“Elə idman növləri var ki, orada legionerlərdən istifadə olunub. Gənclər onlara baxıb öyrənirlər. Bizə bir neçə il vaxt lazımdır. Gələcəkdə ölkəmizdə də yaxşı mütəxəssislər yetişəcək. Bəzi federasiyalar legioner siyasətindən sui-istifadə edirlər. Məsələn, bəzi idmançılar deyirlər ki, milli komandaya düşə bilərdim, amma imkan vermədilər. Bunların hamısı araşdırılacaq”.
Bunu gənclər və idman naziri Fərid Qayıbov “CBC Sport” telekanalında yayımlanan "Təkbətək" verilişində qonaq olarkən deyib.
Nazir qeyd edib ki, bəzi federasiyalar legioner siyasətindən sui-istifadə edirlər.
Maraqlıdır, bu sahədə yaşanan problem necə həll etmək olar?
“Legionerlərə xərclənən pulların hesabına yerli idmançıların yetişdirilməsi mümkündür”
“Qol.az” saytının baş redaktoru, Əməkdar jurnalist Aydın Bağırov bildirdi ki, uzun illərdir ki, legionerlə bağlı problem müzakirə edilir: “Sevindirici haldır ki, gənclər və idman naziri Fərid Qayıbov da bu məsələni müzakirəyə çıxardır.
Məlumat üçün bildirim ki, legioner siyasəti idmana çox fayda verməyib. Müəyyən idmançılar olub ki, onlar həm Olimpiya oyunlarında həm də dünya və Avropa çempionatlarında müsbət nəticə göstəriblər. Ancaq bu kütləvi halda olmayıb. Bu səbəbdən də legioner siyasətdən mərhələ-mərhələ uzaqlaşmaq lazımdır”.
Həmöhbətimiz hesab edir ki, legionerlərə yönələn vəsait yerli idmançılara ayrılmalıdır: “Bölgələrdə, kəndlərdə uşaqların idmana marağı araşdırılmalıdır. Onlar arasında müəyyən işlər aparılmalıdır. Əcnəbilərə sərf edilən pul, əmək öz kadrlarımıza yönəlməlidir. Birsözlə legionerlərə xərclənən pulların hesabına yerli idmançıların yetişdirilməsi mümkündür”.
A.Bağırovun sözlərinə görə, legioner siyasətindən imtina olunmalıdır və onlara ayrılan pul bizim yerli uşaqlarımızın önə çıxarılmasına yönəldilməlidir. Azərbaycan gəncləri arasında əlbəyaxa döyüş, fərdi idman növləti, yarışlar zamanı özünü çox yaxşı nəticə göstərən, potensiallı uşaqlar olur. Bu istiqamətdə iş aparılmalıdır, pul yönləndirilməlidir həmin uşaqların gələcəyinə.
Günel CƏLİLOVA
