zamanı məlum məsələyə toxunub. Prezident qeyd edib ki, son vaxtlar Güləş Federasiyasında gedən proseslər narahatlıq doğururdu və durğunluq hiss olunurdu: “Güləş Federasiyasında idarəetmə mexanizmi zəifləmişdi, faktiki olaraq özbaşınalıq hökm sürürdü. Əlbəttə ki, bu, nəticələrə də mənfi təsir göstərmişdir və bu təbiidir. Ona görə Güləş Federasiyasının rəhbərliyinin dəyişdirilməsi zəruri idi, bu baş verdi. Əminəm ki, federasiya indi həm buraxılmış bütün nöqsanları aradan qaldıracaq, vəziyyəti təhlil edəcək, - mənə məlumat verilib ki, artıq bu işlərə start verilib, - əlbəttə ki, idmançılara - həm gənclər, həm də böyüklər arasında çıxış edən idmançılara lazımi şərait yaradacaqdır”.
Sərxan Musalı: “Rio Olimpiadasından sonra bir müddət federasiyada maliyyə sıxıntısı yaşandı, ancaq bu problem…”
Azərbaycan Güləş Federasiyasının Mətbuat katibi Sərxan Musalı “Bakı-Xəbər”ə açıqlamasında qeyd etdi ki, Rio Olimpiadasından sonra bir müddət federasiyada maliyyə sıxıntısı yaşandı. Ancaq bu problem çox çəkmədi: “Nəticə baxımından isə güləş həmişə Azərbaycanın ən məhsuldar idman növü olub. İnanırıq ki, bundan sonra da belə olacaq. Ölkə başçısı ilə görüş idmançılar üçün böyük stimul oldu”.
Aydın Bağırov: “Federasiyanın əvvəlki rəhbərinin həm məşqçilər, həm də idmançılarla çox ciddi anlaşılmazlıqları var idi”
“Qol.az” saytının baş redaktoru, Əməkdar jurnalist Aydın Bağırov bildirdi ki, Güləş Federasiyasında uzun müddət problemlər olub: “Əsasən, rəhbərliklə idmançılar arasında narazılıqlar yaşanırdı. Həmçinin, qeyd olunan sahədə legioner idmançılar çox idi. Daxildə yaşanan narazılıqlar sonda nəticəyə təsir edirdi. Məlumdur ki, Azərbaycan güləşçiləri qatıldığı bütün olimpiya oyunlarında hər zaman qızıl medal qazanıb. Ancaq son olimpiya oyununda qızıl medal olmadı. Bu da istər idman ictimaiyyətimiz, istərsə də cəmiyyətimizdə birmənalı qarşılanmadı. İdman ölkəsi sayılan Azərbaycan bu olimpiadada gözlənilməz aqibətlə üzləşdi. Bunun da səbəbi federasiyanın daxilindən qaynaqlanan problemlərlə bağlı idi. Federasiyanın əvvəlki rəhbərinin həm məşqçilər, həm də idmançılarla çox ciddi anlaşılmazlıları var idi”.
Günel CƏLİLOVA
