“...Çünki biz bu infrastrukturu, bu kompleksləri o məqsədlə yaratmışıq ki, həm idmanın kütləviliyi artsın, eyni zamanda, peşəkar idmançılar yetişsin. Nəzərə alsaq ki, Tokio Olimpiya Oyunlarında gənc idmançılar medallar qazana bilmədilər, bu, çox ciddi təftiş edilməlidir. Klublardakı vəziyyətlə bağlı təhlil aparılmalıdır. Yəni biz nəticə çıxarmalıyıq. Biz, əlbəttə, qələbələrlə fəxr edə bilərik. Ancaq çatışmazlıqlar da var və onlar aradan qaldırılmalıdır. Bu sahədə şəffaflıq tam təmin edilməlidir və bütün xoşagəlməz hallara qarşı ciddi mübarizə aparılmalıdır...” Bunu Prezident İlham Əliyev Fərid Qayıbovu gənclər və idman naziri təyin olunması ilə əlaqədar videoformatda qəbul edərkən bildirib.
Ekspertlər hesab edirlər ki, Prezidentin bu məsələni xüsusi qabartması çox idman məmurlarının, federasiya prezidentlərinin cəzalandırılması ilə nəticələnəcək. Ekspertlər deyir ki, dövlətin idmana, idmançılara, bir sözlə, bu sahənin inkişafına ayırdığı vəsaitin idman məmurları, federasiya rəhbərləri tərəfindən havaya sovrulduğu, şəxsi məqsədlərə yönəldildiyi üzə çıxarılacaq. İdmançılarımızın Tokio-2020-dəki uğursuzluğunun əsas səbəbinin elə federasiyalar özləri olduğunu deyən mütəxəssislər hesab edir ki, bu sahədə güclü pul yeyintisi olub.
Natiq Muxtarlı: “Onların heç vaxt cavabdeh olduqları idman sahəsinin...”
Tanınmış idman eksperti Natiq Muxtarlı “Bakı-Xəbər”ə bildirdi ki, Prezident yeni gənclər və idman nazirini videoformatda qəbul edərkən tövsiyə və tapşırıqlarını verdi. “Bu tövsiyə və tapşırıqlardan bəlli oldu ki, cənab Prezident bütövlükdə Azərbaycan idmanının problemlərindən xəbərdardır. Əsas problemi də xüsusi vurğuladı: uşaq idmanında durum, yaradılan infrastrukturdan təyinatı üzrə istifadə olunmamağı.
Bu problemləri idman mətbuatı zaman-zaman qabardıb. Həmişə yazmışıq ki, Azərbaycan üçün ənənəvi olan idman növlərində legionerləşdirmə siyasəti aparmaq gələcəyimizə, sabahımıza vurulan zərbədir, Azərbaycanın bölgələrində uşaqları idmana cəlb etmək lazımdır. Cəlb etmək lazımdır ki, uşaqlar həm də sağlam böyüsünlər, pis vərdişlərdən uzaq olsunlar, təsir dairəsinə düşməsinlər.
Bütün bu problemləri cənab Prezident də vurğuladı. Bəli, problem varsa və həll olunmursa, deməli, kadrlar yararsızdır. Biz də bunu iddia etmişik həmişə. Elə götürək, futbol təsərrüfatını. Neçə illərdir yazırıq ki, uşaq futboluna yatırım etmək lazımdır, xaricdən məşqçi gətirmək yox. Çünki əlimizdə məhsul yoxdursa, xaricdən gətirilən məşqçi heç nə edə bilməyəcək. O adam ölkəmizə heç bir töhfə verməyəcək, amma əvəzində Azərbaycandan valyuta aparacaq...”
N.Muxtarlının sözlərinə görə, elə digər idman növlərində də eyni səhvlərə yol verilib. Onun qeyd etdiyinə görə, kənd və qəsəbələrimizdə güləş, cüdo məktəbləri açmaq əvəzinə Dağıstandan, İrandan 3-4-cü dərəcəli idmançıları gətirib milliləşdirmişik: “Uşaq idmanı yatırımsız qalıb. Bu gün bu səhvin bədəlini ödəyirik.
Hesab edirəm ki, yeni nazir Prezidentin tövsiyə və tapşırıqlarına uyğun olaraq ciddi addımlar atmalıdır. İndi səhvi aradan qaldırmasaq, daha ağır duruma düşəcək idmanımız...Yubanmadan islahatlara başlamaq vacibdir. İslahatlar isə kadrlardan başlamalıdır. Hazırkı kadrların onlara tapşırılan işin öhdəsindən gəlmədiyi bəllidir. Onların heç vaxt cavabdeh olduqları idman sahəsinin inkişafı ilə bağlı strategiyaları olmayıb. Deməli, dəyişiklik vacibdir. Yeni nazir federasiyalardakı indiki kadrlarla yola davam etmək istəsə, onu böyük çətinliklər gözləyir.
Kadr dəyişikliyi ilə yanaşı, uşaq idmanında infrastrukturun qurulması, xüsusən də qəsəbə və kəndlərdə - vacibdir. Bu proses paralel aparılmalıdır...” -deyə N.Muxtarlı qeyd etdi.
Aydın Bağırov: “...islahatlar qaçılmazdır”
Digər tanınmış idman eksperti Aydın Bağırov da hesab edir ki, Prezidentin yeni təyin etdiyi nazir bu sahədə ciddi islahatlar aparmalıdır və onun indiyə qədər topladığı təcrübə buna imkan verəcək: “Fərid Qayıbovun necə nazir olacağını zaman göstərəcək. O, uzun illər Avropa Gimnasitika Federasiyasında fəaliyyət göstərib”.
A.Bağırov hesab edir ki, bütün sahələrdə ciddi islahatlara ehtiyac var və bu proses də başlayacaq. “Düşünürəm ki, əsasən də boks, cüdo, güləş, eyni zamanda da futbol federasiyasının fəaliyyəti ilə bağlı qurumların rəhbərliyilə bu yöndə ciddi söhbətlər aparılmalı, islahatların vacibliyi onların diqqətinə çatdırılmalıdır. Federasiya rəhbərləri bilməlidir ki, islahatlar qaçılmazdır”.
A.Bağırov hesab edir ki, federasiyalar bölgələrdən istedadlı gəncləri cəlb etməli və bölgələrdəki olimpiya komplekslərinin fəaliyyəti gücləndirilməlidir. A.Bağırov hesab edir ki, bizim idmançıların Tokiodakı uğursuzluğuna səbəb olan hər bir amil araşdırılmalı, təftiş edilməli, Prezidentin qarşıya qoyduğu tələblər, hədəflər tamamilə yerinə yetirilməlidir.
İradə SARIYEVA
